ရတ်ႉသျႃႊ တေသူင်ႇပၼ်ၶိူင်ႈၻရူၼ်ႊ ႁၢမ်းၵူၼ်းၶပ်းႁေႃႈ တႃႇၸႂ်ႉတိုဝ်းၼႂ်းၵၢၼ်ၸွပ်ႇၶၢဝ်ႇဢဝ်ၶၢဝ်ႇ ပၼ်သိုၵ်းမၢၼ်ႈယိုတ်းမိူင်းထႅင်ႈၼႆ ႁွင်ႈၵၢၼ်ၶၢဝ်ႇ Intelligence Online ပိုၼ်ဢွၵ်ႇဝႆႉၼင်ႇၼႆ။

မိူဝ်ႈၼႂ်းလိူၼ်ၼူဝ်ႊဝႅမ်ႊပိူဝ်ႊၼႆႉ သိုၵ်းမၢၼ်ႈယိုတ်းမိူင်း တိုၵ်ႉလႆႈႁပ်ႉ ၶိူင်ႈၸႂ်ႉတိုဝ်း တႃႇယႃႉၻရူၼ်ႊ တီႈ မိူင်းရတ်ႉသျႃႊဢၼ်ၼိုင်ႈၵူၺ်း ။

မိူဝ်ႈပၢင်တိုၵ်း ၽႅၼ်ယၼ်ႇသိုၵ်း 1027 ၼၼ်ႉ ယွၼ်ႉၸုမ်းသိုၵ်းၸၢဝ်းၶိူဝ်း ၸႂ်ႉတိုဝ်းတရူၼ်ႊပဵၼ်ပိူင်ယႂ်ႇသေ ၶဝ်ႈလူမ်ႇတိုၵ်းသိုၵ်းမၢၼ်ႈယိုတ်းမိူင်း ၼႂ်းမိူင်းတႆးပွတ်းႁွင်ႇ ။ သိုၵ်းမၢၼ်ႈ သုမ်းၵၢၼ်ႉပၢင်တိုၵ်း ထိုင်တီႈလႆႈ ပွႆႇပႅတ်ႈဝဵင်းယႂ်ႇဝဵင်းလူင် သိုၵ်းၸၢဝ်းၶိူဝ်းၶဝ်ႈၵုမ်းၵမ်လႆႈငၢႆႈငၢႆႈလီလီ။

ဝၢႆးလင်မႃး သိုၵ်းမၢၼ်ႈ ၸင်ႇလႆႈၶဝ်ႈႁႃလူင်ပွင်ၸိုင်ႈမိူင်းၶႄႇသေ လႆႈတၢင်းၵမ်ႉၸွႆႈ ၶိူင်ႈၻရူၼ်ႊ မိူင်းၶႄႇမႃး။

ဢိင်ၼိူဝ်ၶေႃႈမုၼ်း ဢၼ်လႆႈမႃးတီႈ ၽူႈၸွပ်ႇၶၢဝ်ႇၾၢႆႇသိုၵ်း မိူင်းယူႊၶရဵၼ်ႊ GUR ၼၼ်ႉသေ ႁွင်ႈၵၢၼ် ၶၢဝ်ႇ Intelligence Online ပိုၼ်ၽၢဝ်ႇဢွၵ်ႇဝႃႈ – ယၢမ်းလဵဝ် ၸွမ်းပၢင် တိုၵ်းၸိူဝ်းပဵၼ်ယူႇၼႂ်းမိူင်းႁူမ်ႈတုမ် ၼႆႉ သိုၵ်းမၢၼ်ႈ ၸႂ်ႉတိုဝ်းၶိူင်ႈတရူၼ်ႊ ရတ်ႉသျႃႊ ၼမ်လိူဝ်ပိူၼ်ႈသုတ်း ဝႃႈၼႆ။

လိူဝ်ၼၼ်ႉ ယင်းသိုပ်ႇပိုၼ်ၽႄႈဢွၵ်ႇ ၶႅပ်းႁၢင်ႈ ၶိူင်ႈၻရူၼ်ႊ သႅၼ်း Orlan-30 ၸွပ်ႇဢဝ်ၶၢဝ်ႇ ဢၼ်ၸုမ်း သိုၵ်းၸၢဝ်းၶိူဝ်းၶဝ် ယိုတ်းသိမ်းလႆႈတီႈသိုၵ်းမၢၼ်ႈဝႆႉၼၼ်ႉထႅင်ႈ။

ၶိူင်ႈၻရူၼ်ႊသႅၼ်း Orlan- 30 လႄႈ RB-504A-E ဢၼ်ပဵၼ်ၶိူင်ႈၸႂ်ႉတိုဝ်း တႃႇယႃႉၵဝ်းပိူင်လၢႆးႁဵတ်းသၢင်ႈ ၻရူၼ်ႊၽူႈၶဵၼ်ၼၼ်ႉ တိုၵ်ႉႁွတ်ႈထိုင်ၼႂ်းမိုဝ်းသိုၵ်းမၢၼ်ႈယိုတ်းမိူင်း မိူဝ်ႈပူၼ်ႉမႃးလိူၼ်ၼူဝ်ႊဝႅမ်ႊပိူဝ်ႊၼၼ်ႉ – ၼႆ GUR လၢတ်ႈ။

ၶွမ်ႊပၼီႊ ႁဵတ်းဢွၵ်ႇၶိူင်ႈၸႂ်ႉတိုဝ်း ၼႂ်းၵၢၼ်ၵႅတ်ႇၶႄ မိူင်းရတ်ႉသျႃႊ Special Technology Center (STC) ဢၼ်ပၵ်းငဝ်ႈလုမ်းဝႆႉတီႈ သဵင်ႊပီႊတႃႊသပွၵ်ႊၼၼ်ႉ သူင်ႇၶိူင်ႈၸႂ်ႉတိုဝ်းၻရူၼ်ႊ ၽၢၼ်ႇၶွမ်ႊပၼီႊ Rosoboronexport (ၶွမ်ႊပၼီႊ တေႃႉသူင်ႇၶူဝ်းၵုၼ်ႇမိူင်းတေႃႇမိူင်း) ၸူးမိူင်းမၢၼ်ႈ ၼႆယဝ်ႉ။

ဝၢႆးလင်ၶိူင်ႈတရူၼ်ႊႁွတ်ႈထိုင် ၶူင်ႇႁိူဝ်းမိၼ်ဢၼ်ယူႇတႂ်ႈဢၢမ်းၼၢတ်ႈသိုၵ်းမၢၼ်ႈၵုမ်းၵမ်ၼၼ်ႉဢမ်ႇႁိုင် သိုၵ်းမၢၼ်ႈယိုတ်းမိူင်း သိုပ်ႇသူင်ႇၽႄႈၵႂႃႇတၢင်း မိူင်းမၢၼ်ႈ ထုင်ႉပဵင်း လႄႈ တပ်ႉပၢင်သဝ်းၶွင်သိုၵ်းမၢၼ်ႈ တၢင်းပွတ်းႁွင်ႇၸဵမ်ၸိူဝ်းၼႆႉၼႆ ႁွင်ႈၵၢၼ်ၶၢဝ်ႇ Intelligence Online ဢၢင်ႈဢိင်ဢဝ်ၶေႃႈမုၼ်းတီႈ လႅင်ႇၶၢဝ်ႇ ဢၼ်မီးၼႂ်းၸုမ်းၸွပ်ႇၶၢဝ်ႇမိူင်းယူႊၶရဵၼ်ႊသေ ယိုၼ်ယၼ်ဢွၵ်ႇဝႆႉၼင်ႇၼႆ။