မိူဝ်ႈၼႆႉ ဝၼ်းတီႈ 16 လိူၼ်တီႊသႅမ်ႊပိူဝ်ႊ သိုၵ်းမၢၼ်ႈယိုတ်းမိူင်း ပိုၼ်ၽၢဝ်ႇဝႃႈ ၽူႈမီးၸၼ်ႉ ၼႂ်းတပ်ႉသိုၵ်းလွတ်ႈလႅဝ်းၶၢင် (KIO) ၵေႃႉၼိုင်ႈလႄႈ ၵူၼ်းၸိူဝ်းႁဵတ်းၵၢၼ်လုၵ်ႉၽိုၼ်ႉ 12 ၵေႃႉ ယႃႉၵဝ်းပၢင်လိူၵ်ႈတင်ႈလႄႈ ပိုတ်ႇလိူင်ႈ ဢဝ်တၢင်းၽိတ်းဝႆႉ ၼႆယဝ်ႉ။

ၵူၼ်းၸိူဝ်းထုၵ်ႇသိုၵ်းမၢၼ်ႈ ပိုတ်ႇလိူင်ႈဢဝ်တၢင်းၽိတ်းဝႆႉလူၺ်ႈပၵ်းပိူင်ၾိင်ႈမိူင်း ၵၢၼ်ယႃႉၵဝ်းပၢင်လိူၵ်ႈတင်ႈၼၼ်ႉ ပဵၼ်ၼႂ်းတပ်ႉၸုမ်းလုၵ်ႉၽိုၼ်ႉ ဢၼ်တူင်ႉၼိုင်ယူႇၼႂ်းမိူင်းတႆးပွတ်းႁွင်ႇ၊ မိူင်းယၢင်းလႅင်၊ မိူင်းၶၢင်၊ မိူင်းမွၼ်း လႄႈ တိူင်းတႃႈၵုင်ႈ ၸဵမ်ၸိူဝ်းၼႆႉ။

သိုၵ်းမၢၼ်ႈၼႆႉ ၶွတ်ႇၽွတ်ႈၸုမ်းပၵ်းတႃပႂ်ႉတူၺ်း ၵူၼ်းၸိူဝ်း တႅမ်ႈ၊ လၢတ်ႈ၊ ပိုၼ်ၽႄႈ၊ ပၼ်တၢင်းႁၼ်ထိုင် လွင်ႈပၢင်လိူၵ်ႈတင်ႈဢမ်ႇလီၼၼ်ႉသေ သွၵ်ႈႁႃ တီႉၺွပ်းၸဝ်ႈၶွင် ဢၵွင်ႉၾဵတ်ႉသ်ပုၵ်ႉ၊ တိၵ်းတွၵ်ႇ၊ ထႄႊလီႊၵရမ်ႊသေ ပိုတ်ႇလိူင်ႈဢဝ်တၢင်းၽိတ်းဝႆႉ။

ၼႂ်းလိၵ်ႈဢၼ်သိုၵ်းမၢၼ်ႈယိုတ်းမိူင်း ပိုၼ်ၽၢဝ်ႇဢွၵ်ႇၼၼ်ႉ တႅမ်ႈပႃးဝႆႉဝႃႈ “ပိုတ်ႇလိူင်ႈဢဝ်တၢင်းၽိတ်းဝႆႉ ၵူၼ်းၸိူဝ်းတူင်ႉၼိုင်ႁဵတ်းသၢင်ႈၵၢၼ်သၢၼ်ၶတ်းပၢင်လိူၵ်ႈတင်ႈ ၼႂ်းၸုမ်းၵူၼ်းၼုမ်ႇယၢင်းလႅင် (UKSY)” ၼႆယဝ်ႉ။

လိူဝ်ၼၼ်ႉ ဢူးၶျိတ်ႉထူၺ်း ၽူႈမီးၸၼ်ႉ ၼႂ်းၸုမ်းသိုၵ်းၶၢင် (KIO) ၵေႃႉယူႇဝၢၼ်ႈပၢင်လူင် ၸႄႈဝဵင်းမိူင်းယၢင်း ၸႄႈမိူင်းၶၢင်ၵေႃႈ ယွၼ်ႉသိုပ်ႇၾူၼ်းလၢတ်ႈ သူၼ်းသေႃႇ ယႃႇႁႂ်ႈပိုတ်ႇႁူင်းပၼ်သဵင် တႃႇပၢင်လိူၵ်ႈၼႆလႄႈ လႆႈဢဝ်တၢင်းၽိတ်းဝႆႉ ၼႆယဝ်ႉ။

တင်ႈတႄႇၸႂ်ႉတိုဝ်းပၵ်းပိူင်ၾိင်ႈမိူင်းၵၢၼ်ၵႅတ်ႇၶႄႇလွင်ႈယႃႉၵဝ်းပၢင်လိူၵ်ႈတင်ႈမႃး တေႃႇထိုင်ဝၼ်းတီႈ 29 လိူၼ်ဢွၵ်ႉထူဝ်ႊပိူဝ်ႊ ပိုတ်ႇလိူင်ႈဢဝ်တၢင်းၽိတ်းလူၺ်ႈၵၢၼ်ယႃႉၵဝ်းပၢင်လိူၵ်ႈတင်ႈၼႆႉ ၵူၼ်းၸိူဝ်းထုၵ်ႇဢဝ်လိူင်ႈ ၼၢင်းယိင်း မီး 5 ၵေႃႉ ၵူၼ်းၸၢႆးမီး 83 ၵေႃႉ ႁူမ်ႈသဵၼ်ႈမီးယူႇ 88 ၵေႃႉၼႆ သိုၵ်းမၢၼ်ႈယိုတ်းမိူင်းပိုၼ်ဢွၵ်ႇပဵၼ်တၢင်းၵၢၼ်ဝႆႉ ၼင်ႇ ၼႆ။

