ပလိၵ်ႈသိုၵ်းမၢၼ်ႈ တီႉၺွပ်းၵူၼ်းမိူင်းယွင်း ၸိုင်ႈတႆးပွတ်းဢွၵ်ႇ 2 ၵေႃႉ လူၺ်ႈတၢင်းၽိတ်း  တေႃႉတၢင်ႇၶူဝ်းၵုၼ်ႇ မိူင်းၶႄႇ လႄႈ ႁေႃႈၵႃး ဢမ်ႇမီးဝတ်းဝႂ်   ။

ၼႂ်းႁူဝ်လိူၼ် တီႊသႅမ်ႊပိူဝ်ႊၼၼ်ႉ ၸဝ်ႈၵႃးတၢင်ႇၶူဝ်းၵုၼ်ႇ ၵူၼ်းမိူင်းယွင်း 2 ၵေႃႉ  ၵႂႃႇတၢင်ႇၶိူဝ်းၵုၼ်ႇတၢင်းမိူင်းၶႄႇသေပွၵ်ႈမႃးၶိုၼ်း  မိူင်းယွင်းၼၼ်ႉ ထုၵ်ႇပလိၵ်ႈမၢၼ်ႈ ၵူတ်ႇထတ်းတီႉၺွပ်း  ဢဝ်လိူင်ႈလူၺ်ႈ  တေႃႉတၢင်ႇၶူဝ်းၵုၼ်ႇ မိူင်းၶႄႇ လႄႈ ႁေႃႈၵႃး ဢမ်ႇမီးဝတ်းဝႂ် ၊ ၸႂ်ႉၵူၼ်းတီႈႁိူၼ်းဢဝ်ငိုၼ်း ၵႂႃႇထုၵ်ႇတူဝ်ႇၶိုၼ်း ၼႆယဝ်ႉ။

ၼၢင်းယိင်းၼႂ်းပိုၼ်ႉတီႈလၢတ်ႈၽူႈတွႆႇႁွၵ်ႈဝႃႈ -“ ၺႃးၵူတ်ႇထတ်း ၾူၼ်ႊ(မိုဝ်းထိုဝ်)လႄႈ ၵႃး တီႈၶူဝ်မိူင်းယူႉ ၶဝ်ဢဝ်ၵွင်ႈၸမ်ႈၼႃႈၽၢၵ်ႇသေ လွၵ်ႇငိုတ်ႈလၢတ်ႈဝႃႈ ပေႃးလၢတ်ႈၵႂၢမ်း ၼမ်တေယိုဝ်းတၢႆၼႆ။ ၼႂ်းၾူၼ်ႊ(မိုဝ်းထိုဝ်)တႄႉဢမ်ႇမီးသင်လၢတ်ႈဝႃႈ တီႉၺွပ်းယွၼ်ႉႁေႃႈၵႃးဢမ်ႇမီးဝတ်းဝႂ်  ၊ သမ်ႉတၢင်ႇ ၶူဝ်းၵုၼ်ႇမိူင်းၶႄႇ (ၶႆႈၵႆႇ)  မႃးၼႆ”- ဝႃႈၼႆ ။ 

ဝၢႆးတီႉၺွပ်းယဝ်ႉ ပလိၵ်ႈမၢၼ်ႈ ဢဝ်လိူင်ႈလူၺ်ႈတၢင်းၽိတ်း ႁေႃႈရူတ်ႉၵႃး ဢမ်ႇမီးဝႂ် လၢႆႊသိၼ်ႊလႄႈ တၢင်ႇၶူဝ်းၵုၼ်ႇ မိူင်းၶႄႇ ။ ၵူၼ်းတီႈႁိူၼ်းလႆႈဢဝ်ငိုၼ်းၵႂႃႇထုတ်ႇၶိုၼ်း ။  ၵႃးလႄႈ ၶႆႇဢၼ်တၢင်ႇမႃးတႄႉ ပလိၵ်ႈသိုၵ်းမၢၼ်ႈယိုတ်းပႅတ်ႈ  လႆႈႁူႉၼင်ႇၼႆ ။  

ၵူၼ်းၸၢႆးသွင်ၵေႃႉဢၼ်ပလိၵ်ႈသိုၵ်းမၢၼ်ႈတီႉၺွပ်းၼၼ်ႉ ပဵၼ်ၵူၼ်းၵႃႉၶူဝ်းၵုၼ်ႇမိူင်းယွင်း ဢႃယု သႅၼ်းပၢၼ် ၼႂ်းၵႄႈ 30 -35 ပီ ။ ယွၼ်ႉတေႃႉတၢင်ႇၶူဝ်းၵုၼ်ႇမိူင်းၶႄႇမႃးလႄႈ လႆႈပၼ်ငိုၼ်း ၼိုင်ႈၵေႃႉ 50 သႅၼ်ထိုင် 70 သႅၼ်ပျႃး   – ၵူၼ်းပိုၼ်ႉတီႈလၢတ်ႈ ။

