မိူဝ်ႈဝၼ်းတီႈ 31/10/2025 သိုၵ်းမၢၼ်ႈယိုတ်းမိူင်း လႄႈ ၸုမ်းပလိၵ်ႈ တင်း ၶွမ်ႊမသျိၼ်ႊပၢင်လိူၵ်ႈတင်ႈ မိူင်းႁူမ်ႈတုမ် ၸတ်းႁဵတ်းပၢင်ၵုမ်ဢုပ်ႇဢူဝ်း တႃႇၵၢၼ်ႁၢင်ႈႁႅၼ်း လွင်ႈဢဝ်ႁူမ်ႇလူမ်ႈပၢင်လိူၵ်ႈတင်ႈ ။

ပၢင်ၵုမ်ၼၼ်ႉ ၸဵတ်းႁဵတ်းတီႈငဝ်ႈလုမ်းပလိၵ်ႈမိူင်းႁူမ်ႈတုမ် ဝဵင်းလူင်ၼေႇပျီႇတေႃႇ ၵေႃႇမတီႇငဝ်ႈငုၼ်းၾၢႆႇၸတ်းၵၢၼ်လွင်ႈႁူမ်ႇလူမ်ႈ ပၢင်လိူၵ်ႈတင်ႈ လၢတ်ႈၵႂႃႇဝႃႈ “ယၢမ်းလဵဝ် တီႉၺွပ်းဝႆႉၵူၼ်းၸိူဝ်း ၽိတ်း ပၵ်းပိူင်ၾိင်ႈမိူင်း ပၢင်လိူၵ်ႈတင်ႈ ၼႂ်းၸႄႈတိူင်း လႄႈ ၸႄႈမိူင်း ပတ်းပိုၼ်ႉမိူင်းႁူမ်ႈတုမ်ၼႆႉ တင်းမူတ်းမီး 88 ၵေႃႉ။ လႆႈပိုတ်ႇလိူင်ႈဢဝ်တၢင်းၽိတ်းဝႆႉ ၼႂ်းႁူဝ်ၶေႃႈ – တင်ႈၸႂ်သူၼ်းသေႃႇယႃႉၵဝ်းပၢင်လိူၵ်ႈတင်ႈလူႉ။ ပဵၼ် ၸၢႆး 83 ၵေႃႉ ယိင်း 5 ၵေႃႉ” – ဝႃႈၼႆ။

ၵူၼ်းၸိူဝ်းၺႃးတီႉၺွပ်း ဢဝ်လိူင်ႈဝႆႉတႂ်ႈ “ပၵ်းပိူင်ဢၼ်ၵႅတ်ႇၵႅင်ႈလွင်ႈယႃႉၵဝ်းပၢင်လိူၵ်ႈတင်ႈ ပႃႇတီႇၸုမ်ႇၵူႈ” တႃႇ 88 ၵေႃႉၼႆႉ ပဵၼ်သဵၼ်ႈမၢႆ တေႃႇထိုင် ဝၼ်းတီႈ 29/10/2025 ၵူၺ်း – ဝႃႈၼႆ။

လႆႈႁူႉဝႃႈ ၾၢႆႇၸတ်းၵၢၼ်လွင်ႈႁူမ်ႇလူမ်ႈ ပၢင်လိူၵ်ႈတင်ႈၶဝ် တေသိုပ်ႇႁဵတ်းသၢင်ႈၵၢၼ်တီႉၺွပ်း လႄႈ ဢဝ်လိူင်ႈ ၵူၼ်းၸိူဝ်းသူၼ်းသေႃႇ ယႃႉၵဝ်းပၢင်လိူၵ်ႈတင်ႈ လူၺ်ႈလၢႆးတၢင်း ဢုပ်ႇလၢတ်ႈ၊ လူင်းမိုဝ်းႁဵတ်းသၢင်ႈ၊ ထတ်းသၢင်၊ ပိုၼ်ၽႄႈတႃႇပၢင်လိူၵ်ႈတင်ႈလူႉၸိူဝ်းၼႆႉၵႂႃႇထႅင်ႈ တေႉတေႉဝႃႈဝႃႈ ၼႆယဝ်ႉ။

ၵၢၼ်ႁေႉၵၢင်ႈပၢင်လိူၵ်ႈတင်ႈၼႆႉ ၾၢႆႇၸုမ်းပလိၵ်ႈဢၼ်မီးတႂ်ႈၵုမ်းၵမ်ထၢၼ်ၽွင်းလူင်ၼႂ်း မိူင်းၶဝ် တေႁူမ်ႈမိုဝ်းၵၼ်တင်း သိုၵ်းမၢၼ်ႈ၊ ၸုမ်းပျီႇတူႉၸိတ်ႉ၊ ၸုမ်းၽဵဝ်ႈမူၺ်ႉလွင်ႈၵေႃႇၵၢၼ်ႁၢႆႉ လႄႈ ဢဝ်ႁူမ်ႇလူမ်ႈၵူၼ်းမိူင်း ။ တေဢဝ်လွင်ႈၵၢၼ်ၵႅတ်ႇၶႄပၢင်လိူၵ်ႈတင်ႈၼႆႉ ဝႆႉပဵၼ်လွင်ႈယႂ်ႇသေ တေ ၵူတ်ႇထတ်းၵႂႃႇၼၵ်းၼၵ်းၼႃၼႃ ဝႃႈၼႆ။

