ဝၢႆးလင်သိုၵ်းမၢၼ်ႈပိုၼ်ၽၢဝ် ဝၼ်းတႄႇလူင်းသူၼ်းတုမ်တႃႇပၢင်လိူၵ်ႈတင်ႈ ၼႂ်းလိူၼ် ဢွၵ်ႇတိူဝ်ႊပိူဝ်ႊၼၼ်ႉမႃး ပႃႇတီႇ ၵၢၼ်မိူင်းလၢႆလၢႆၸုမ်း ႁူၺ်းသူၼ်း ႁႃသဵင် တႃႇလႆႈၶႅပ်းၵၢင်ၸႂ်သေတႃႉ ၵူၼ်းမိူင်းၸိူဝ်းယူႇသဝ်း ၼႂ်း ၸိုင်ႈတႆးပွတ်းၸၢၼ်း ဢမ်ႇသူၼ်ၸႂ် ။
ပႃႇတီႇၵၢၼ်မိူင်းၶဝ်တႄႇလူင်းသူၼ်းတုမ်ႁႃသဵင်တီႈၵူၼ်းမိူင်း တႄႇဝၼ်းတီႈ 28/10/2025 ယၢမ်းၵၢင်ၼႂ်ၸဝ်ႉ 6 မူင်း တေႃႇထိုင် ဝၼ်းတီႈ 26/12/2025 ယၢမ်းၵၢင်ၶိုၼ်း 12 မူင်း ႁိုင်ၶၢဝ်းတၢင်း 2 လိူၼ်ဝႃႈၼႆ။
မိူဝ်ႈဝႃး ဝၼ်းတီႈ 23/12/2025 ယၢမ်းၵၢင်ၼႂ် ပႃႇတီႇပဢူဝ်း (ပျီႇတူႉၸိတ်ႉ PNO ) လူင်းသူၼ်းတုမ် တီႈၼႂ်း ဢိူင်ႇၸၢမ်ၽူး ၸႄႈဝဵင်းႁူဝ်ပူင်း ၸိုင်ႈတႆးပွတ်းၸၢၼ်း ၊ ၸႂ်ႉၵူၼ်းပိုၼ်ႉတီႈ ၼိုင်ႈႁိူၼ်းၼိုင်ႈၵေႃႉ မႃးၶိုၼ်ႈႁွတ်ႈ ပၢင်သူၼ်းတုမ်ၼႆသေ ယူႇတီႈၵၢင်ႉၵႄႇၾၢႆႇတႂ်ႈ ပႃႇတီႇပဢူဝ်း လွၵ်ႇငိုၵ်ႈၵူၼ်းမိူင်း တႃႇသႂ်ႇၶႅပ်းၵၢင်ၸႂ်ပႃး ။
ၵူၼ်းၸၢႆးၵေႃႉၵႂႃႇ ငိၼ်းထွမ်ႇတီႈပၢင် သူၼ်းတုမ်ၼၼ်ႉၶိုၼ်းလၢတ်ႈၽူႈတွႆႇႁွၵ်ႈဝႃႈ “ မိူဝ်ႈၶဝ်မႃး သူၼ်းတုမ် ၵူၼ်းၾၢႆႇတႂ်ႈပႃႇတီႇတႄႉလၢတ်ႈၵူၼ်းဝၢၼ်ႈဝႃႈ ပေႃးဢမ်ႇသႂ်ႇၶႅပ်းၵၢင်ၸႂ် တေဢမ်ႇ ဢဝ်ပုၼ်ႈၽွၼ်းတွၼ်ႈတႃႇလွင်ႈႁူမ်ႇလူမ်ႈ ဝၢႆးလင်ပၢင်လိူၵ်ႈတင်ႈၼႆ ၊ ၵူၼ်းပႃးသဵၼ်ႈၸိုဝ်ႈ ၼၼ်ႉ တိုၼ်းတေလႆႈမႃးသႂ်ႇၶႅပ်းၵၢင်ၸႂ်ၼႆသေ ႁဵတ်းႁႂ်ႈၵူၼ်းပိုၼ်ႉတီႈ မႆႈၸႂ်တႃႇလွင်ႈႁူမ်ႇလူမ်ႈဝႆႉ“ – ၵူၼ်းပိုၼ်ႉတီႈလၢတ်ႈ ။
