ၼႂ်ၼႆႉ 28/12/2025 ယၢမ်းၵၢင်ၼႂ် ၸွမ်ၸိၵ်းသိုၵ်းမၢၼ်ႈယိုတ်းမိူင်း မိၼ်းဢွင်ႇလၢႆႇ ၵႂႃႇပၼ်ၶႅပ်းၵၢင်ၸႂ် တီႈပၢင်လိူၵ်ႈတင်ႈ တီႈၸႄႈဝဵင်း ၸေႇယႃႇသီႇရိ ၼေႇပျီႇတေႃႇ။
ႁွင်ႈၵၢၼ်ၶၢဝ်ႇမၢၼ်ႈ BBC တွင်ႈထၢမ်လွင်ႈတၢင်းႁၼ်ထိုင်မၼ်းၸၢႆး ၵဵဝ်ႇလူၺ်ႈၸွမ်ၸိုင်ႈၼၼ်ႉသေ မၼ်းၸၢႆးတွပ်ႇလၢတ်ႈဝႃႈ “ မၼ်းၸၢႆးပဵၼ် ၶႃႈႁၢပ်ႇၵၢၼ်ဝၢၼ်ႈမိူင်း(ၶႃႈႁၢပ်ႇၵၢၼ်ၶုၼ်) လႄႈ ၶႆႈပဵၼ်ၸွမ်ၸိုင်ႈဢိူဝ်ႈ- ၼႆတႄႉဢမ်ႇၸၢင်ႈလၢတ်ႈဢွၵ်ႇပၢၵ်ႇ။ ၾၢႆႇၼိုင်ႈမၼ်းၸၢႆးဢမ်ႇၸႂ်ႈၽူႈၼမ်းပႃႇတီႇၵၢၼ်မိူင်းလႄႈ ဢမ်ႇၸၢင်ႈလၢတ်ႈသင်။ ပေႃးပၢင်လိူၵ်ႈတင်ႈယဝ်ႉတူဝ်ႈႁေ မီးသၽႃးမႃးၸင်ႇ သၽႃးတေလိူၵ်ႈ ၸွမ်ၸိုင်ႈၵူၺ်း” – ဝႃႈၼႆ။
“တလဵဝ်တႄႉ ပႆႇၸၢင်ႈလၢတ်ႈသင်။ ပေႃးသၽႃးလိူၵ်ႈၸွမ်ၸိုင်ႈမႃး ၸင်ႇၸၢင်ႈလၢတ်ႈၵႂႃႈ”- မိၼ်းဢွင်ႇလၢႆႇတွပ်ႇၵႂႃႇၼင်ႇၼႆ။
ႁူင်းတွတ်ႈၶႅပ်းၵၢင်ၸႂ် တီႈၸႄႈဝဵင်းၸေႇယႃႇသီႇရိ ၼႆႉ ပဵၼ်ႁူင်းတွတ်ႈၶႅပ်းၵၢင်ၸႂ်တွၼ်ႈတႃႇၸဝ်ႈသိုၵ်းၸဝ်ႈမင်းလႄႈႁူဝ်ပဝ်ႈဢိၵ်ႇၽူႈၼမ်းပႃႇတီႇသၢင်ႇသီႈမႃးပၢၼ်သိုပ်ႇပၢၼ်ၸဵမ်မိူဝ်ႈပၢင်လိူၵ်ႈတင်ႈတီႊမူဝ်ႊၶရေႊသီႊ ပၢၼ်ၸွမ်သိုၵ်းတဵင်းသဵင်ႇပုၼ်ႉ။
တူဝ်ႁူဝ်ပဝ်ႈပႃႇတီႇသၢင်ႈသီႈ – ဢူးၶိၼ်ႇယီႇ ၼၼ်ႉတႄႉ ၶဝ်ႈၶႄႉၶႅင်ႇတီႈၼင်ႈသၽႃးၵူၼ်းမိူင်း ပႃႇတီႇသၢင်ႇသီႈ။
တွၼ်ႈတႃႇၸႄႈဝဵင်းၸေႇယႃႇသီႇရိ ဝဵင်းၽူႈၼမ်းၸိၵ်းၸွမ်သိုၵ်းမၢၼ်ႈၶဝ်ယူႇသဝ်းၼႆႉတႄႉ ဢၼ်ၶဝ်ႈၶႄႉၶႅင်ႇပၢင်လိူၵ်ႈတင်ႈပဵၼ် ၽူႈၼမ်းၸၼ်ႉသုင်ၼႂ်းတပ်ႉသိုၵ်း ၵူႈသိုပ်ႇၵူႈပၢၼ်။ မိူၼ်ၼင်ႇ ၽွင်းပၢၼ် 2010 ၼၼ်ႉပဵၼ်တူႇရဢူးသူၺ်ႇမၢၼ်း ၽွင်းပီ 2015 သမ်ႉပဵၼ် ဢူးလႃႉထေးဝိၼ်း ပဵၼ်ၸွမ်သိုၵ်းလူင်ၼႂ်းတပ်ႉသိုၵ်း။ ၽွင်းပီ 2020 သမ်ႉပဵၼ် ႁူဝ်ပဝ်ႈပႃႇတီႇသၢင်ႇသီႈ ဢူးတၢၼ်းထေး ၵေႃႉၶဝ်ႈၶႄႉၶႅင်ႇ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