ဝၼ်းတီႈ 28/12/2025 ၼႆႉ ပဵၼ်ဝၼ်းဢၼ်သိုၵ်းမၢၼ်ႈပိုတ်ၽၢဝ်ႇမၵ်းမၼ်ႈ တႃႇလိူၵ်ႈတင်ႈပွၵ်ႈၵမ်းၼိုင်ႈ  ၼႂ်းၼၼ်ႉ ပႃးၸႄႈဝဵင်းမိူင်းသၢတ်ႇၸိုင်ႈတႆးပွတ်းဢွၵ်ႇဝႃႈၼႆသေတႃႉ ၵူၼ်းမိူင်းသၢတ်ႇပႆႇတူင်ႉပႆႇတိုၼ်ႇ ပႆႇသူၼ်ၸႂ်သင်ဝႃႈၼႆ ။

ႁူင်းတွတ်ႈၶႅပ်းၵၢင်ၸႂ် ၼႂ်းၸႄႈဝဵင်းမိူင်းသၢတ်ႇၼႆႉ မီးဝႆႉ 70 တီႈ ၊ ၵမ်ႈၼမ်တႄႉ ၸတ်းၸွမ်း ႁူင်းႁဵၼ်း လႄႈ လုမ်းၽူႈၵွၼ်းဢိူင်ႇၽႂ်မၼ်း ၼႆ ၽူႈလႆႈၸွႆႈႁၢင်ႈႁႅၼ်းပၢင်လိူၵ်ႈတင်ႈၵေႃႉၼိုင်ႈလၢတ်ႈၼင်ႇၼႆ။

ပၢင်လိူၵ်ႈတင်ႈတီႈမိူင်းသၢတ်ႇၵမ်းၼႆႉ  ပႃႇတီႇဢၼ်တေၶဝ်ႈလိူၵ်ႈတင်ႈၵေႃႈ ဢမ်ႇႁၼ်တူင်ႉတိုၼ်ႇ ႁႃသဵင် တႄႉတႄႉဝႃႈဝႃႈ ၊ ၽူႈလႂ်ၽႂ် တေပဵၼ်ၼေႃႇၽူႈတႅၼ်းၼႆၵေႃႈ ၵူၼ်းမိူင်းဢမ်ႇႁူႉတႅတ်ႈတေႃး ။ ပေႃးဢမ်ႇၵႂႃႇသႂ်ႇသဵင်ၵေႃႈ သမ်ႉလႆႈၵူဝ်ဢမ်ႇမီးလွင်ႈႁူမ်ႇလူမ်ႈဝၢႆးပၢင်လိူၵ်ႈတင်ႈ ဝႃႈၼႆ။

ၵဵဝ်ႇလူၺ်ႈလွင်ႈၼႆႉ  ၵူၼ်းပိုၼ်ႉတီႈလၢတ်ႈတီႈၽူႈတွႆႇႁွၵ်ႈဝႃႈ  – “ ပေႃးဢမ်ႇၵႂႃႇ တေမၢပ်ႇတေမႂ်ၼႆတႄႉၵေႃႈ ၶဝ်ဢမ်ႇဝႃႈၼင်ႇၵဝ်ႇ ။ ၵူၺ်းၵႃႈ ၽူႈယႂ်ႇဝၢၼ်ႈၶဝ်ဝႃႈတႄႉ ယႃႇပေႇႁဵတ်းႁႂ်ႈ ႁူဝ်ၼႃႈပျီႇတူႉၸိတ်ႉၼႂ်းဝၢၼ်ႈၼႂ်းၶူင်ႇ လႆႈလိူတ်ႈလႆႈမႆႈၸွမ်း ဝႃႈၼႆၵူၺ်းဢေႃႈ။ သင်ဝႃႈ ပၢင်လိူၵ်ႈတင်ႈၼႆႉ ဢမ်ႇပဵၼ်ၵႂႃႇၸွမ်းၼင်ႇၵၢင်ၸႂ်ၶဝ်ၶႂ်ႈပဵၼ်ၼႆ ဢၼ်တေလႆႈလိူတ်ႇမႆႈၼႆႉ ပဵၼ်ပျီႇတူႉၸိတ်ႉၼႂ်းဝၢၼ်ႈ လႄႈ ၽူႈၵွၼ်းဢိူင်ႇၶဝ် ၼႆၶႃႈဢေႃႈ ” –  ဝႃႈၼႆ။

