ၸမ်ပၢင်လိူၵ်ႈတင်ႈမႃးလႄႈ သိုၵ်းမၢၼ်ႈတင်းပျီႇတူႉၸိတ်ႉ ႁူမ်ႈၵၼ်ၶဵင်ႈၶႅင်လွင်ႈ ႁူမ်ႇလူမ်ႈ တီႈဝဵင်းတူၼ်ႈတီး ၸိုင်ႈတႆးပွတ်းၸၢၼ်း ၼႂ်းၶၢဝ်းတၢင်း 2 ဝၼ်းၼႆႉၵူၼ်းႁၢႆ 5 ၵေႃႉယဝ်ႉ လႆႈႁူႉၼင်ႇၼႆ။  

ႁၢင်လိူၼ် တီႊသႅမ်ႊပိူဝ်ႊၼႆႉမႃး ပေႃးထိုင်ၶၢဝ်းယၢမ်းၵၢင်ၶမ်ႈမွၵ်ႈ 7-8 မူင်းမႃး သိုၵ်းမၢၼ်ႈ ဢဝ်ၵႃးသိုၵ်း 7-8 လမ်းပၼ်ႇလဵပ်ႈၼႂ်းပွၵ်ႉၼႂ်းၵိဝ်ႇ ၊ ပႂ်ႉၸွမ်းသီႇယႅၵ်ႈၾႆးၶဵဝ်လႅင်သေ ၵူတ်ႇထတ်းၵူၼ်းၵႂႃႇမႃး။ ၼႂ်းၶၢဝ်းတၢင်း 2 ဝၼ်းၼႆႉၵူၺ်း ၵူၼ်းႁၢႆဝႆႉ 5 ၵေႃႉၼႆ ၵူၼ်းပိုၼ်ႉတီႈလၢတ်ႈၼင်ႇၼႆ။  

ၵူၼ်း 5 ၵေႃႉ ဢၼ်ႁၢႆဝႆႉယူႇယၢမ်းလဵဝ်ၼႆႉ ပဵၼ်ၵူၼ်းၼႂ်းပွၵ်ႉသူၺ်ႇတွင်ႇ ၊ ၵၢၼ်ႇတႃႇ ၊  ၵျွင်းၵျီးသူႉ လႄႈ ဝၢၼ်ႈၽယႄး  ။ လႆႈႁူႉဝႃႈ ပဵၼ်လုၵ်ႈႁဵၼ်း 2 ၵေႃႉ ၊ ၵူၼ်းသႅၼ်းပၢၼ်ၵၢင် 3 ၵေႃႉ ။ ၼႂ်းၵူၼ်းသႅၼ်းၵၢင်ၼၼ်ႉ ပႃးၵူၼ်းပၢႆႈၽေးသိုၵ်း ၵေႃႉၼိုင်ႈ  ဝႃႈၼႆ ။   

ၼၢင်းယိင်းၼႂ်းပိုၼ်ႉတီႈလၢတ်ႈၽူႈတွႆႇႁွၵ်ႈဝႃႈ -“ ၵူၼ်းၼုမ်ႇၵႆႉႁၢႆၼႃႇ ၊ လႆႈႁူႉဝႃႈ ၼႂ်းၶၢဝ်းတၢင်းသွင်ဝၼ်းၼႆႉ ႁၢႆၸမ် 5 ၵေႃႉ ၊ မိူဝ်ႈဝၼ်းတီႈ24 ၵေႃႉ လုၵ်ႈဢွၼ်ႇၶိုၼ်ႈႁဵၼ်း Grade 10 ၵေႃႉဢဝ်ရူတ်ႉၶိူင်ႈဢွၵ်ႇၵႂႃႇသေ ထိုင်ဝၼ်းမိူဝ်ႈၼႆႉ ဢမ်ႇပႆႇႁၼ်ၶိုၼ်း ၊ ထုၵ်ႇတီႉၺွပ်းၵႂႃႇႁႃႉၵေႃႈဢမ်ႇႁူႉ ၊ ၵူၼ်းတီႈႁိူၼ်းတႄႉ ဢွၼ်ၵၼ်မႆႈၸႂ်ၵၼ်ႁႅင်းဝႆႉ”- ဝႃႈၼႆ ။

ၵဵဝ်ၵပ်းလွင်ႈၼႆႉယူႇတီႈ ၸုမ်းၶၢဝ်ႇၽူႈတွႆႇႁွၵ်ႈ တိုၵ်ႉၵပ်းသိုပ်ႇ တွင်ႈထၢမ် ႁူဝ်ယွႆႈမၼ်းဝႆႉထႅင်ႈယူႇ  ။