ပၢင်လိူၵ်ႈတင်ႈၼႆႉ သိုၵ်းမၢၼ်ႈ တေၼမ်းၸတ်းႁဵတ်းၼႂ်းႁၢင်ပီ 2025 လႄႈ ႁူဝ်ပီ 2026 ။ တေၸတ်းႁဵတ်းၵႂႃႇ သၢမ်တွၼ်ႈ။ တွၼ်ႈၼိုင်ႈ တေႁဵတ်းၼႂ်းဝၼ်းတီႈ 28/12/2025 တႃႇ 102 ၸႄႈဝဵင်း၊ တွၼ်ႈသွင် တေၸတ်းႁဵတ်းၼႂ်းဝၼ်းတီႈ 11/1/2026 တႃႇ 100 ၸႄႈဝဵင်း။ တွၼ်ႈသၢမ်တႄႉ ၾၢႆႇသိုၵ်းမၢၼ်ႈ လႄႈ ၶွမ်ႊမသျိၼ်ႊပၢင်လိူၵ်ႈတင်ႈမိူင်းႁူမ်ႈတုမ် ပႆႇပိုၼ်ၽၢဝ်ႇဢွၵ်ႇပဵၼ်တၢင်းၵၢၼ်။

ၾၢႆႇၶွမ်ႊမသျိၼ်ႊပၢင်လိူၵ်ႈတင်ႈမိူင်းႁူမ်ႈတုမ်ပိုၼ်ၽၢဝ်ႇဢွၵ်ႇဝႆႉထႅင်ႈဝႃႈ – သဵၼ်ႈမၢႆလွင်ႈပေႉ၊ လွင်ႈသုမ်းၶွင် ၼေႃႇၽွင်းတႅၼ်း ၸိူဝ်းၶဝ်ႈပၢင်လိူၵ်ႈတင်ႈၼၼ်ႉ ပေႃးၸတ်းပၢင်လိူၵ်ႈတင်ႈယဝ်ႉတူဝ်ႈလီငၢမ်းၵႂႃႇ တင်းသၢမ်တွၼ်ႈၸင်ႇပိုၼ်ၽၢဝ်ႇဢွၵ်ႇပၼ် ပဵၼ်တၢင်းၵၢၼ် ဝႃႈၼႆဝႆႉ။
ၸွမ်းၼင်ပိူင်ငဝ်ႈပိုင်းမိူင်း 2008 ဢၼ်သိုၵ်းမၢၼ်ႈတမ်းဝၢင်းၸတ်းႁဵတ်းဝႆႉၼႆႉ တႄႇၼပ်ႉဢဝ်ဝၼ်းႁဵတ်း ပၢင်လိူၵ်ႈတင်ႈယဝ်ႉ ႁိုင် 90 ဝၼ်း၊ တေလႆႈတႄႇလုမ်းသၽႃးသေ ႁွင်ႉဢဝ် ၼေႃႇၽွင်းတႅၼ်းတင်းသဵင်ႈ ၶဝ်ႈႁဵတ်းပၢင်ၵုမ်ၵႂႃႇၵမ်းသိုဝ်ႈ။

ၵဵဝ်ႇလူၺ်ႈပၢင်လိူၵ်ႈတင်ႈၼႆႉသေ ၽူႈၼမ်းၼႂ်းလူင် ၸၢတ်ႈၸိုင်ႈလုမ်ႈၾႃႉ Antonio Guterrus ၵေႃႈ ယၢမ်ႈတူၵ်ႇတၵ်ႉလၢတ်ႈလွင်ႈပၢင်လိူၵ်ႈတင်ႈဢၼ်သိုၵ်းမၢၼ်ႈယိုတ်းမိူင်း တေၸတ်းႁဵတ်းၼႆႉဝႃႈ “ဢမ်ႇမီး ၵူၼ်း ယုမ်ႇယမ်ဝႃႈ ပၢင်လိူၵ်ႈတင်ႈၵမ်းၼႆႉ တေၽဵင်ႇပဵင်း ပဵၼ်ထမ်း ” -ဝႃႈၼႆ။

ပၢင်လိူၵ်ႈတင်ႈဢၼ်တေၸတ်းႁဵတ်းၼႂ်းမိူင်းႁူမ်ႈတုမ်ၼႆႉ ဢမ်ႇၸႂ်ႈသဵၼ်ႈတၢင်းဢွၵ်ႇ တႃႇႁႃၶေႃႈတွပ်ႇၵၢၼ်မိူင်း – မၼ်းၸၢႆးတၵ်ႉၼၢႆဝႆႉပႃးၼင်ႇၼႆ။