ၽွင်းပႃႇတီႇ ၸုမ်း ( ပျီႇတူႉၸိတ်ႉ ) PNO မႃးသူၼ်းတုမ်ၼၼ်ႉ ၵူၼ်းဝၢၼ်ႈလႆႈၵႂႃႇ ထွမ်ႇၸွမ်း ၼိုင်ႈႁိူၼ်းၼိုင်ႈၵေႃႉ ဢမ်ႇၵႂႃႇဢမ်ႇလႆႈၼႆသေ ၊ ႁူၺ်းသူၼ်းတုမ်လၢတ်ႈဝႃႈ ၵူၼ်းမိူင်းလႆႈပၢႆႈသိုၵ်း ပၢႆႈသိူဝ် ႁႃၵိၼ်လဵင်ႉတွင်ႉယၢပ်ႇလႄႈ တေဢဝ်လွင်ႈငမ်းမႃးပၼ်ၵူၼ်းမိူင်း ၼႆသေ ႁႂ်ႈသႂ်ႇၶႅပ်းၵၢင်ၸႂ်ပၼ် ၊ ၵူၼ်းၸၢဝ်းၶိူဝ်းလဵဝ်ၵၼ် ႁႂ်ႈသႂ်ႇၶႅပ်းၵၢင်ၸႂ်ပၼ်ၵၼ်ၼႆယဝ်ႉ – ၵူၼ်းပိုၼ်ႉတီႈလၢတ်ႈ ။
မိူၼ်ၼင်ႇၼႆ မိူဝ်ႈႁၢင်လိူၼ်တီႊသႅမ်ႊပိူဝ်ႊ ပူၼ်ႉမႃးၼႆႉၵေႃႈ ပႃႇတီႇ( ၸုမ်းပျီႇတူႉၸိတ်ႉ PNO ) လူင်းႁူၺ်းသူၼ်း ႁႃသဵင် ၼႂ်းဝဵင်းသီႇသႅင်ႇ ၸႂ်ႉသႂ်ႇၶႅပ်းၵၢင်ၸႂ် ပၼ်ၶဝ်။ ၶဝ်တေသၢင်ႈပၼ် လွင်ႈငမ်း ယဵၼ် တွၼ်ႈတႃႇ ၵူၼ်းမိူင်း ဝႃႈၼႆသေတႃႉ ၵူၼ်းမိူင်းဢမ်ႇသူၼ်ၸႂ် ၵမ်ႈၽွင်ႈယင်းလၢတ်ႈဝႃႈ တေဢမ်ႇၵႂႃႇသႂ်ႇၶႅပ်းၵၢင်ၸႂ်ၼႆယဝ်ႉ ။
ယၢမ်းလဵဝ်တီႈဝဵင်းၼမ်ႉၸၢင်ၵေႃႈ ပႃႇတီႇၵၢၼ်မိူင်း လၢႆလၢႆၸုမ်းလူင်း ႁူၺ်းသူၼ်းႁႃသဵင် တႃႇလႆႈ ၶႅပ်းၵၢင်ၸႂ်ဝႆႉယူႇသေတႃႉ ၵူၼ်းမိူင်းၵမ်ႈၼမ် ဢမ်ႇၶဝ်ႈၸႂ် ဢမ်ႇသူၼ်ၸႂ် ။
ၵူၼ်းၸၢႆးဝဵင်းၼမ်ႉၸၢင်လၢတ်ႈၽူႈတွႆႇႁွၵ်ႈဝႃႈ – “ တီႈဝဵင်းၼမ်ႉၸၢင်တႄႉ ႁၼ် မီးပႃႇတီႇသႅင်ႇသီႈလႄႈ ပႃႇတီႇသိူဝ်ၽိူၵ်ႇလူင်းသူၼ်းတုမ်ၵမ်ႈၼမ် ၊ ၼႂ်းဝၼ်းတီႈ 22/12/2025 ဝၼ်းပႃႇတီႇသိူဝ်ၽိူၵ်ႇ ႁွင်ႉပၢင်ၵုမ် ၵူၼ်းမိူင်း တီႈၵၢတ်ႇမႂ်ႇၼၼ်ႉ ယူႇတီႈပလိၵ်ႈသိုၵ်းမၢၼ်ႈၵိုင်ႉၵၢင်ႉ ၵူတ်ႇထတ်း မၢၵ်ႇႁူဝ်ရူတ်ႉၶိူင်ႈလႄႈ ၽႂ်ၵေႃႈဢမ်ႇႁတ်းမႃး ၊ ဢမ်ႇမီးၵူၼ်းတီႈပၢင်ၵုမ်ၼၼ်ႉ ၊ ၶဝ်တႄႉလၢတ်ႈဝႃႈ ပေႃးဢမ်ႇၵႂႃႇ ပၼ်ၶႅပ်း ၵၢင်ၸႂ်ၵေႃႈ တေပႃးသဵၼ်ႈမၢႆဢၼ်ဢမ်ႇၵႂႃႇသႂ်ႇၼၼ်ႉၵူၺ်း ။ ၵူၺ်းၵႃႈ ဝၢႆးလင်ၼၼ်ႉတေပဵၼ်သင်မႃး ၽႂ်တေဢမ်ႇႁူႉလႆႈ တေၸၢင်ႈမီးလွင်ႈၶဵင်ႇတႃႉမႃးတႃႇၵူၼ်းမိူင်းႁဝ်းၶႃႈ”- ဝႃႈၼႆ။
တီႈဝဵင်းၼမ်ႉၸၢင်ၼႆႉ ပႃႇတီႇဢၼ်ၶဝ်ႈလိူၵ်ႈတင်ႈၼႆႉတေမီး ပႃႇတီႇသၢင်ႇသီႈ USDP ၊ ပႃႇတီႇ PPP ၊ ပႃႇတီႇၽွမ်ႉႁူမ်ႈၸၢဝ်းၶိူဝ်း (တသၺ) ပႃႇတီႇ (ပျီႇတူႉၸိတ်ႉ PNO) လႄႈ ပႃႇတီႇသိူဝ်ၽိူၵ်ႇ SNDP ၼႆယဝ်ႉ ။
ၸွမ်းၼင်ႇ သဵၼ်ႈမၢႆၽူႈပၼ်သဵင် ဢၼ်ပိုၼ်ၽၢဝ်ႇဝႆႉ ပွၵ်ႈၵမ်း 3 ၼၼ်ႉသေ ၼႂ်းၸႄႈဝဵင်းၼမ်ႉၸၢင် လႄႈၼႂ်းဝဵင်းၶူဝ်လမ် တင်းမူတ်း မီးၵူၼ်းမီးသုၼ်ႇတွတ်ႈၶႅပ်းၵၢင်ၸႂ် 87,491 ၵေႃႉ ။ မီးႁူင်းတွတ်ႈ ၶႅပ်းၵၢင်ၸႂ် ဢၼ်မၵ်းမၼ်ႈဝႆႉ 78 တီႈ ၼႂ်း 20 ဢိူင်ႇ ၼႆယဝ်ႉ။
သိုၵ်းမၢၼ်ႈယိုတ်းမိူင်း ပိုၼ်ၽၢဝ်ႇဝႆႉ သဵၼ်ႈမၢႆ ဢၼ်တေၸတ်းႁဵတ်းပၢင်လိူၵ်ႈတင်ႈ တွၼ်ႈၼိုင်ႈၼႂ်း 102 ၸႄႈဝဵင်း ။ ၼႂ်းမိူင်းတႆးၸတ်း 12 ၸႄႈဝဵင်း ပဵၼ်တီႈၸႄႈဝဵင်း တူၼ်ႈတီး၊ ပၢင်လႃႈ၊ ႁူဝ်ပူင်း၊ ၼွင်ၶဵဝ်၊ ၵဵင်းတုင်၊ တႃႈၶီႈလဵၵ်း၊ ၼမ်ႉၸၢင်၊ မူႇၸေႊ၊ မိူင်းသၢတ်ႇ၊ လႃႈသဵဝ်ႈ၊ လၢင်းၶိူဝ်းလႄႈ ၸႄႈဝဵင်းလွႆလႅမ်ၸိူဝ်းၼႆႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