ဝၼ်းတီႈ 22/12/2025 ၼႆႉ ၸွမ်ၸိုင်ႈမိူင်းဢမေႊရိၵၼ်ႊ တေႃႊၼႄႊလ်ထရမ်ႉ မွပ်ႈဢၢပ်ႈပၼ်ပုၼ်ႈၽွၼ်း ၽွင်းတၢင်ၶိုၵ်ႉတွၼ်း ၵဵဝ်ႇလူၺ်ႈၵုၼ် ၵရိၼ်ႊလႅၼ်ႊ(Greenland) ပၼ်တီႈ Jeff Landry ၽူႈၵွၼ်း ၾၢႆႇၽွင်းငမ်းၸႄႈတွၼ်ႈ လူႊဝီႊသီႊယႃႊၼႃႊ (Louisiana)။

ၸွမ်ၸိုင်ႈထရမ်ႉလၢတ်ႈဝႃႈ – ၸွမ်းၾင်ႇပၢင်ႇလၢႆႇၼၼ်ႉ မီးႁိူဝ်းၶႄႇ တင်း ႁိူဝ်းရတ်ႉသျႃႊဝႆႉၵူႈတီႈ။ ပုၼ်ႈတႃႇလွင်ႈႁူမ်ႇလူမ်ႈၼၼ်ႉ ဢမေႊရိၵၼ်ႊ တိုၼ်းလူဝ်ႇလႆႈၽွင်းငမ်းပႃး ၼိူဝ်ၵုၼ် ၵရိၼ်ႊလႅၼ်ႊ။ လွင်ႈၼႆႉ ဢမ်ႇၸႂ်ႈယွၼ်ႉပိူဝ်ႈၶူဝ်းၶွင်သၽႃႇဝ ၼႂ်းၼမ်ႉတႂ်ႈလိၼ် ဝႃႈၼႆ။

ၽွင်းတၢင်ၶိုၵ်ႉတွၼ်း ၵဵဝ်ႇလူၺ်ႈၵုၼ် ၵရိၼ်ႊလႅၼ်ႊ(Greenland) Jeff Landry ၵေႃႈလၢတ်ႈဝႃႈ – ဢဝ်ၵုင်ႇမုၼ်ၸွမ်း ဢၼ်တေလႆႈႁၢပ်ႇပုၼ်ႈၽွၼ်း ႁဵတ်းႁႂ်ႈၵုၼ် ၵရိၼ်ႊလႅၼ်ႊမႃးပဵၼ်ပွတ်းတွၼ်ႈဢၼ်ၼိုင်ႈ ၼႂ်းမိူင်းဢမေႊရိၵၼ်ႊ ဝႃႈၼႆ။

ၵဵဝ်ႇလူၺ်ႈလွင်ႈၼႆႉသေ ၽွင်းလူင်ၾၢႆႇၼွၵ်ႈမိူင်း မိူင်းတဵင်ႊမၢတ်ႉၶ်လၢတ်ႈဝႃႈ – ပဵၼ်ဢၼ်လီသဵင်ႈၸႂ်လႄႈ တေႁွင်ႉဢဝ် ၽွင်းတၢင် မိူင်းဢမေႊရိၵၼ် ၵႂႃႇဢုပ်ႇၵုမ် ဝႃႈၼႆ။ ၸွမ် ၽွင်းလူင်မိူင်း Greenland ၵေႃႈ လၢတ်ႈဝႃႈ လူဝ်ႇလႆႈမီးလွင်ႈၼပ်ႉယမ်ၼိူဝ် လွင်ႈၽွင်းငမ်းၼႃႈတီႈၽႂ်မၼ်း ၼႆယဝ်ႉ။

မိူၼ်ၼႆ ႁူဝ်ပဝ်ႈၵေႃႇမသျိၼ်ႊ ဢီႊယူႊ(EU) ၵေႃႈ လၢတ်ႈဝႃႈ – ဢီႊယူႊ တေၸုၵ်းမၼ်ႈၵႂႃႇ ၾၢႆႇမိူင်းတဵင်ႊမၢတ်ႉၶ် လႄႈ ၵူၼ်းမိူင်းၵရိၼ်ႊလႅၼ်း တဵမ်တဵမ်ထူၼ်ႈထူၼ်ႈ ဝႃႈၼႆ။

ၸွမ်ၸိုင်ႈ တေႃႊၼႄႊလ်ထရမ်ႉၼႆႉ မိူဝ်ႈမၼ်းၸၢႆးလႆႈႁပ်ႉတၼ်းႁဵင်းပဵၼ် ၸွမ်ၸိုင်ႈမိူင်းဢမေႊရိၵၼ်ႊ ပွၵ်ႈၵမ်းၼိုင်ႈ ၼႂ်းပီ 2019 ၼၼ်ႉၵေႃႈ ယၢမ်ႈၶတ်းၸႂ် တႃႇတေသိုဝ်ႉဢဝ် ၵုၼ်ၵရိၼ်ႊလႅၼ်ႊ။ ၵူၺ်းၵႃႈ ၺႃးလူင်ပွင်ၸိုင်ႈမိူင်းတဵင်ႊမၢတ်ႉၶ် ပၢၵ်ႈထဵင်ပႅတ်ႈ။

တီႈၼိူဝ်ၵုၼ်ၵရိၼ်ႊလႅၼ်ႊၼႆႉ မီးႁူဝ်ၼပ်ႉၵူၼ်းယူႇသဝ်းဝႆႉ ႁိမ်းၸမ် 6 မိုၼ်ႇ။ တႄႇဢဝ်ပီ 1979 ၼၼ်ႉ လႆႈသုၼ်ႇၽွင်းငမ်းႁင်းၶေႃမႃးသေတႃႉ ၾၢႆႇၵၢၼ်ၵႅတ်ႇၶႄ ႁႄႉၵင်ႈလႄႈ မူႇပိူင် ၵဵဝ်ႇလူၺ်ႈၼွၵ်ႈမိူင်းၸိူဝ်းၼႆႉတႄႉ တိုၵ်ႉယူႇဝႆႉတႂ်ႈ မိူင်းတဵင်ႊမၢတ်ႉၶ်။

ၵူၼ်းမိူင်း ၵရိၼ်ႊလႅၼ်ႊၵမ်ႈၼမ် ဢွၼ်ၵၼ်ၵမ်ႉထႅမ် တႃႇဢဝ်လွင်ႈလွတ်ႈလႅဝ်းတီႈ မိူင်းတဵင်ႊမၢတ်ႉၶ်သေတႃႉ တႃႇတေၶဝ်ႈၵႂႃႇပဵၼ်ပွတ်းတွၼ်ႈဢၼ်ၼိုင်ႈ ၼႂ်းမိူင်းဢမေႊရိ ၵၼ်ႊၼၼ်ႉတႄႉ ဢွၼ်ၵၼ်သၢၼ်ၶတ်းဝႆႉ ၼႆယဝ်ႉ။