ၸွမ်းၼင်ႇၶၼ်ၶမ်းလုမ်ႈၾႃႉ ပုင်ႈၶိုၼ်ႈသုင်မႃးသေ ၼႂ်းဝၼ်းတီႈ 23/12/2025 (မိူဝ်ႈဝႃး)ၼႆႉ ၶၼ်ၶမ်းၼႂ်းမိူင်းႁူမ်ႈတုမ်မၢၼ်ႈၵေႃႈ 1 ၵျၢပ်ႈလႂ် ပုင်ႈၶိုၼ်ႈထိုင် 93 သႅၼ်ပျႃးပၢႆ ဝႃႈၼႆ။
မိူဝ်ႈဝၼ်းတီႈ 22/12/2025 ၼၼ်ႉ ၶမ်း 1 ၵျၢပ်ႈလႂ် မီး 91 သႅၼ်ပၢႆ (9,140,000 ပျႃး)၊ ထိုင်မႃးၼႂ်းဝၼ်းတီႈ 23 ၼႆႉ ၶၼ်ၶမ်း 1 ၵျၢပ်ႈလႂ်ပဵၼ်ၵႂႃႇ 93 သႅၼ်ပၢႆ (9,350,000 ပျႃး)။ ၵွပ်ႈ ၼၼ်လႄႈ ၼႂ်းၶၢဝ်းတၢင်း ဝၼ်းလဵဝ်ၵူၺ်း ၶၼ်ၶမ်းမိူင်းမၢၼ်ႈ ၶိုၼ်ႈမႃး 2 သႅၼ်ပၢႆ။
လွင်ႈတၢင်းဢၼ်ႁဵတ်းႁႂ်ႈၶၼ်ၶမ်းၼႂ်းမိူင်း ၵိုင်ႉၵၢင်ႉပုင်ႈၶိုၼ်ႈသုင်မႃးၼႆႉ ပဵၼ်ယွၼ်ႉၶၼ်ၶမ်းလုမ်ႈၾႃႉ ၶိုၼ်ႈသုင်မႃးႁႅင်း လိူဝ်သေမိူဝ်ႈပူၼ်ႉမႃး။ ယၢမ်းလဵဝ် ၶၼ်ၶမ်းလုမ်ႈၾႃႉ 1 ဢွင်ႇသလႂ် မီး 4490 တေႃႊလႃႊပၢႆ။
ၽူႈလဵပ်ႈႁဵၼ်းလွင်ႈလွၵ်းၵၢတ်ႇၵူႈမိူင်းမိူင်းၶဝ်တႄႉ ထတ်းသၢင်လၢတ်ႈဝႃႈ – ယွၼ်ႉ မိူင်းဢမေႊရိၵၼ်ႊ တိူဝ်းပၼ်ႁႅင်းဢီးၼိူဝ် မိူင်းပိၼ်ႊၼီႊသွႆႊလႃႊ ယိုတ်းသိမ်းဢဝ်ႁိူဝ်းတၢင်ႇ ၼမ်ႉမၼ်းမဵၼ်ၸိူဝ်းၼႆႉလႄႈ ႁဵတ်းႁႂ်ႈၵၢၼ်မိူင်း မီးလွင်ႈၶဵင်ႈၶႅင်မႃး။ ၼႂ်းၵႄႈငဝ်းလၢႆးၼင်ႇၼႆ ၵူၼ်းလူင်းတိုၼ်းလၢင်းၶဝ်ၵေႃႈ ဢွၼ်ၵၼ်ၶၢႆႉလႅၵ်ႈလၢႆႈမႃးၸွမ်း ၾၢႆႇၶမ်းၼႆႉ ဝႃႈၼႆ။
ၼႂ်းပီ 2025 ၶၢဝ်းတၢင်းပီလဵဝ်ၵူၺ်း ၶၼ်ၶမ်းလုမ်ႈၾႃႉၶိုၼ်ႈမႃးထိုင် 70% ပဵၼ်ဢၼ်သုင်သုတ်းၼႂ်းၶၢဝ်းတၢင်း 46 ပီ (ဝၢႆးလင်ပီ 1979 မႃးၼႆႉ)။
ၵႃႈၶၼ်ၶမ်း ဢၼ်ၸုမ်းၵူၼ်းၵႃႉၶမ်း တိူင်းယၼ်ႇၵုင်ႇ တႂ်ႈသိုၵ်းမၢၼ်ႈယိုတ်းမိူင်း မၵ်းမၼ်ႈပၼ်ဝႆႉၼၼ်ႉတႄႉ ဢမ်ႇမီးလွင်ႈလႅၵ်ႈလၢႆႈသင်၊ ၸွမ်းၼင်ႇသိုၵ်းမၢၼ်ႈမၵ်းမၼ်ႈဝႆႉၼၼ်ႉ ၶမ်း 1 ၵျၢပ်ႈလႂ် မီးႁိမ်းႁွမ်း 60 သႅၼ်ပျႃးၵူၺ်း ၼႆယဝ်ႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