ၼႂ်းလိူၼ်တီႊသႅမ်ႊပိူဝ်ႊၼႆႉ သိုၵ်းမၢၼ်ႈယိုတ်းမိူင်း လွၵ်ႇငိုတ်ႈတေႃႇၵူၼ်းမိူင်း ၸိူဝ်းယူႇၼႂ်းပိုၼ်ႉတီႈ ၸႄႈဝဵင်းတၢင်ႉယၢၼ်း၊ ၸႄႈဝဵင်းမူႇၸေႊ ႁႂ်ႈၵႂႃႇပၼ်သဵင်ၵၢင်ၸႂ် ၼႂ်းဝၼ်း ပၢင်လိူၵ်ႈတင်ႈ ၼႆယဝ်ႉ။

ပၢင်လိူၵ်ႈတင်ႈဢၼ်သိုၵ်းမၢၼ်ႈတေၼမ်းၸတ်းၼႆႉ ၵူၼ်းမိူင်းၸိူဝ်းယူႇၼႂ်းမိူင်းတႆး ဢမ်ႇသူၼ်ၸႂ်။ ၶႃႈႁၢပ်ႇၵၢၼ်ၶုၼ်တႂ်ႈသိုၵ်းမၢၼ်ႈယိုတ်းမိူင်း ႁဵတ်းၽိုၼ်ၸေႈဢွၵ်ႇသေ ၵႂႃႇ တိတ်းဝႆႉသဵၼ်ႈၸိုဝ်ႈ ၵူၼ်းၸိူဝ်းတေလႆႈၵႂႃႇပၼ်သဵင် (တွတ်ႈမႄး) ယူႇသေတႃႉ ဢမ်ႇမီးၽႂ်ၵႂႃႇတူၺ်း။

ၸၢႆးဢွင်ႇ ၵူၼ်းမိူင်းၵေႃႉယူႇၼႂ်းၸႄႈဝဵင်းတၢင်ႉယၢၼ်း လၢတ်ႈၼႄတီႈၽူႈတွႆႇႁွၵ်ႈဝႃႈ “ ၽႂ်ပႆႇလႆႈသႂ်ႇၶႅပ်းၵၢင်ၸႂ်ၼႆ ၸွမ်းၵဵတ်ႉၼႆႉ ၶဝ်တေဢမ်ႇပၼ်ၶၢမ်ႈပူၼ်ႉ။ တေဢမ်ႇပၼ် ဢွၵ်ႇၶၢဝ်းတၢင်းၼႆ မီးလွင်ႈလွၵ်ႇငိုတ်ႈၸိူင်ႉၼႆဢေႃႈ” ဝႃႈၼႆ။

ၵၢၼ်လွၵ်ႇငိုတ်ႈႁႂ်ႈၵူၼ်းမိူင်းၵႂႃႇပၼ်သဵင် တွတ်ႈၶႅပ်းၵၢင်ၸႂ်ၼၼ်ႉ သိုၵ်းမၢၼ်ႈယိုတ်းမိူင်း ၸီႉသင်ႇလူင်းတီႈ ၶႃႈႁၢပ်ႇၵၢၼ်ၶုၼ် ၾၢႆႇၽွင်းငမ်း ၸႄႈဝဵင်းၶဝ် လၢတ်ႈႁႂ်ႈၽူႈၵွၼ်းပွၵ်ႉ၊ ၵွၼ်းဢိူင်ႇ (အုပ်ချုပ်ရေးမှူး) ၼႂ်းပိုၼ်ႉတီႈ ပိုၼ်ၽၢဝ်ႇဢွၵ်ႇၼႆ- လႆႈႁူႉၼင်ႇၼႆ။

သင်ၶေႃႈတွပ်ႇၵၢၼ်ဢွင်ႇပေႉ ပၢင်လိူၵ်ႈတင်ႈဢွၵ်ႇမႃးလႄႈ တၢင်းၼမ်ၶႅပ်းမႄး ၸုမ်းၼိုင်ႈလႄႈၸုမ်းၼိုင်ႈ ဢမ်ႇပေႃးပိူင်ႈၵၼ်ၸိုင် ၾၢႆႇၸဝ်ႈၼႃႈတီႈၶဝ် တေလူင်းၵူတ်ႇထတ်း ၶိုၼ်း သဵၼ်ႈၸိုဝ်ႈၵူၼ်းၼႂ်းပွၵ်ႉ ၼႂ်းဢိူင်ႇ ၸိူဝ်းၵႂႃႇပၼ်သဵင်ယဝ်ႉလႄႈ ပႆႇလႆႈၵႂႃႇပၼ်သဵင်ၼၼ်ႉထႅင်ႈ ၼႆယဝ်ႉ။