ၵူၼ်းၸၢႆးယူႇဝဵင်းတူၼ်ႈတီးလၢတ်ႈၽူႈတွႆႇႁွၵ်ႈဝႃႈ -“ ယွၼ်ႉၸမ်ပၢင်လိူၵ်ႈတင်ႈ မႃးလႄႈယူဝ်ႉ ပေႃးၵၢင်ၶမ်ႈမႃး ၸွမ်းၵၢင်ဝဵင်းၼႆႉ ႁၼ် ပလိၵ်ႈသိုၵ်းမၢၼ်ႈပႂ်ႉဢဝ်ႁူမ်ႇလူမ်ႈဝႆႉ ၊ ပေႃး 9 မူင်းပၢႆ ၼႆႉ ၶႅၼ်းၵူတ်ႇထတ်းႁႅင်း ၊ ပေႃးၵၢင်ၶမ်ႈၼႆႉဢမ်ႇၵႂႃႇလႂ်ၼႆႉလီသေပိူၼ်ႈယဝ်ႉ ၊ ၵူၼ်းႁဵတ်းၵၢၼ် ၵၢင်ၶမ်ႈ ၸိူဝ်းၼၼ်ႉၵေႃႈ မိူဝ်းႁိူၼ်းၸဝ်ႉၸဝ်ႉၼႆႉလီယဝ်ႉ”- ဝႃႈၼႆ ။

သိုၵ်းမၢၼ်ႈႁူမ်ႈပျီႇတူႉၸိတ်ႉပဢူဝ်း ဢဝ်ႁူမ်ႇလူမ်ႈ ၼႂ်းပိုၼ်ႉတီႈႁၢဝ်ႈႁႅင်းၼႆႉ ယၢမ်ႈမီးမႃး မိူဝ်ႈပီ 2021 -2022 ၼၼ်ႉၵူၺ်းသေ ၼႂ်းပီ2025 ၼႆႉပဵၼ်ပွၵ်ႈၵမ်းသွင် ၼႆယဝ်ႉ ။

ငဝ်းလၢႆးဝၢၼ်ႈမိူင်းဢမ်ႇလီၸိူင်ႉၼႆႉ လုၵ်ႈဢွၼ်ႇၸၢႆး လုၵ်ႈဢွၼ်ႇယိင်းၵေႃႈ မီးၽေးၼမ်၊ ၵႆႉႁၢႆ ၼႃႇ၊ ၽေးၵၢၼ်လၵ်ႉၵူၼ်း ၵႃႉၶၢႆၵူၼ်း ႁူၺ်းႁွင်ႉၵႂႃႇႁဵတ်းၵၢၼ်ၵျႃႊၽျႅၼ်ႉ၊ တီႉၺွပ်း ၵႂႃႇၾိုၵ်း ၵၢၼ်သိုၵ်း ၸဵမ် ၸိူဝ်းၼႆႉ။ ၵွပ်ႈၼႆ  ယူႇတီႈပေႃႈမႄႈၽူႈၵုမ်းတူၺ်းသေ ႁႂ်ႈၾၢင်ႉ လုၵ်ႈၽႂ်လၢင်းမၼ်းလီလီ  –ၵူၼ်းပိုၼ်ႉတီႈလၢတ်ႈၼင်ႇၼႆ ။

မိူၼ်ၼင်ႇၼႆ ၼႂ်းဝၼ်းတီႈ 11 လိူၼ် တီႊသႅမ်ႊပိူဝ်ႊၼႆႉ ၵူၼ်းပၢႆႈၽေးသိုၵ်း ယူႇဝဵင်းၾၢႆႇၶုၼ်  ပွၵ်ႈမိူဝ်းဢဝ် ၶဝ်ႈၵၢပ်ႇ တီႈႁိူၼ်း သေ မႃးၶိုၼ်း တီႈပၢင်သဝ်းၼၼ်ႉ ႁၢႆၵႂႃႇၵၢင်တၢင်း ၼႆယဝ်ႉ ။

ယၢမ်းလဵဝ်တီႈဝဵင်းတူၼ်ႈတီး ပလိၵ်ႈသိုၵ်းမၢၼ်ႈ ပႂ်ႉၵူတ်ႇထတ်း တီႈတၢင်း သီႇယႅၵ်ႈ ၾႆးၶဵဝ် ၾႆးလႅင် ၼႂ်းၵၢင်ဝဵင်းလႄႈ ၸွမ်း ၵဵတ်ႉလၢၼ်ႇ တၢင်း ၶဝ်ႈ ဢွၵ်ႇဝဵင်းတူၼ်ႈတီးၶိုၼ်းႁၢဝ်ႈႁႅင်း။   ပေႃးပဵၼ်ရူတ်ႉၵႃးဢမ်ႇမီးဝႂ် ၵူၼ်းၶပ်းဢမ်ႇမီးဝႂ်ၸိူဝ်းၼႆႉ  ယိုတ်းဢဝ်သေဢမ်ႇၵႃး လွၵ်ႇငိုတ်ႈပႃးဝႃႈ သင်မႃးထၢမ်ဢဝ်ငိုၼ်းထုတ်ႇဢဝ်ၶိုၼ်းၼႆၸိုင် တေတီႉၺွပ်းပႃးၸဝ်ႈၵႃးၼႆယဝ်ႉ ။