မိူဝ်ႈဝၼ်းတီႈ 26/12/2025 ၸုမ်းပၵ်းတႃပႂ်ႉတူၺ်းပၢင်လိူၵ်ႈတင်ႈ မိူင်းရတ်ႉသျႃႊ၊ မိူင်း ၶႄႇ၊ မိူင်းဢိၼ်ႊတီးယိူဝ်ႊ၊ မိူင်းၵႃႊသတၼ်ႊ၊ မိူင်းၵမ်ႊပူႊၶျႃႊ လႄႈ မိူင်းဝႅတ်ႉၼမ်း၊ မိူင်းပႄႊလႃႊရုတ်ႉသ်ၶဝ် ႁွတ်ႈၽႅဝ်ဝႆႉတီႈဝဵင်းတႃႈၵုင်ႈ တႃႇမႃးပႂ်ႉတူၺ်းၸွမ်း ငဝ်းလၢႆးပၢင်လိူၵ်ႈတင်ႈ ဢၼ်သိုၵ်း မၢၼ်ႈယိုတ်း မိူင်းတေၸတ်းႁဵတ်း ၼႆယဝ်ႉ။
တူဝ်တႅၼ်းၸိုင်ႈမိူင်းရတ်ႉသျႃႊ ပဵၼ် Mr.Kara-ool Sholban ၼမ်းၼႃႈမႃး၊ တူဝ်တႅၼ်းၸိုင်ႈ မိူင်းၶႄႇ ပဵၼ် တဵင်ႉသျီႊၵျွၼ်ႊ ၽူႈတႅၼ်းၶိုၵ်ႉတွၼ်း ၽွင်းလူင်ၾၢႆႇၼွၵ်ႈမိူင်းမိူင်းၶႄႇ၊ တူဝ်တႅၼ်း မိူင်းဢိၼ်ႊတီႊယိူဝ်ႊပဵၼ် Former Army Commander Mr.Sahni Arun Kumar၊ တူဝ်တႅၼ်းမိူင်းၵႃႊသတၼ်ႊ ပဵၼ် Deputy Chairman of the Commission Mr.Yerman Mukhtar၊ တူဝ်တႅၼ်းမိူင်းၵမ်ႊပူႊၶျႃႊ ပဵၼ် ၽူႈၶဝ်ႈၸုမ်း NEC – H.E. Mr. YICH Samethy လႄႈ တူဝ်တႅၼ်းမိူင်းဝႅတ်ႉၼမ်း ပဵၼ် Mr.Nguyen Duc Thinh ဢွၼ် ဢဝ် ၽူႈၶဝ်ႈၸုမ်းလၢႆလၢႆၵေႃႉ မႃးတီႈမိူင်းႁူမ်ႈတုမ် ၼႆယဝ်ႉ။
လိူဝ်ၼၼ်ႉ ၶွမ်ႊမသျိၼ်ႊၵမ်ၵၢၼ်ပၢင်လိူၵ်ႈတင်ႈမိူင်းႁူမ်ႈတုမ် တႂ်ႈဢၢမ်းၼၢတ်ႈ သိုၵ်းမၢၼ်ႈ ယိုတ်း မိူင်း ယင်းပိုၼ်ၽၢဝ်ႇဢွၵ်ႇဝႃႈ ၸုမ်းသိုဝ်ႇၶၢဝ်ႇ မိူင်းၼွၵ်ႈ ၸိူဝ်းတၢင်ႇသဵၼ်ႈ ၸိုဝ်ႈမႃး တႃႇဢဝ်ၶၢဝ်ႇလွင်ႈပၢင်လိူၵ်ႈတင်ႈၼႆႉ တင်းသဵင်ႈမီး 61 ၸုမ်း၊ ၽူႈဢဝ်ၶၢဝ်ႇၼွၵ်ႈမိူင်းၼႂ်းမိူင်းမီး 215 ၵေႃႉ ၼႆယဝ်ႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