ဝၼ်းတီႈ 16/12/2025 မိူဝ်ႈၼႆႉယၢမ်းၵၢင်ၼႂ်ၸဝ်ႉမွၵ်ႈ 4 မူင်းၶိုင်ႈ တီႈဝဵင်းၵဵင်းမႂ်ႇၸိုင်ႈထႆး ႁႅင်းၵၢၼ်ယၢၼ်မိူင်းၵေႃႉၼိုင်ႈ ၸၵ်ႉဢဝ်ထူင်ပႃးၼၢင်းယိင်းၵေႃႉၼိုင်ႈသေလႅၼ်ႈပၢႆႈ ၺႃးပလိၵ်ႈထႆးလိုပ်ႈလမ်းၸွမ်းတီႉၺွပ်း။

မၼ်းၸၢႆးၸိုဝ်ႈ ၸၢႆးဢွင်ႇတဵင်းဢူး ပဵၼ်ႁႅင်းၵၢၼ်ယၢၼ်မိူင်း ဢၼ်ႁဵတ်းၵၢၼ်ဝႆႉတီႈ ဝဵင်းၵဵင်းမႂ်ႇ ၸိုင်ႈထႆး။

ၼႂ်ၼႆႉၵၢင်ၼႂ်ၸဝ်ႉ မၼ်းၸၢႆးၼုင်ႈသိူဝ်ႈလမ်တိုဝ်းမၢၵ်ႇႁူဝ်လမ်သေၶီႇရူတ်ႉၶိူင်ႈ ႁွၼ်ႊၻႃႊဝဵပ်ႉမႃးၸွမ်းသဵၼ်ႈတၢင်းႁူၺ်ႈၵႅဝ်ႈ။ ၽွင်းထိုင်မႃးၼႃႈၶွမ်ႊမၼီႊ “ၵျရိူၼ်ႊမေႃႊတႃႊ” ၼၼ်ႉ မၼ်းၸၢႆးၸၵ်ႉဢဝ်ထူင်ပႃးၼၢင်းဢွၼ်ႇၵေႃႉၼိုင်ႈ ဢၼ်တိုၵ်ႉပႆမႃးၶၢင်ႈတၢင်း။

မၼ်းၸၢႆးလႆႈထူင်ယဝ်ႉၶီႇရူတ်ႉပၢႆႈၵႂႃႇတၢင်းၼႃႈဝၼ်းဢွၵ်ႇ။

ၼႂ်းထူင်ၼၼ်ႉပႃးၶူဝ်းၶွင်ငိုၼ်းၶမ်းလႄႈ ဢၢႆႊၾူၼ်ႊ။

ၼၢင်းယိင်းဢွၼ်ႇၸဝ်ႈထူင်ၸႅင်ႈပလိၵ်ႈ။ ပလိၵ်ႈပိုတ်ႇသၼ်ယႃႊၾူၼ်ႊသေၸွမ်းႁႃၼႂ်းၶိူင်ႈ။ ထူပ်းႁၼ်သၼ်ယႃႊၾူၼ်ႊမီးတၢင်းၾင်ႇၼမ်ႉပိင်း ႁိမ်းၵၢတ်ႇလူင်။ ၽိူဝ်ႇၵႂႃႇတူၺ်းၵေႃႈ ထူပ်းႁၼ်ၸၢႆးဢွင်ႇတဵင်းဢူးၼၼ်ႉမီးႁိမ်းၾင်ႇၼမ်ႉပိင်းၼၼ်ႉတႄႉလႄႈ ၸင်ႇၶဝ်ႈၵုမ်းတီႉ – လႆႈၸႂ်ႉၶၢဝ်းယၢမ်း 15 မိၼိတ်ႉၵူၺ်း လႆႈၶိုၼ်းထူင်လႄႈၶူဝ်းၶွင်ဢၼ်မီးၵႃႈၶၼ်ၼႂ်းထူင်တင်းမူတ်း- ၼႆ သိုဝ်ႇၶၢဝ်ႇထႆး ၵဵင်းမႂ်ႇၼိဝ်းသ် ဢွၵ်ႇဝႆႉၼင်ႇၼႆ။

ယၢမ်းလဵဝ် ပလိၵ်ႈတီႉဢဝ်တူဝ် ၸၢႆးဢွင်ႇတဵင်းဢူးၼၼ်ႉ ၵုမ်းၶင်ဝႆႉၼႂ်းၶွၵ်ႈ ၽူးၽိင်း မိူင်းၵဵင်းမႂ်ႇဝႆႉယဝ်ႉလႆႈႁူႉၼင်ႇၼႆ။

ဝဵင်းၵဵင်းမႂ်ႇၸိုင်ႈထႆးၼႆႉ ပဵၼ်ဝဵင်းဢၼ်လီယူႇၵတ်းယဵၼ်လႄႈလွတ်ႈၽေးဝဵင်းၼိုင်ႈၼႂ်းလုမ်ႈၾႃႉ။ ၽွင်းပီ 2021-2022 ၼၼ်ႉ ၸုမ်းၵဵပ်းသဵၼ်ႈမၢႆၸိုင်ႈမိူင်းလွတ်ႈၽေး ပိုၼ်ၽၢဝ်ႇဝႃႈ မိူင်းၵဵင်းမႂ်ႇၼႆႉ ၼၢင်းယိင်းၵႂႃႇၸွမ်းတႃႈၸွမ်းတၢင်းၵေႃႉလဵဝ်ယၢမ်းၵၢင်ၶမ်ႈၵၢင်ၶိုၼ်းၵေႃႈဢမ်ႇမီးၽေး။ လႆႈဝႃႈပဵၼ်မိူင်းဢၼ်လွတ်ႈၽေးသုတ်းထိ 3 ၼႂ်းလုမ်ႈၾႃႉ ဝႃႈၼႆဝႆႉလူးၵွၼ်ႇ။