ၵူၺ်းဢိင်ၼိူဝ်ၸုမ်းၶၢဝ်ႇၽူႈတွႆႇႁွၵ်ႈ ၵဵပ်းႁွမ်တွမ်ၶေႃႈမုၼ်း ၵူၼ်းၸိူဝ်းထုၵ်ႇသိုၵ်းမၢၼ်ႈပိုတ်ႇလိူင်ႈ ဢဝ်တၢင်းၽိတ်းဝႆႉ လူၺ်ႈၾိင်ႈမိူင်းၵၢၼ်ယႃႉၵဝ်းပၢင်လိူၵ်ႈတင်ႈၼႆႉ မီးၵႂႃႇ 100 ၵေႃႉပၢႆယဝ်ႉ။

ၶွမ်ႊမသျိၼ်ႊၵမ်ၵၢၼ်ပၢင်လိူၵ်ႈတင်ႈ ပိုၼ်ၽၢဝ်ႇဢွၵ်ႇဝႆႉဝႃႈ ပႃႇတီႇၸိူဝ်းတေၶဝ်ႈႁူမ်ႈ လူင်းလိူၵ်ႈတင်ႈၸွမ်း ပၢင်လိူၵ်ႈတင်ႈပွၵ်ႈၼႆႉ တင်းသဵင်ႈမီးယူႇ 57 ပႃႇတီႇ။ တႃႇ 6 ပႃႇတီႇ ၼႆႉ မီးသုၼ်ႇၶဝ်ႈလိူၵ်ႈတင်ႈလႆႈ ၼႂ်းမိူင်းႁူမ်ႈတုမ်ပတ်းပိုၼ်ႉ။ ၼေႃႇၽွင်းတႅၼ်း တင်းသဵင်ႈမီးယူႇ 3591 ၵေႃႉ။ ပႃႇတီႇ 51 ၸုမ်းတႄႉ မီးသုၼ်ႇၶဝ်ႈလိူၵ်ႈတင်ႈလႆႈ ၼႂ်းၸႄႈမိူင်း လႄႈ ၸႄႈတိူင်းၵႂႃႇ ၼေႃႇၽွင်းတႅၼ်းတင်းသဵင်ႈမီး 966 ၵေႃႉ၊ ၼေႃႇၽွင်းတႅၼ်း ၸိူဝ်းတေၶဝ်ႈလိူၵ်ႈတင်ႈသုၼ်ႇတူဝ်သမ်ႉ မီးယူႇ 96 ၵေႃႉ။ ႁူမ်ႈသဵၼ်ႈ ၼေႃႇၽွင်းတႅၼ်း ၸိူဝ်းတေၶဝ်ႈလိူၵ်ႈတင်ႈၸွမ်း ပၢင်လိူၵ်ႈတင်ႈဢၼ်တေၸတ်းပွၵ်ႈၵမ်းၼႆႉ မီးယူႇ 5023 ၵေႃႉ ဝႃႈၼႆ။

ၵဵဝ်ႇလူၺ်ႈပၢင်လိူၵ်ႈတင်ႈၼႆႉသေ ၾၢႆႇၸုမ်းၶတ်းၶၢၼ်ႉ လႄႈ ၵူၼ်းၼုမ်ႇၸိူဝ်းႁဵတ်းၵၢၼ်လုၵ်ႉၽိုၼ်ႉ ၸဝ်ႈဢႃႇၼႃႇသိုၵ်းၶဝ် ပိုၼ်ၽၢဝ်ႇဢွၵ်ႇဝႆႉဝႃႈ တႄႇဝၼ်းတီႈ 28 လိူၼ်ဢွၵ်ႉထူဝ်ႊပိူဝ်ႊ တေႃႇထိုင် ဝၼ်းတီႈ 31 လိူၼ်တီႊသႅမ်ႊပိူဝ်ႊၼႆႉ ပဵၼ်ၶၢဝ်းႁဵတ်းလွင်ႈတူင်ႉၼိုင် သၢၼ်ၶတ်း တေႃႇပၢင်လိူၵ်ႈတင်ႈပွမ် ၶွင်သိုၵ်းမၢၼ်ႈယိုတ်းမိူင်း ၼႆယဝ်ႉ။

လိူဝ်ၼၼ်ႉ မိူဝ်ႈဝၼ်းတီႈ 9 လိူၼ်တီႊသႅမ်ႊပိူဝ်ႊ ၸုမ်းၸၢတ်ႈၸိုင်ႈလုမ်ႈၾႃႉယူႊရူပ်ႉ (EU) ၶဝ်ၵေႃႈ ပိုၼ်ၽၢဝ်ႇဢွၵ်ႇပဵၼ်တၢင်းၵၢၼ်ဝႆႉဝႃႈ ပၢင်လိူၵ်ႈတင်ႈဢၼ်သိုၵ်းမၢၼ်ႈတေၼမ်းၸတ်းႁဵတ်းၼႆႉ ဢမ်ႇမီးလွင်ႈၽဵင်ႇပဵင်း ဝႃႈၼႆ။