ၵူၼ်းပၢႆႈၽေးပၢင်တိုၵ်း 1000 ပၢႆ ၼႂ်းၸႄႈဝဵင်းဝၢၼ်ႈငႂ်ႈ (ယႂႃႇငၢၼ်ႇ) ၸိုင်ႈတႆးပွတ်းၸၢၼ်း လႆႈၶၢဝ်းတၢင်းၼိုင်ႈပီယဝ်ႉပႆႇၸၢင်ႈပွၵ်ႈၶိုၼ်းႁိူၼ်း လူဝ်ႇတၢင်းၸွႆႈထႅမ်ၶဝ်ႈၼမ်ႉတင်းၵိၼ်။

ပဵၼ်ၵူၼ်းဝၢၼ်ႈ ယၼႄး 500 ပၢႆ ဢၼ်ၺႃးသိုၵ်းမၢၼ်ႈၽဝ်ႈဝၢၼ်ႈပႅတ်ႈၽွင်းႁၢင်ပီ 2024 ပၢင်တိုၵ်းသိုၵ်းမၢၼ်ႈလႄႈ သိုၵ်းထၼူႉ DSNDA  လႄႈတင်း ၵူၼ်းဝၢၼ်ႈ ၵျွၵ်ႉတေႃးလႄႈ ဝၢၼ်ႈၺွင်ႇပိၼ်ႇသႃႇ 600 ပၢႆ  ဢၼ်ၺႃးသိုၵ်းမၢၼ်ႈဢဝ်ႁိူဝ်းမိၼ်ပွႆႇမၢၵ်ႇသႂ်ႇဝၢၼ်ႈ ၽွင်းၵၢင်ပီ 2024 ။

ၸိူဝ်းၶဝ်ဢွၼ်ၵၼ်ပၢႆႈဢွၵ်ႇဝၢၼ်ႈၵႂႃႇယူႇသဝ်းၸွမ်းၵျွင်းမုၼ်ၸဝ်ႈ ဢၼ်မီးတီႈဝၢၼ်ႈႁိမ်းႁွမ်း ။ ၵမ်ႈၽွင်ႈၵႂႃႇႁဵတ်းသုမ်ႉယူႇၼႂ်းႁႆႈၼႂ်းသူၼ်။  တေႃႇထိုင်ဝၼ်းမိူဝ်ႈၼႆႉ လႆႈမႃးၶၢဝ်းတၢင်းပီပၢႆ ယဝ်ႉၵေႃႈယွၼ်ႉပိူဝ်ႈသိုၵ်းတင်းသွင်ၾၢႆႇတိုၵ်ႉၶဵင်ႈၶႅင်တေႃႇၵၼ်ယူႇလႄႈ ၸိူဝ်းၶဝ်ပႆႇၸၢင်ႈ ၶဝ်ႈမိူဝ်းပူၵ်းပွင်ႁိူၼ်းယေးသေယူႇသဝ်းၶိုၼ်းၼႂ်းဝၢၼ်ႈၵိူတ်ႇမိူင်းၼွၼ်း။

 ယၢမ်းလဵဝ် ဢၼ်လူဝ်ႇတၢင်းၸွႆႈထႅမ်ၼႆႉပဵၼ်ၶူဝ်းၸႂ်ႉသွႆတႃႇၼၢင်းယိင်း၊ လုၵ်ႈဢွၼ်ႇလဵၵ်ႉ ၼႆ ၵူၼ်းၸွႆႈထႅမ်ၵူၼ်းပၢႆႈၽေးသိုၵ်းၼႂ်းၸႄႈဝဵင်းယႂႃႇငၢၼ်ႇလၢတ်ႈၽူႈတွႆႇႁွၵ်ႈ ၼင်ႇၼႆ။

“ ၵူၼ်းပၢႆႈၽေးသိုၵ်းၼႆႉ ဢမ်ႇၸႂ်ႈယူႇဝႆႉတီႈလဵဝ် ။ ၶဝ်ၵႂႃႇယူႇဝႆႉ ၼိုင်ႈတီႈၼိုင်ႈဢိတ်း ၊ တလဵဝ် ၼႆႉ ၶဝ်လႆႈပၢႆႈဝႆႉ မီးပီပၢႆယဝ်ႉ ၊ သိုၵ်းမၢၼ်ႈၵႆႉထူဝ်းသိုၵ်းၶဝ်ႈၼႂ်းဝၢၼ်ႈလႄႈ ဢမ်ႇႁတ်း ပွၵ်ႈ ၶိုၼ်းႁိူၼ်းယေး  ၊ ၵၢၼ်ၵေႃႈႁႃယၢပ်ႇ  ၊ ၶဝ်လႆႈဢွၼ်ၵၼ်ၵိၼ် ၶဝ်ႈတူမ်ႈ ၵူၺ်းၶႃႈဢေႃႈ။ ၼၢင်းယိင်း လုၵ်ႈဢွၼ်ႇလႄႈၵူၼ်းထဝ်ႈ  လူဝ်ႇတၢင်းၸွႆႈထႅမ်ဝႆႉႁၢဝ်ႈႁႅင်း – ၸဵမ်တၢင်းၵိၼ် ယမ်ႉလႄႈ ၽႃႈႁူမ်ႇၶူဝ်းၼွၼ်း ”- ဝႃႈၼႆ ။  

