ၽွင်းၸမ်ထိုင်ဝၼ်းပၢင်လိူၵ်ႈတင်ႈ ထႅင်ႈမွၵ်ႈၼိုင်ႈဝူင်ႈၼႆႉ သိုၵ်းမၢၼ်ႈ ၸိူဝ်းႁပ်ႉၼႃႈတီႈပုၼ်ႈၽွၼ်း တူင်ႉၼိုင်ၵႂႃႇမႃးၼႂ်းဝဵင်းမူႇၸေႊ ႁူမ်ႈၵၼ်တင်း ၸုမ်းပလိၵ်ႈသေ တင်ႈၵဵတ်ႉလၢၼ်ႇ ပႂ်ႉၵူတ်ႇထတ်း ၵူၼ်းၶဝ်ႈ ၵူၼ်းဢွၵ်ႇ ၼိူဝ်သဵၼ်ႈတၢင်း ၼႂ်းဝဵင်းမူႇၸေႊႁၢဝ်ႈႁႅင်း ။

ဝၼ်းတီႈ 28 လိူၼ်တီႊသႅမ်ႊပိူဝ်ႊၼႆႉ သိုၵ်းမၢၼ်ႈယိုတ်းမိူင်း တေၸတ်းႁဵတ်းပၢင်လိူၵ်ႈတင်ႈ ၼႂ်းဝဵင်းမူႇၸေႊ ၸုပ်ႈၼိုင်ႈၼႆလႄႈ ၽွင်းတိုၵ်ႉႁၢင်ႈႁႅၼ်း တႃႇၸတ်းပၢင်မၼ်းယူႇ ၼၼ်ႉ ရူတ်ႉၶိူင်ႈ လႄႈ ၵႃး ၵူၼ်းမိူင်း ၸိူဝ်းၵႂႃႇမႃး လႄႈ လတ်းၽၢၼ်ႇၸွမ်းၵဵတ်ႉလၢၼ်ႇၶဝ် ၺႃးၵူတ်ႇထတ်းႁၢဝ်ႈႁႅင်း ၼႆယဝ်ႉ။

ၸၢႆးပၢင်ႇ ဢႃႇယု 30 ပၢႆ ၵေႃႉၺႃးၵူတ်ႇထတ်း ၸွမ်းၵဵတ်ႉလၢၼ်ႇသိုၵ်းမၢၼ်ႈ ၼႂ်းဝဵင်းမူႇၸေႊ လၢတ်ႈတီႈၽူႈတွႆႇႁွၵ်ႈဝႃႈ “မိူဝ်ႈဢွၼ်တၢင်းၼႆႉ ၶဝ်ဢမ်ႇထတ်းၵျၢမ်းပေႃးတၢၼ်ႇၼႆႉ။ မိူဝ်ႈလဵဝ် ၶဝ်ႁေႉႁဝ်းၵိုတ်းယဝ်ႉ တႂ်ႈတီႈၼင်ႈရူတ်ႉၶိူင်ႈ၊ ထူင်ပႃး၊ ၼႂ်းတိူၵ်ႈၶူဝ်း၊ ထူင်ၶူဝ်းၸိူဝ်းၼႆႉ ၶဝ်သွၵ်ႈတူၺ်းမူတ်း။ ၶဝ်ၵူဝ်သင်ဢမ်ႇႁူႉၼႃႇ။ ၶဝ်ထတ်းႁႅင်းၼႆႉ မီးမွၵ်ႈ 3 ဝၼ်း 4 ဝၼ်းယဝ်ႉ” ဝႃႈၼႆ။

ၸႄႈဝဵင်းၸိူဝ်းတေလႆႈၸတ်းႁဵတ်းပၢင်လိူၵ်ႈတင်ႈ ၸုပ်ႈၼိုင်ႈၼႆႉ ၼႂ်းမိူင်းတႆးပတ်းပိုၼ်ႉ ပႃး 12 ၸႄႈဝဵင်း။ ၼႂ်းၼၼ်ႉပႃး ဝဵင်းမူႇၸေႊ၊ ဝဵင်းလႃႈသဵဝ်ႈ၊ ဝဵင်းၼွင်ၶဵဝ်၊ ဝဵင်းပၢင်လႃႈ၊ ဝဵင်းႁူဝ်ပူင်း၊ ဝဵင်းၵဵင်းတုင်၊ ဝဵင်းတူၼ်ႈတီး၊ ဝဵင်းၼမ်ႉၸၢင်၊ ဝဵင်းမိူင်းသၢတ်ႇ၊ ဝဵင်းလၢင်းၶိူဝ်း လႄႈ ဝဵင်းလွႆလႅမ် ၸဵမ်ၸိူဝ်းၼႆႉ။

