မိူဝ်ႈၼႆႉဝၼ်းတီႈ 16/12/2025 ယၢမ်းၵၢင်ဝၼ်း 12 မူင်းၶိုင်ႈ ၾႆးမႆႈႁၢၼ်ႉၼမ်ႉမၼ်းၸၢၵ်ႈ တီႈဝဵင်းဢေးတႃႇယႃႇ ၸိုင်ႈတႆးပွတ်းၸၢၼ်း ၵူၼ်းမၢတ်ႇၸဵပ်းၵႂႃႇၸွမ်း ၼိုင်ႈၵေႃႉ ၼႆယဝ်ႉ ။
ႁၢၼ်ႉၼမ်ႉမၼ်းၸၢၵ်ႈ ဢၼ်ၾႆးမႆႈၵႂႃႇၼၼ်ႉ မီးၶၢင်ႈသဵၼ်ႈတၢင်းလူင်ႁၢႆးဝေး ဢေးတႃႇယႃႇ- တူၼ်ႈတီး ၾၢႆႇလင်ႁၢၼ်ႉၶၢႆၼမ်ႉမၼ်း Excellent Power ဝႃႈၼႆ။
လႆႈႁူႉဝႃႈ ၾႆးတႄႇမႆႈႁၢၼ်ႉၶၢႆၼမ်ႉမၼ်းၸၢၵ်ႈၵႂႃႇ ၽွင်းၵူၼ်းၵေႃႉၼိုင်ႈ ႁုင်ၶဝ်ႈၽၵ်း တီႈႁွင်ႈလိုဝ်ႈၵူၼ်းၸၢႆး။ ႁဵတ်းႁႂ်ႈ ၾႆးၾႃႉသျွတ်ႉသေ ယွတ်ႈၾႆးၽုပ်ႉသႂ်ႇၵႃးတၢင်ႇၼမ်ႉမၼ်းလမ်းၼိုင်ႈလႄႈ သိုပ်ႇလၢမ်းမႆႈပႃး ပုင်းပေႇပႃႇဢၼ်သႂ်ႇၼမ်ႉမၼ်းဝႆႉ 50 ပုင်းသေ ၵူၼ်းၸၢႆးၵေႃႉၼိုင်ႈ မၢတ်ႇၸဵပ်းႁၢဝ်ႈႁႅင်း။ ယၢမ်းလဵဝ်ၽူႈမီးပုၼ်ႈၽွၼ်းၶဝ်ႁွင်ႉၵႂႃႇသူင်ႇယူတ်းယႃတူဝ်ဝႆႉ ၼႆယဝ်ႉ ။
ၸုမ်းၵႂႃႇၸွႆႈထႅမ်ၶႄၾႆးမႆႈ တီႈဝဵင်းတူၼ်ႈတီး လၢတ်ႈၽူႈတွႆႇႁွၵ်ႈဝႃႈ -“ၾႆးမႆႈယွၼ်ႉၾႆးၽႃႉသျွတ်ႉ။ တႄႇမႆႈၽွင်းၶဝ်ႁုင်ၵိၼ်ၽၵ်း တီႈႁွင်ႈၵူၼ်းၸၢႆးၶဝ်လိုဝ်ႈ။ ၽူႈၸတ်းၵၢၼ်တီႈႁၢၼ်ႉၶၢႆၼမ်ႉမၼ်းၼၼ်ႉၵေႃႉၼိုင်ႈ ၺႃးၾႆးႁုပ်ႇမၼ်း မိူဝ်ႈမၼ်းၶဝ်ႈၵႂႃႇၶႄႇၾႆး။ ၸဵပ်းႁႅင်းဝႆႉတၢၼ်ႇတၢၼ်ႇယူႇ။ မိူဝ်ႈလဵဝ်ႁွင်ႉၵႂႃႇယႃတူဝ်ဝႆႉယဝ်ႉ”- ဝႃႈၼႆ ။
ၵူၼ်းၵေႃႉမၢတ်ႇၸဵပ်းၵႂႃႇၼၼ်ႉ ၸိုဝ်ႈႁွင်ႉၵူဝ်ႇၸေႃႇထုၼ်း ဢႃႇယု 35 ပီ ၾႆးႁုပ်ႇတူဝ်မၼ်းၸၢႆးၵႂႃႇႁၢဝ်ႈႁႅင်း (ထိုင်ၸၼ်ႉလႆႈမႆႈၸႂ်ႁႅင်း) လႄႈ ယၢမ်းလဵဝ် ယူတ်းယႃတူဝ်ဝႆႉ တီႈႁူင်းယႃလူင်ၸဝ်ႈၸၢမ်ႇထုၼ်း ဝဵင်းတူၼ်ႈတီး ၼႆယဝ်ႉ။
မိူဝ်ႈဝၼ်းတီႈ 7 လိူၼ်ဢွၵ်ႉထူဝ်ႊပိူဝ်ႊ ၶၢဝ်းယၢမ်းမွၵ်ႈ 8 မူင်းပၢႆ ပူၼ်ႉမႃးၼၼ်ႉၵေႃႈ ၾႆးမႆႈႁိူၼ်းလင်ၼိုင်ႈ တီႈပွၵ်ႉ 10 ဝဵင်းဢေးသႃႇယႃႇ ဝႃႈၼႆ ။
ယွၼ်ႉၼၼ် ၼင်ႇႁိုဝ်တေလွတ်ႈၽေးၼၼ်ႉ သင်တေဢွၵ်ႇႁိူၼ်းၵႂႃႇတၢင်းၼွၵ်ႈၼႆၸိုင် ထုၵ်ႇလီၾၢင်ႉ မုၵ်ႉၾႆး၊ ၾႆးတဵၼ်း၊ ၾႆးၾႃႉတင်း ၾႆးသႅင်လႅတ်ႇ ၵူႈဢၼ်ဢၼ် ဝႃႈၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