မိူဝ်ႈၼႆႉ ဝၼ်းတီႈ 17 လိူၼ်တီႊသႅမ်ႊပိူဝ်ႊ ယၢမ်းၵၢင်ဝၼ်း 1 မူင်းၶိုင်ႈ ၾႆးမႆႈႁၢၼ်ႉၶၢႆၼမ်ႉမၼ်းၸၢၵ်ႈ သဵင်ႇၼၵႃး (စိန်နဂါး) ဢၼ်မီးတီႈႁူဝ်ဝဵင်း ႁိမ်းၼွင်မူဝ် ၸႄႈဝဵင်းသႅၼ်ဝီ ၼိူဝ်သဵၼ်ႈတၢင်းလူင်ၵၢၼ်ၵႃႉၶၢႆ လႃႈသဵဝ်ႈ- မူႇၸေႊ- ၶျိၼ်ႊသူၺ်ႇႁေႃႇ မိူင်းတႆးပွတ်းႁွင်ႇ။
ၾႆးၵိုင်ႉၵၢင်ႉလုၵ်ႉမႆႈ ႁၢၼ်ႉၶၢႆၼမ်းမၼ်းၸၢၵ်ႈ ႁႅင်းၼႃႇလႄႈ တေႃႇထိုင်ယၢမ်းလဵဝ် ၵေႃႈ ၶႄၾႆးပႆႇမွတ်ႇလႆႈမူတ်းၼႆ ၼၢင်းယိင်းဢႃႇယု 30 ပၢႆ ၵေႃႉယူႇဝႆႉၼႂ်းဝဵင်းသႅၼ်ဝီ လၢတ်ႈ ၼႄတီႈၽူႈတွႆႇႁွၵ်ႈ ၼင်ႇၼႆ။
“ငိၼ်းဝႃႈ ၾႆးတႄႇမႆႈၵႂႃႇ ၽွင်းၵႃးသွင်လမ်း လၢႆႈၼမ်ႉမၼ်းပၼ်ၵၼ်ၼႆဢေႃႈ။ မိူဝ်ႈလဵဝ် လၢမ်းမႆႈပႃးၵႂႃႇ ႁိမ်းၶၢင်ႈႁၢၼ်ႉၶၢႆၼမ်ႉမၼ်းၼၼ်ႉထႅင်ႈယဝ်ႉ။ ၵႃးၶႄၾႆးတီႈဝဵင်းႁဝ်းၵေႃႈ ဢမ်ႇမီးၼမ်။ မႆႈႁႅင်းၼႃႇလႄႈ ၽႂ်ၵေႃႈဢမ်ႇႁတ်းၵႂႃႇၸမ်တေႉတေႉ။ ၵွပ်ႈၼၼ် ပႆႇလႆႈႁူႉ လွင်ႈလူႉသုမ်း မၢတ်ႇၸဵပ်းသင်။”
ယွၼ်ႉႁၢၼ်ႉၶၢႆၼမ်ႉမၼ်းၸၢၵ်ႈဢၼ်ၺႃးၾႆးမႆႈၼႆႉ မီးႁိမ်းၶၢင်ႈ သဵၼ်ႈတၢင်းလူင် ၵၢၼ်ၵႃႉၶၢႆ လႃႈသဵဝ်ႈ-မူႇၸေႊ-ၶျိၼ်ႊသူၺ်ႇႁေႃႇ လႄႈ ၾၢႆႇၸဝ်ႈ ၼႃႈတီႈ သိုၵ်းၵဝ်ႈၵၢင်ႉၶဝ် လႆႈဢိုတ်းသဵၼ်ႈတၢင်းဝႆႉ ဢမ်ႇပၼ်ရူတ်ႉၵႃး လတ်းၵႂႃႇမႃး ဝႃႈၼႆ။
မိူဝ်ႈပူၼ်ႉမႃး ဝၼ်းတီႈ 23 လိူၼ်ၵျူႊလၢႆႊၼၼ်ႉၵေႃႈ လုၵ်ႉတီႈၶႆႇၾႆး ဢၼ်ပူႇလၢၵ်ႈမေႃမိုဝ်းၶဝ် သေႃႇလဵၵ်း ၼႂ်းဝၢင်းႁၢၼ်ႉၶၢႆၼမ်ႉမၼ်းၸၢၵ်ႈသေ ၾႆးမႆႈၵႂႃႇ ႁၢၼ်ႉၶၢႆၼမ်ႉမၼ်းႁူဝ်ဝဵင်း ဢၼ်မီးၾၢႆႇတူၵ်းတၢင်းႁိမ်း ၼွင်မူဝ် တေႃႇၼႃႈၵၼ်တင်း ႁၢၼ်ႉၶၢႆၼမ်းမၼ်းၸၢၵ်ႈ ဢၼ်ၾႆးမႆႈယူႇယၢမ်းလဵဝ် ၼႆႉၼင်ႇၵဝ်ႇ။
ၽွင်းၼၼ်ႉ လုၵ်ႈၸၢႆး ၸဝ်ႈႁၢၼ်ႉ ၺႃးၾႆးႁုပ်ႇၵႂႃႇႁၢဝ်ႈႁႅင်း ထိုင်တီႈလူႉတၢႆ ။ လိူဝ်ၼၼ်ႉ ႁၢၼ်ႉၶၢႆၼမ်ႉမၼ်းၵေႃႈ ၾႆးမႆႈၵႂႃႇသဵင်ႈဢမ်ႇလိူဝ်သင်။ သုမ်းငိုၼ်းၵႂႃႇ ၼပ်ႉႁူဝ်မိုၼ်ႇသႅၼ်ပျႃး ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