မၼ်းၼၢင်းသိုပ်ႇလၢတ်ႈထႅင်ႈဝႃႈ -“ ၼႂ်းသွင်ၵေႃႉၼၼ်ႉ ၵေႃႉၼိုင်ႈတႄႉမီးဝႂ်လၢႆႊသိၼ်ႊယူႇ တေႃႉမႃးၶႆႇၵႆႇ 15 တိူၵ်ႈၼႆလႄႈ လႆႈပၼ်ငိုၼ်းထုၵ်ႇတူဝ်ၶိုၼ်း 50 သႅၼ်ပျႃး ၊ ထႅင်ႈၵေႃႉၼိုင်ႈတႄႉ ဝႂ်လၢႆႊသိၼ်ႊၵေႃႈ ဢမ်ႇမီး တေႃႉမႃးၶႆႇ 50 တိူၵ်ႈ လႄႈ လႆႈပၼ်ငိုၼ်း 70 သႅၼ်ပျႃး ထုၵ်ႇတူဝ်မႃးၶိုၼ်းလႆႈ ၵႃးတႄႉဢမ်ႇလႆႈၶိုၼ်း လႆႈပွႆႇသုမ်းၸိူင်ႉၼၼ်”- ဝႃႈၼႆ ။

တႄႇဢဝ် မိူဝ်ႈၵၢင်လိူၼ်ဢေႃႊၵတ်ႉသ်မႃး ႁွင်ႈၵၢၼ်ၾၢႆႇၵုမ်းၵမ် ၵၢၼ်ငိုၼ်းၼွၵ်ႈမိူင်း ဢၼ်ယူႇတႂ်ႈသိုၵ်းမၢၼ်ႈ ပိုၼ်ၽၢဝ်ႇႁေႉႁၢမ်ႈ ၶူဝ်းၵုၼ်ႇ၊ ၶဝ်ႈၼမ်ႉတၢင်းၵိၼ် ပႃးၸဵမ်ၶိူင်ႈၾႆးၾႃႉ ဢၼ်လုၵ်ႉၼွၵ်ႈမိူင်းၶဝ်ႈမႃး တႃႇ 35 မဵဝ်းဝႆႉဝႃႈၼႆ ။

ၶႆႇဢၼ်ၸဝ်ႈၵႃးတေႃႉမႃးၼၼ်ႉပလိၵ်ႈသိုၵ်းမၢၼ်ႈသိမ်းဢဝ်ဝႆႉမူတ်း ၊ ၶႆႇၼိုင်ႈတိူၵ်ႈ မီး 360 လုၵ်ႈ ၊ ၵိုင်ႇငိုၼ်း 220 ယႂၼ်ႊ ၊ မႅၼ်ႈငိုၼ်းမၢၼ်ႈ 145000 ပျႃး ။ ၶႆႇ50 တိူၵ်ႈ ၼၼ်ႉသုမ်းၵႂႃႇၵိုင်ႇငိုၼ်းမၢၼ်ႈ  70 သႅၼ်ပျႃး ။

ၶူဝ်းၵုၼ်ႇၼွၵ်ႈမိူင်းဢၼ်သိုၵ်းမၢၼ်ႈဢမ်ႇပၼ်ဢဝ်ၶၢမ်ႈလႅၼ်လိၼ်ၶဝ်ႈမႃးၼႂ်းမိူင်းတႆးပွတ်းၸၢၼ်းၼႆႉတႄႉပဵၼ်မိူၼ်ၼင်ႇ – ၶႅပ်းတိၼ်၊ မၼ်းမၢၵ်ႇပၢဝ်ႉ(ဢူင်းၼူဝ်ႉ)၊ မၢၵ်ႇထၢၼ်ႇ – ပႅတ်ႇထရီႇ၊ တဵၼ်းႁွမ်၊ သၢတ်ႇ၊ ၶဝ်ႈသွႆး – ၵျႃႇသၢၼ်ႇႁႅင်ႈ၊ ယၢင်မၢၵ်ႇၵႃး၊ လုၵ်ႈဢူမ် (မၢၵ်ႇၸဵမ်းသူမ်ႈ)၊ ၶဝ်ႈမုၼ်းပီႊသၵိတ်ႉ၊ ၼမ်ႉၸၢင်ႇ(ပႄးငၢၼ်ႇပျႃႇယေႇ)၊ မဵတ်ႉၵႃႇၽီႇ၊ ၽွင်ၵႃႇၽီႇ ၊ ၼဵင်ႈႁႅင်ႈ၊ ၽႃႈဢွမ်ႈၵူၼ်းလူင်၊ ၼမ်ႉမၼ်းၸၢၵ်ႈ ဢိၼ်ႊၵျိၼ်ႊဝၢႆႊ၊ မၢၵ်ႇၾႆးလွတ်ႇၾႆး၊ ၼမ်ႉၼူမ်း ၊ ပုင်းၵေႃႇ သွင်းသႃႉၵေႃႇ၊ လိၼ်ပုၼ် ၽိလပ်ႉမျေႇမိူင်းထႆး ၸဵမ်ၸိူဝ်းၼႆႉ။

