ဝၼ်းတီႈ 25/12/2025 ယၢမ်းၵၢင်ၶမ်ႈ ၶွမ်ႊမသျိၼ်ႊၵမ်ၵၢၼ်ပၢင်လိူၵ်ႈတင်ႈ မိူင်းႁူမ်ႈတုမ် တႂ်ႈဢၢမ်းၼၢတ်ႈသိုၵ်းမၢၼ်ႈယိုတ်းမိူင်း ပိုၼ်ၽၢဝ်ႇဢွၵ်ႇပဵၼ်တၢင်းၵၢၼ်ဝႃႈ ပၢင်လိူၵ်ႈ တင်ႈ ၸုပ်ႈ 3 ၼႆႉ တေၸတ်းႁဵတ်းၵႂႃႇ ဝၼ်းတီႈ 25 လိူၼ်ၵျႅၼ်ႊၼိဝ်ႊရီႊ ပီ 2026 ၼႆယဝ်ႉ။
ပၢင်လိူၵ်ႈတင်ႈ ၸုပ်ႈ 3 ၼႆႉ တင်းမိူင်းႁူမ်ႈတုမ်ပတ်းပိုၼ်ႉ တေၸတ်းႁဵတ်းၵႂႃႇ 63 ၸႄႈဝဵင်း ၼႂ်းမိူင်းတႆး ပႃး 9 ၸႄႈဝဵင်း ပဵၼ် ၸႄႈဝဵင်းမၢၵ်ႇမၢင်၊ ၸႄႈဝဵင်းပၢင်လွင်း၊ ၸႄႈဝဵင်းယွင် ႁူၺ်ႈ၊ ၸႄႈဝဵင်းၾၢႆၶုၼ်၊ ၸႄႈဝဵင်းမိူင်းၼၢႆး၊ ၸႄႈဝဵင်းၵေးသီး၊ ၸႄႈဝဵင်းမိူင်းသူႈ၊ ၸႄႈဝဵင်းသီႇပေႃႉ လႄႈ ၸႄႈဝဵင်းၵျွၵ်ႉမႄး ။
ၼႂ်းၸႄႈမိူင်းၶၢင် သမ်ႉပဵၼ်ၸႄႈဝဵင်းမၢၼ်ႈမေႃႈ (ဗန်းမော်)၊ မၢၼ်ႈၸေႊ (မံစီ)၊ မိူင်းမွၵ်ႇ (မိုးမောက်)၊ ၽႃၵၢၼ်ႉ လႄႈ သူၺ်ႇၵူႇ (ရွှေကူ) ၸဵမ်ၸိူဝ်းၼႆႉ။
တီႈၸႄႈဝဵင်းမၢၼ်ႈမေႃႈၼႆႉ ယၢမ်းလဵဝ် သိုၵ်းမၢၼ်ႈ တင်း သိုၵ်းၶၢင် ယင်းတိုၵ်ႉသိုပ်ႇပဵၼ်ပၢင်တိုၵ်းၵၼ်ဝႆႉႁၢဝ်ႈႁႅင်းယူႇ။
ပၢင်လိူၵ်ႈတင်ႈ ၸုပ်ႈ 3 ဢၼ်တေၸတ်း 63 ၸႄႈဝဵင်းၼႆႉ တေပဵၼ်ၼႂ်းၸႄႈမိူင်းၶၢင် 5 ၸႄႈဝဵင်း၊ ၸႄႈမိူင်းယၢင်းၽိူၵ်ႇ 2 ၸႄႈဝဵင်း၊ တိူင်းၸႄႈၵႅင်း 2 ၸႄႈဝဵင်း၊ တိူင်းတၼၢဝ်းသီ 3 ၸႄႈဝဵင်း၊ တိူင်းပႃႇၵိူဝ်ႇ 8 ၸႄႈဝဵင်း၊ တိူင်းမၢၼ်းတလေး (ဝဵင်းလိူဝ်ႇ) 8 ၸႄႈဝဵင်း၊ တိူင်းတႃႈၵုင်ႈ 17 ၸႄႈဝဵင်း၊ မိူင်းတႆးပတ်းပိုၼ်ႉ 9 ၸႄႈဝဵင်း လႄႈ တိူင်းဢီႇရႃႇဝတီႇ 9 ၸႄႈ ဝဵင်း။
သိုၵ်းမၢၼ်ႈၼႆႉ ၸတ်းႁဵတ်းပၢင်လိူၵ်ႈတင်ႈၸုမ်ႇၵူႈ ၼႂ်းမိူင်းႁူမ်ႈတုမ်ပတ်းပိုၼ်ႉၵႂႃႇ သၢမ်ၸုပ်ႈ။ ၸုပ်ႈၼိုင်ႈ ၸတ်းႁဵတ်း ဝၼ်းတီႈ 28 လိူၼ်တီႊသႅမ်ႊပိူဝ်ႊ ပီ 2025၊ ၸုပ်ႈသွင် ပဵၼ်ဝၼ်းတီႈ 11 လိူၼ်ၵျႅၼ်ႊၼိဝ်ႊရီႊ ပီ 2026 ၊ ၸုပ်ႈသၢမ်ပဵၼ်ဝၼ်းတီႈ 25 လိူၼ်ၵျႅၼ်ႊၼိဝ်ႊရီႊ ပီ 2026 ။
ၸုပ်ႈၼိုင်ႈၼႆႉ ၸတ်းႁဵတ်းၵႂႃႇ 102 ၸႄႈဝဵင်း၊ ၸုပ်ႈသွင် ၸတ်းႁဵတ်းၵႂႃႇ 100 ၸႄႈဝဵင်း လႄႈ ၸုပ်ႈသၢမ် ၸတ်းႁဵတ်းၵႂႃႇ 63 ၸႄႈဝဵင်း ႁူမ်ႈသဵၼ်ႈ 265 ၸႄႈဝဵင်း ။
ၸွမ်းၼင်ႇသိုၵ်းမၢၼ်ႈယိုတ်းမိူင်း မၵ်းမၼ်ႈဝႆႉၸွမ်း လၵ်းမိူင်း 2008 ၼၼ်ႉ ၸႄႈဝဵင်းၼႂ်းမိူင်းႁူမ်ႈတုမ် တင်းသဵင်ႈမီးယူႇ 330 ၸႄႈဝဵင်း ယၢမ်းလဵဝ်သမ်ႉ ပိုၼ်ၽၢဝ်ႇတေႁဵတ်းပၢင်လိူၵ်ႈတင်ႈ မီးယူႇ 265 ၸႄႈဝဵင်း။ မိူဝ်ႈဝၼ်းတီႈ 16 လိူၼ်တီႊသႅမ်ႊပိူဝ်ႊ ၵႅမ်ႁူဝ်ပဝ်ႈ သိုၵ်းမၢၼ်ႈယိုတ်းမိူင်း လၢတ်ႈတီႈမိူင်းၶၢင်ဝႃႈ ၸႄႈဝဵင်းၸိူဝ်းတေဢမ်ႇၸတ်းႁဵတ်းပၢင်လိူၵ်ႈတင်ႈၼႆႉ မီး 56 ၸႄႈဝဵင်း ၼႆလႄႈ ၵိုတ်းဝႆႉ 10 ၸႄႈဝဵင်းၼႆႉ သိုၵ်းမၢၼ်ႈဢမ်ႇလၢတ်ႈသင်။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