ယွၼ်ႉဝႃႈယၢမ်းလဵဝ် တီႈဝဵင်းဝၢၼ်ႈငႂ်ႈၼႆႉ ၵတ်းႁႅင်း။ ၵူၼ်းပၢႆႈၽေးသိုၵ်းသမ်ႉ လႆႈဢွၼ်ၵၼ် ၵႂႃႇၼွၼ်းၼႂ်းသူၼ်ၼႂ်းႁႆႈ။ ဢမ်ႇမီးၽႃႈမီးၽႅၼ်ႇ။ ဢမ်ႇမီးၶူဝ်းဢုၼ်ႇ လႄႈပဵၼ်ဢမ်ႇယူႇလီ ၵေႃႈၼမ် – ၼႆ ၼၢင်းယိင်း ၵေႃႉဢၼ်ၸွႆႈထႅမ်ၵူၼ်းပၢႆႈၽေးသိုၵ်းၼၼ်ႉလၢတ်ႈထႅင်ႈၼင်ႇၼႆ။

ပၢႆလိူဝ်လႆႈပၢႆႈၽေးသိုၵ်းသေ လႆႈယူႇလႆႈၵိၼ်တုၵ်ႉယၢၵ်ႈယၢပ်ႇၽိုတ်ႇယဝ်ႉ ၽွင်း လိူၼ်သႅမ်ႉထႅမ်ႊပိူဝ်ႊ ဝၼ်းတီႈ 23 ၼၼ်ႉ သိုၵ်းမၢၼ်ႈသမ်ႉပၢႆတီႉၺွပ်းဢဝ် ၵူၼ်းပၢႆႈၽေးသိုၵ်း ဢၼ်ယူႇဝႆႉၼႂ်းထိူၼ်ႇ ၾၢႆႇႁွင်ႇဝဵင်းဝၢၼ်ႈငႂ်ႈၼၼ်ႉ ၵႂႃႇၸွမ်းသၢႆသိုၵ်းၶဝ်  2 ၵေႃႉ ။  တေႃႇထိုင်ယၢမ်းလဵဝ် ပႆႇပွႆႇပွၵ်ႈမႃးၶိုၼ်း။ ဢမ်ႇလႆႈတၢင်းၵပ်းသိုပ်ႇသင်လႄႈ  ၵူၼ်းႁိူၼ်းလႄႈၵူၼ်းဝၢၼ်ႈဢွၼ်ၵၼ်မႆႈၸႂ်။

 ဝဵင်းဝၢၼ်ႈငႂ်ႈၼႆႉ မီးၼႂ်းမိူင်းတႆးပွတ်းၸၢၼ်း။ ပဵၼ်ဝဵင်းဢၼ်မီးလႅၼ်ၶႅၼ်ႈ မိူင်းတႆးလႄႈ တိူင်းတႃႈ လိူဝ်ႇ ။ မီးပိုၼ်ႉတီႈသၽႃႇဝ ႁၢင်ႈလီ ထိူၼ်ႇလိုၵ်ႉၼမ်ႉလိၼ်ႁိၼ်ၽႃၶႅမ်ႉ ၵၢၼ်ၽုၵ်ႇသွမ်ႈ ၵေႃႈပဵၼ်ၵၢၼ် လႄႈ မိူဝ်ႈၵွၼ်ႇၵူႈပွၵ်ႈ ဢမ်ႇမီးၸုမ်းလုၵ်ႉၽိုၼ်ႉ ဢမ်ႇတွၼ်ႉမီးပၢင်တိုၵ်းသိုၵ်းသိူဝ် – ပဵၼ်ဝဵင်းဢၼ်ၵတ်းယဵၼ်လိူဝ်ပိူၼ်ႈသုတ်း ၼႂ်းမိူင်းတႆး ပွတ်းၸၢၼ်းၼႆၵေႃႈဝႃႈလႆႈ။ ၵူၺ်းၵႃႈ ဝၢႆးသိုၵ်းမၢၼ်ႈယိုတ်းဢႃႇၼႃႇၸိုင်ႈမိူင်းၼႆႉ ၵူၼ်းၼုမ်ႇၼႂ်းၸႄႈဝဵင်းဝၢၼ်ႈငႂ်ႈ ဢမ်ႇယွမ်းႁပ်ႉလႆႈၸဝ်ႈဢႃႇၼႃႇသိုၵ်း – ဢွၼ်ၵၼ် ယိပ်းၵွင်ႈၵၢင်ႇ တေႃႇသူႈသိုၵ်းမၢၼ်ႈၶိုၼ်း။ သိုၵ်းၵူၼ်းၼုမ်ႇတၢင်းမိူင်းမၢၼ်ႈတူင်ႈပဵင်းၵေႃႈ လတ်းၽၢၼ်ႇၵႂႃႇမႃး တူင်ႉၼိုင်လႄႈ  ႁဵတ်းႁႂ်ႈသိုၵ်းမၢၼ်ႈ ထႅမ်ႁႅင်းသိုၵ်းၶဝ်ႈဝဵင်းသေ တဵၵ်းတဵင်ပေႉၵိၼ်ၵူၼ်းဝၢၼ်ႈၵူၼ်းမိူင်း။ တီႉၺွပ်း ၵူၼ်းဝၢၼ်ႈ- ဢဝ်ၵႂႃႇပေႃႉထုပ်ႉၶႃႈႁႅမ်တၢႆ ထိုင်တီႈဢမ်ႇမီးၽႂ်ၶႂ်ႈႁဵတ်းၵၢၼ်ပူၵ်းပွင်ဝၢၼ်ႈဢိူင်ႇတူင်ႇဝူင်းၸဝ်ႈၵဝ်ႇ။ ၵူၼ်းၼုမ်ႇ ၼႂ်းပိုၼ်ႉတီႈၵေႃႈဢွၼ်ၵၼ်ပၢႆႈဢွၵ်ႇဝၢၼ်ႈဢွၵ်ႇမိူင်း ။