ၼၢင်းယိင်း ၵူၼ်းၵႃႉ ယူႇမိူင်းယွင်းလၢတ်ႈဝႃႈ -“ ရူတ်ႉၵႃးမိူင်းၶႄႇတၢင်ႇၵုၼ်ႇမႃးၶၢႆသမ်ႉလႆႈယူႇ ၊ ရူတ်ႉၵူၼ်းမိူင်းႁဝ်းၵႂႃႇတၢင်ႇၵုၼ်ႇမႃး ၶၢႆသမ်ႉဝႃႈ ဢမ်ႇလႆႈဝႃႇ  ၊ ၵႃးတင်းမိူင်းၶႄႇၼႆႉ တၢင်ႇၵုၼ်ႇ မႃးၶၢႆယူႇတင်းႁဝ်းၼႆႉၵူႈဝၼ်း ၊ ၵူၼ်းၵႃႉၵူၼ်းၶၢႆၵေႃႈ ဢမ်ႇပဵၼ်ၵၢၼ် ဢမ်ႇလႆႈၼမ်ႉမျႅတ်ႈၼမ်ႉတွၼ်းသင် လီသႅင်ႈၸႂ်ၼႃႇ ”- ဝႃႈၼႆ ။

မိူၼ်ၼင်ႇၼႆ ၼႂ်းဝၼ်းတီႈ 10/12/2025 ၼၼ်ႉၵေႃႈ ပလိၵ်ႈသိုၵ်းမၢၼ်ႈပႂ်ႉၵူတ်ႇထတ်းၵႃး ၸိူဝ်းဢမ်ႇမီးဝႂ်လၢႆႊသိၼ်ႊ ၸွမ်းၵဵတ်ႉလၢၼ်ႇ မိူင်းပွၼ်ၸိုင်ႈတႆးပွတ်းၸၢၼ်း တီႉၺွပ်းယိုတ်းဢဝ်ၵႃး ဢမ်ႇမီးဝတ်းဝႂ် လႄႈ ၵူၼ်း 20 ၵေႃႉ ဢဝ်လိူင်ႈဝႆႉလူၺ်ႈ တၢင်းၽိတ်း ႁေႃႈၵႃးဢမ်ႇမီးဝႂ်လၢႆႊသိၼ်ႊၼႆ လႆႈပၼ်ငိုၼ်းၼိုင်ႈၵေႃႉ 30 သႅၼ်ပျႃးထုတ်ႇတူဝ်ၶိုၼ်း။ ၵႃးတႄႉ ပလိၵ်ႈသိုၵ်းမၢၼ်ႈယိုတ်းပႅတ်ႈ ဝႃႈၼႆ ။

ၼႂ်းလိူၼ်မေႊ ဝၼ်းတီႈ 2 မိၼ်းဢွင်ႇလၢႆႇ ၸီႉသင် ႁႂ်ႈၵူတ်ႇထတ်းရူတ်ႉၵႃး ၸိူဝ်းဢမ်ႇလႆႈတၢင်ႇဝႆႉမၢႆၾၢင် (လၢႆႊ သိၼ်ႊ) ဝႆႉၸိူဝ်းၼၼ်ႉယဝ်ႉ ၶႃႈႁၢပ်ႇၵၢၼ်ၶုၼ်ၾၢႆႇၵဵဝ်ႇၶွင်ႈ လိုပ်ႈလမ်းတီႉၺွပ်းရူတ်ႉၵႃးသေ တေႃႇထိုင်ဝၼ်းမိူဝ်ႈၼႆႉ ပလိၵ်ႈသိုၵ်းမၢၼ်ႈ ၵူတ်ႇထတ်း ဝတ်းဝႂ်လၢႆႊသိၼ်ႊ မီးၸမ် 7လိူၼ်ယဝ်ႉ  ႁဵတ်းႁႂ်ႈၵူၼ်းၵႂႃႇမႃးယၢပ်ႇၽိုတ်ႇၵိၼ်းၸႂ်ၼႆယဝ်ႉ ။