ၸုမ်းသိုၵ်း 19 ၸုမ်း ဢၼ်သၢၼ်ၶတ်းသိုၵ်းမၢၼ်ႈယိုတ်းမိူင်းယူႇၼၼ်ႉ ႁူမ်ႈၵၼ်ၶွတ်ႇၽွတ်ႈ တပ်ႉႁူမ်ႈဢူၺ်းလီၵၢၼ်လုၵ်ႉၽိုၼ်ႉၶၢဝ်းႁွင် Spring Revolution Alliance – SRA ဝႃႈၼႆ။
ၸုမ်း SRA လႆႈၶွတ်ႇၽွတ်ႈပဵၼ်တၢင်းၵၢၼ်ယဝ်ႉသေ တေသိုပ်ႇၶဝ်ႈပၢင်တိုၵ်း လုၵ်ႉၽိုၼ်ႉသိုၵ်းမၢၼ်ႈၵႂႃႇၼႆ ပိုၼ်ၽၢဝ်ႇဢွၵ်ႇမႃး ၼႂ်း ဝၼ်းတီႈ 15/12/2025 ၼင်ႇၼႆ။
ၼႂ်းၼၼ်ႉ သိုၵ်းဢူၺ်းလီပွတ်းႁွင်ႇ 3ၸုမ်းလႄႈ ၸုမ်းသိုၵ်း ဢၼ်ယူႇတႂ်ႈ လူင်ပွင်ၸိုင်ႈၽွမ်ႉႁူမ်ႈၸိူဝ်ႉၸၢတ်ႈ NUG တႄႉ ဢမ်ႇပႃးသေၸုမ်း။
ၽူႈလဵပ်ႈႁဵၼ်းၵၢၼ်မိူင်းၵမ်ႈၽွင်ႈတႄႉ ထတ်းသၢင်လၢတ်ႈဝႃႈ – လွင်ႈၶွတ်ႇၽွတ်ႈ ပဵၼ်တပ်ႉဢူၺ်းလီၵၢၼ်လုၵ်ႉၽိုၼ်ႉၶၢဝ်းႁွင် ဢမ်ႇပႃးသိုၵ်းဢူၺ်းလီပွတ်းႁွင်ႇၼႆႉ ပဵၼ်တႃႇတေပူၼ်ႉၶွပ်ႇတႂ်ႈမိုဝ်းမိူင်းၶႄႇယိပ်းၵမ် ၼၼ်ႉ ဝႃႈၼႆ။
ၼႂ်းၸုမ်းသိုၵ်း 19 ၸုမ်းၼၼ်ႉ တပ်ႉသိုၵ်းပူတ်းပွႆႇၵူၼ်းမိူင်းမၢၼ်ႈ BPLA၊ တပ်ႉသိုၵ်းၵႅတ်ႇၶႄၸိူဝ်ႉၸၢတ်ႈယၢင်းလႅင် KNDF ဢၼ်ၸိုဝ်ႈလိုဝ်းဝႃႈ ပဵၼ်ၸုမ်းယၢမ်ႈႁူမ်ႈၸွမ်း သိုၵ်း ဢူၺ်းလီပွတ်းႁွင်ႇသေ လေႃႇတိုၵ်းသိုၵ်းမၢၼ်ႈၼၼ်ႉတႄႉ ၶဝ်ႈႁူမ်ႈပႃးၸွမ်းဝႆႉ။
တႃႇၶွတ်ႇၽွတ်ႈ တပ်ႉႁူမ်ႈဢူၺ်းလီၵၢၼ်လုၵ်ႉၽိုၼ်ႉၶၢဝ်းႁွင် SRA ၼႆႉ ၸဵမ်မိူဝ်ႈပူၼ်ႉမႃး လိူၼ်မေႊ သိုၵ်းလုၵ်ႉၽိုၼ်ႉ 7 ၸုမ်း လႆႈဢုပ်ႇဢူဝ်းၵၼ်ဢွၼ်တၢင်း။ ထိုင်မႃးၼႂ်းလိူၼ် ၼူဝ်ႊဝႅမ်ႊပိူဝ်ႊ သိုၵ်းလုၵ်ႉၽိုၼ်ႉ 14 ၸုမ်း ဢုပ်ႇဢူဝ်းၵၼ်သေ လႆႈၶေႃႈတူၵ်းလူင်းၵၼ်။ ဝၢႆးၼၼ်ႉဢမ်ႇႁိုင် ၸတ်းပၢင်ဢုပ်ႇဢူဝ်းၵၼ်ၶၢဝ်းတၢင်း 3ဝၼ်းသေ ၶွတ်ႇၽွတ်ႈလႆႈ တပ်ႉႁူမ်ႈဢူၺ်းလီၵၢၼ်လုၵ်ႉၽိုၼ်ႉၶၢဝ်းႁွင် SRA ၼႆႉ ဝႃႈၼႆ။
တႃႇတေယိပ်းၵမ်လႆႈ တပ်ႉၸုမ်းၸိူဝ်းၼႆႉ လႆႈၶွတ်ႇၽွတ်ႈဝႆႉၵေႃႇမတီႇၵမ်ၵၢၼ် ဢၼ်ပႃး ၽူႈတၢင်တူဝ်ၵူႈၸုမ်းသေ တေသိုပ်ႇတေႃႇသူႈၵႂႃႇ တႃႇလွင်ႈၽဵင်ႇပဵင်း၊ တႃႇလွတ်ႈလႅဝ်းထၢင်ႇႁၢင်ႈၼႆ ၵူဝ်ႇမိၼ်းႁၢၼ်ႇထႅတ်ႉ ၽူႈၶၢၼ်ပၢၵ်ႇ SRA တွပ်ႇလၢတ်ႈဝႆႉတီႈသိုဝ်ႇ BBC ၼင်ႇၼႆ။
19 ၸုမ်းၼၼ်ႉပဵၼ် 96 Soilders PDF၊ တပ်ႉသိုၵ်းမၢၼ်ႈ BA၊ BLDF၊ BPLA၊ သိုၵ်းၶျၢင်း CB၊ သိုၵ်းထၼု DPLF၊ ၸုမ်းသိုၵ်းတရူၼ်ႊ Force For Federal Democracy (FFD)၊ ၸုမ်းသိုၵ်း Generation Z Army (GZA)၊ သိုၵ်းယၢင်းလႅင် KNDF၊ ၸုမ်းသိုၵ်း ထုင်ႉၵၢတ်ႇလိုဝ်း KRF၊ ၸုမ်းသိုၵ်းၵူၼ်းမိူင်းမၵူၺ်း (Magway PDF)၊ ၸုမ်းသိုၵ်းမွၼ်း MSRF၊ ၸုမ်းသိုၵ်းပူတ်းပွႆႇၸိူဝ်ႉၸၢတ်ႈ NLA၊ တပ်ႉသိုၵ်းလွတ်ႈလႅဝ်းၵူၼ်းမိူင်း PIA၊ ၸုမ်းသိုၵ်းပဢူဝ်း – (PNDF-KK)/(PPDF-KD)၊ ၸုမ်းသိုၵ်း တိူင်းၸႄႈၵႅင်း (Sagaing PDF)၊ တပ်ႉသိုၵ်းလုၵ်ႈႁဵၼ်း SAF၊ တပ်ႉသိုၵ်းယေႃ YA လႄႈ တပ်ႉသိုၵ်းၵႅတ်ႇၶႄထုင်ႉလိၼ်ယေႃ YDF ၸိူဝ်းၼႆႉ ၼႆယဝ်ႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