ၽူႈမီးၸၼ်ႉသုင် ၸွမ်သိုၵ်းလူင် မိူင်းရတ်ႉသျႃႊၵေႃႉၼိုင်ႈ လူႉတၢႆ ယွၼ်ႉၺႃးႁၢင်ႈၵၢင်မၢၵ်ႇသႂ်ႇ တႂ်ႈရူတ်ႉၵႃး တီႈဝဵင်းမေႃႊသၵူဝ်ႊ ပွတ်းၸၢၼ်း၊ မိူင်းရတ်ႉသျႃႊ။

လွင်ႈၼႆႉပဵၼ်ၵႂႃႇ ၼႂ်းဝၼ်းတီႈ 22/12/2025 ၶၢဝ်းယၢမ်းၵၢင်ၼႂ် မွၵ်ႈ 7 မူင်း။ ၽွင်းမိူဝ်ႈ ၸွမ်သိုၵ်းလူင် ၽႅၼ်ႊၼီႊလ်သႃႊပႃႊရွပ်ႉ လုၵ်ႉဢွင်ႈတီႈၵိုတ်းရူတ်ႉၵႃးသေ တေႁေႃႈဢွၵ်ႇၵႂႃႇၼၼ်ႉ ၵိုင်ႉၵၢင်ႉမၢၵ်ႇတႅၵ်ႇသေ လူႉတၢႆၵႂႃႇ ဝႃႈၼႆ။

ၵေႃႇမတီႇၾၢႆႇၵူတ်ႇထတ်းၸိုင်ႈမိူင်း မိူင်းရတ်ႉသျႃႊ ၶၢတ်ႈလၢမ်းဝႃႈ – လွင်ႈၼႆႉ မီးၸုမ်းၶိုၵ်ႉတွၼ်း မိူင်းယူႇၶရဵၼ်းၶဝ် ယူႇၾၢႆႇလင်ဝႆႉ၊ ၸွမ်သိုၵ်းလူင်ၼႆႉ လႆႈလူႉတၢႆၵႂႃႇယွၼ်ႉႁွႆး မၢတ်ႇ ၸဵပ်း၊ တီႈၼင်ႈၵူၼ်းၶပ်းရူတ်ႉၼၼ်ႉ လႆႈႁၼ်မီးႁွႆးလိူတ်ႈဝႆႉ ၼႆယဝ်ႉ။ ၵဵဝ်ႇလူၺ်ႈလွင်ႈၼႆႉ ၾၢႆႇမိူင်းယူႇၶရဵၼ်းတႄႉ ပႆႇတုမ်ႉတွပ်ႇသင်ၶိုၼ်း။

ၸွမ်သိုၵ်းလူင်ၼႆႉ ပဵၼ်ၽူႈမီးၸၼ်ႉ တီႈလုမ်းၾၢႆႇၵုမ်းၵမ် ၵၢၼ်ၾိုၵ်းသွၼ်ၽႅၼ်ၵၢၼ်သိုၵ်း တပ်ႉသိုၵ်းရတ်ႉသျႃႊ ။

တႄႇဢဝ် ႁူဝ်ပီ 2022 ၶၢဝ်းတၢင်းရတ်ႉသျႃႊ ပူၼ်ႉပႅၼ်ၶဝ်ႈတိုၵ်း မိူင်းယူႇၶရဵၼ်းမႃးၼႆႉ လွင်ႈၽူႈမီးၸၼ်ႉသုင် ၼႂ်းတပ်ႉသိုၵ်းမိူင်းရတ်ႉသျႃႊ ၺႃးႁၢင်ႈၵၢင်မၢၵ်ႇ လူႉတၢႆၵေႃႈ ပဵၼ်မႃး ထပ်းၵၼ်ဝႆႉ။

တႃႇတေၵိုတ်းပၢင်တိုၵ်းတင်းယူႇၶရဵၼ်းၼၼ်ႉ ဢမေႊရိၵၼ်ႊဢွၼ်ႁူဝ်ဢုပ်ႇၵုမ်ငူပ်ႉငီႉၵၼ်ဝႆႉယူႇသေတႃႉ ယွၼ်ႉဢမ်ႇမီးလွင်ႈႁပ်ႉႁွင်း ၾၢႆႇၵၢၼ်ႁူမ်ႇလူမ်ႈပၼ်မိူင်းယူႇၶရဵၼ်း၊ ၾၢႆႇၼိုင်ႈၵေႃႈ တိုၵ်ႉမီးတၢင်းႁၼ်ထိုင်ပႅၵ်ႇပိူင်ႈၼိူဝ် လွင်ႈၵၢၼ်ဢုပ်ႉပိူင်ႇၽွင်းငမ်းလႄႈ လွင်ႈၸုၼ်ႉပွႆႇပႅတ်ႈပိုၼ်ႉတီႈၼႃႈလိၼ်ၸိူဝ်းၼႆႉ။

ၼႂ်းၶၢဝ်းၶိဝ်းၼႆႉ သိုၵ်းရတ်ႉသျႃး လႆႈယိုဝ်းတိုၵ်းသႂ်ႇထႅင်ႈ ႁူင်းၵေႃႇၵၢႆႇ ၾၢႆႇၵမ်ႉၸွႆႈသဵၼ်ႈတၢင်းၼမ်ႉ ဢၼ်မီးၼႂ်းပိုၼ်ႉတီႈ ဢူဝ်ႇတီႇသႃႇ မိူင်းယူႇၶရဵၼ်းပွတ်းၸၢၼ်း ႁၢဝ်ႈႁႅင်း ဝႃႈၼႆ။