ပႃႇတီႇဢၼ် တေၶဝ်ႈလိူၵ်ႈတင်ႈၼႂ်းၸႄႈဝဵင်းမိူင်းသၢတ်ႇၼႆႉ မီး 4 ပႃႇတီႇ ပဵၼ်ပႃႇတီႇသၢင်ႇသီႈ USDP ၊ ပႃႇတီႇသိူဝ်ၽိူၵ်ႇ SNDP ၊ ပႃႇတီႇမုၼ်းလႅင်းၶိုၼ်ႈယႂ်ႇဢႃးၶႃႇလႄႈ ပႃႇတီႇ တစည တိုင်းရင်းသားစည်းလုံးညီညွတ်ရေး ၸိူဝ်းၼႆႉ။

မီးပႃႇတီႇတေလူင်းလိူၵ်ႈတင်ႈယူႇသေတႃႉ ၵူၼ်းမိူင်းတႄႉ ဢမ်ႇသူၼ်ၸႂ် ၊ ၵူၺ်းၵႃႈ ပွတ်းၼႂ် ဝၼ်းတီႈ 27/12/2025 ၼႆႉတႄႉ ၵႃးသိုၵ်းမၢၼ်ႈပၼ်ႇလဵပ်ႈၸွမ်းတႃႈၸွမ်းတၢင်း ဢမ်ႇယွမ်း 30 လမ်းၼႆႉ ၼုမ်ႇၸၢႆးမိူင်းသၢတ်ႇၵေႃႉၼိုင်ႈလၢတ်ႈ တီႈၽူႈတွႆႇႁွၵ်ႈၼင်ႇၼႆ  –

“  မိူဝ်ႈၼႆႉၵၢင်ၼႂ်တႄႉ လႆႈႁၼ်ၵႃးသိုၵ်းမၢၼ်ႈ လႄႈ ၵႃးပျီႇတူႉၸိတ်ႉၶဝ်ၸိူဝ်းၼႆႉ ယႆၵၼ်ၵႂႃႇမွၵ်ႈ 30 လမ်းၼႆႉ။ လဵပ်ႈဝဵင်းၵႂႃႇမႃးယူႇၸွမ်းတၢင်းၶႃႈဢေႃႈ။ ဢမ်ႇႁူႉဝႃႈ ၸွင်ႇမၼ်းၵဵဝ်ႇၵၼ်တင်းပၢင်လိူၵ်ႈတင်ႈ။ ၵွၼ်ႇၼႃႈၼႆႉၵေႃႈ ဢမ်ႇႁၼ်ၶဝ်ၾၢင်ႉသင်ဝႆႉတႄႉတႄႉၼင်ႇၵဝ်ႇ ။ ၸိုဝ်ႈၶႃႈ ယင်းပႆႇၵႂႃႇတူၺ်းၵွၼ်ႇ ယင်းဢမ်ႇႁူႉဝႃ ၶဝ်ပႃႉဝႆႉတီႈလႂ်  ” – ဝႃႈၼႆ။

ၵူၼ်းၸိူဝ်းပဵၼ်ၶႃႈႁၢပ်ႇၵၢၼ်ၶုၼ်လႄႈ ၵူၼ်းၸိူဝ်းလူဝ်ႇၸွႆႈၵၢၼ်ၼႂ်းႁူင်းတွတ်ႈၶႅပ်းၵၢင်ၸႂ်တႄႉ ႁႂ်ႈတွတ်ႈလူင်ႈၼႃႈ မိူဝ်ႈဝၼ်းတီႈ 18/12/2025 ၼၼ်ႉၼႆယဝ်ႉ။

ပၢင်လိူၵ်ႈတင်ႈ ပွၵ်ႈၵမ်းၼိုင်ႈၼႆႉ မိူင်းတႆးပွတ်းဢွၵ်ႇၶူင်း ပႃးဝႆႉ 3 ဝဵင်း ပဵၼ်ဝဵင်မိူင်းသၢတ်ႇ ဝဵင်းတႃႈၶီႈလဵၵ်းလႄႈ ဝဵင်းၵဵင်းတုင် ။ တႃႇလိူၵ်ႈတင်ႈ ၵိုတ်းဝၼ်းၼိုင်ႈၵူၺ်းသေတႃႉ ဝဵင်းလႂ်ၵေႃႈ ဢမ်ႇတူင်ႉဢမ်ႇတိုၼ်ႇ သဵၼ်ႈၸိုဝ်ႈၸဝ်ႈၵဝ်ႇယူႇလႂ် ယင်းပႆႇႁူႉ ၼႆ ၵူၼ်းပိုၼ်ႉတီႈလၢတ်ႈ။

တီႈမိူင်းသၢတ်ႇၼႆႉ တႄႇဢဝ်ပၢင်လိူၵ်ႈတင်ႈ 2010 မႃးတေႃႇထိုင် ပၢင်လိူၵ်ႈတင်ႈ 2020 ၼၼ်ႉ တင်း 3 ၵမ်းၼႆႉ ပႃႇတီႇသၢင်ႇသီႈ ဢွင်ႇပေႉၵိၼ်ၶၢတ်ႇမူတ်း။