မိူဝ်ႈဝႃး ဝၼ်းတီႈ 23 ၼႆႉၵေႃႈ သိုၵ်းမၢၼ်ႈယိုတ်းမိူင်း တင်း ပလိၵ်ႈ ၵူတ်ႇထတ်း ရူတ်ႉၵႃး လႄႈ ၵူၼ်းၶဝ်ႈဢွၵ်ႇ ၼႂ်းဝဵင်းလႃႈသဵဝ်ႈႁၢဝ်ႈႁႅင်း မိူၼ်ၵၼ် ၼႆယဝ်ႉ။

ၼၢင်းယိင်း ဢႃႇယု 30 ပၢႆ ၵေႃႉယူႇဝဵင်းလႃႈသဵဝ်ႈ လၢတ်ႈၼႄတီႈၽူႈတွႆႇႁွၵ်ႈဝႃႈ “မိူဝ်ႈၵၢင်ၼႂ်ၼၼ်ႉ ၶႃႈလူဝ်ႇၵႂႃႇတၢင်းၼွၵ်ႈဝဵင်းၼၼ်ႉၵမ်းၼိုင်ႈၼႆလႄႈ ၸင်ႇၵႂႃႇ။ ၶဝ်ႁႂ်ႈၶႃႈပိုတ်ႇ ၼႄထူင်ပႃးၸိူဝ်းၼႆႉႁႄ။ မိူဝ်ႈဢွၼ်တၢင်းၼႆႉ ပေႃးပဵၼ်ရူတ်ႉၶိူင်ႈၼႆၶဝ်ဢမ်ႇထတ်း။ ၶဝ်တေႃႉတႄႉ ၸႅတ်ႈ (ထတ်း) ၵႃးၶဝ်ႈၵႃးဢွၵ်ႇ ဢိတ်းဢွတ်းၵူၺ်း။ ပွၵ်ႈၼႆႉတႄႉ ၶဝ်ထတ်းတင်းသဵင်ႈ” ဝႃႈၼႆ။

မိူဝ်ႈပူၼ်ႉမႃး ဝၼ်းတီႈ 21 လိူၼ်တီႊသႅမ်ႊပိူဝ်ႊၼၼ်ႉၵေႃႈ ဝၼ်းလဵဝ်ၵူၺ်း မၢၵ်ႇတႅၵ်ႇၵႂႃႇ ၼႂ်းဝဵင်းလႃႈသဵဝ်ႈ သၢမ်ပွၵ်ႈ၊ သၢမ်တီႈ။

ၸႄႈဝဵင်းမူႇၸေႊ တင်း ၸႄႈဝဵင်းလႃႈသဵဝ်ႈ ဢွင်ႈတီႈသိုၵ်းမၢၼ်ႈယိုတ်းမိူင်း တေၸတ်းပၢင်လိူၵ်ႈတင်ႈယူႇ ၼႆႉ သိုၵ်းမၢၼ်ႈၵူၺ်းၵုမ်းၵမ်လႆႈ ပွၵ်ႉၸိူဝ်းမီးယူႇၼႂ်းဝဵင်းၵူၺ်းသေ ပိုၼ်ႉတီႈဝၢၼ်ႈၸိူဝ်းမီးယူႇၾၢႆႇၼွၵ်ႈဝဵင်း တႄႉ ပဵၼ်ၸုမ်းသိုၵ်းၵဝ်ႈၵၢင်ႉ၊ သိုၵ်းတဢၢင်း လႄႈ ၸုမ်းဢူၺ်းလီၶဝ် ၵုမ်းၵမ် ပၼ်ၵၢၼ်ၽွင်းငမ်းဝႆႉ လူၺ်ႈလၢႆးတၢင်းၽႂ်မၼ်း ၼႆယဝ်ႉ။