ၼၢင်းယိင်းဢႃႇယု 45 ပီ ၵေႃႉယူႇဝႆႉၼႂ်းၸႄႈဝဵင်းတၢင်ႉယၢၼ်း လၢတ်ႈၼႄတီႈၽူႈတွႆႇႁွၵ်ႈဝႃႈ “သင်ၸိူဝ်ႉဝႃႈမၼ်းပိူင်ႈၵၼ်ၵႂႃႇၶႅပ်းမႄး သွင်သၢမ်ၶႅပ်းၵူၺ်းၼႆ ၶဝ်တေမီးလွင်ႈလူင်း ၵူတ်ႇထတ်းတူၺ်း ၼႂ်းပွၵ်ႉ။ ၵေႃႉလႂ်၊ ၽႂ်လႂ်၊ ႁိူၼ်းလႂ် ပႆႇလႆႈၵႂႃႇတွတ်ႈၶႅပ်းၵၢင်ၸႂ်ၼႆ တေၺႃးဢဝ်လိူင်ႈၼႆဢေႃႈ” ဝႃႈၼႆ။

ပၢင်လိူၵ်ႈတင်ႈပွၵ်ႈၼႆႉ ယွၼ်ႉသိုၵ်းမၢၼ်ႈယိုတ်းမိူင်း တေဢွၼ်ၼမ်းၸတ်းသေ ဢမ်ႇပၼ်သုၼ်ႇလႆႈပႃႇတီႇ ၵၢၼ်မိူင်းၵူႈၸုမ်း ၶဝ်ႈႁူမ်ႈၸွမ်းလႄႈ ၵူၼ်းမိူင်းၸင်ႇဢမ်ႇသူၼ်ၸႂ် ၵူၺ်းဢမ်ႇၵႃး ဢမ်ႇယုမ်ႇယမ်ၼိူဝ်ပၢင် လိူၵ်ႈတင်ႈၼႆႉၼႆ – ၵူၼ်းၼုမ်ႇ ၵေႃႉတူင်ႉတိုၼ်ႇ ၼႂ်းမိူင်းတႆးပွတ်းႁွင်ႇ လၢတ်ႈဝႆႉ။

ၼႂ်းဝဵင်းမူႇၸေႊ ဢွင်ႈတီႈသိုၵ်းမၢၼ်ႈတေၸတ်းႁဵတ်းပၢင်လိူၵ်ႈတင်ႈၸုပ်ႈၼိုင်ႈၼၼ်ႉၵေႃႈ ယွၼ်ႉၵူၼ်းမိူင်း ပိုၼ်ႉတီႈဢမ်ႇသူၼ်ၸႂ်ၼိူဝ်ပၢင်လိူၵ်ႈတင်ႈလႄႈ သိုၵ်းမၢၼ်ႈလွၵ်ႇ ငိုတ်ႈတေႃႇၵူၼ်းမိူင်းဝႃႈ – ပေႃးဢမ်ႇၵႂႃႇ ပၼ်သဵင် (တွတ်ႈၶႅပ်းၵၢင်ၸႂ်) ၸိုင် တေဢမ်ႇႁဵတ်းဢွၵ်ႇပၼ်ပပ်ႉၶၢမ်ႈမိူင်းၶႄႇ- မိူင်းမၢၼ်ႈ ၸွမ်းလႅၼ်လိၼ် ၼႆယဝ်ႉ။

ၸွမ်းပိုၼ်ႉတီႈ ၼႂ်းပွၵ်ႉၼႂ်းယွမ်ႇ ၸႄႈဝဵင်းၸိူဝ်းသိုၵ်းမၢၼ်ႈႁၢင်ႈႁႅၼ်းတေၸတ်းပၢင်လိူၵ်ႈတင်ႈၼၼ်ႉ တွၼ်ႈတႃႇပႂ်ႉၵူတ်ႇထတ်းဢဝ်လိူင်ႈ ၵူၼ်းၸိူဝ်းၶႂ်ႈယႃႉ၊ သၢၼ်ၶတ်းပၢင်လိူၵ်ႈတင်ႈၼၼ်ႉ ၾၢႆႇသိုၵ်းမၢၼ်ႈ ပွႆႇၽူႈၸွပ်ႇၶၢဝ်ႇ ၽၢမ်းတူဝ်ယူႇဝႆႉၸွမ်း ၵူၼ်းမိူင်းယဝ်ႉလီငၢမ်းၼႆ – ၵူၼ်းမိူင်းၵေႃႉယူႇဝႆႉၼႂ်းၸႄႈဝဵင်းမူႇၸေႊ လၢတ်ႈၼႄၼင်ႇၼႆ။