ႁူဝ်ၼႂ် 3 မူင်း 45 ၼၼ်ႉ ၸဝ်ႈၼႃႈတီႈထႆး လူင်းပိုၼ်ႉတီႈၵူတ်ႇထတ်း ၸွမ်းသဵၼ်ႈတၢင်း ဝူင်းဝႅၼ်ႁွပ်ႈ 2 ၼႂ်းဝဵင်းသရၽီး ၸႄႈတွၼ်ႈၵဵင်းမႂ်ႇ လႆႈႁၼ်ရူတ်ႉၽႃႇသွၼ်ႉၵၼ်ဝႆႉ ဢမ်ႇယွမ်း 3 လမ်း ၼိူဝ်ၶူဝ်ဢၼ်လတ်းတၢင်းရူတ်ႉၾႆးၵဵင်းသႅၼ် ။

ၸဝ်ႈၼႃႈတီႈထႆး ၵူတ်ႇထတ်းတူၺ်းၸွမ်းႁိမ်းႁွမ်း တီႈပဵၼ်ၽေးၵိုင်ႉၵၢင်ႉၼၼ်ႉသေ လႆႈႁၼ် ၵူၼ်းတူၵ်းၶူဝ် မၢတ်ႇၸဵပ်းႁၢဝ်ႈႁႅင်းဝႆႉ 2 ၵေႃႉ ၊ လႄႈ ၼိူဝ်ၶူဝ်ၼၼ်ႉထႅင်ႈ 4 ၵေႃႉ ။ၶူဝ်ၼၼ်ႉ သုင်မွၵ်ႈ 6 မဵတ်ႉ ။

ပွတ်းၼႂ် 14/12/2025 ၼၼ်ႉ ၸဝ်ႈၼႃႈတီႈ ၶူၼ်ႉႁႃႁၼ်ပႃးထႅင်ႈ ၶၢပ်ႈတူဝ်တၢႆ ၼၢင်းယိင်းၵေႃႉၼိုင်ႈ တႂ်ႈၶူဝ်ၼၼ်ႉ ပႆႇႁူႉၸိုဝ်ႈ ။

ၵၢင်ဝၼ်းၼၼ်ႉ ၸင်ႇလႆႈႁူႉဝႃႈ ပဵၼ်ၼၢင်းယိင်း ၸိုဝ်ႈႁွင်ႉ ၶုၼ်ၼရိုဝ်ႉမူၼ်ႊ ႁိုဝ်ဢမ်ႇၼၼ် ၼွင်ႉၶျူမ်းၽူႉ ဢႃယု 23 ယူႇဝၢၼ်ႈသီၻူင်ႊယဵၼ်ႊ ဝဵင်းသရၽီး ၸႄႈတွၼ်ႈၵဵင်းမႂ်ႇ။
ၼွင်ႉၶျူမ်းၽူႉၼႆႉ ပဵၼ်လုၵ်ႈယိင်း ႁႅင်းၵၢၼ်ယၢၼ်မိူင်း ၵူၼ်းဝဵင်းလၢႆးၶႃႈ ၸိုင်ႈတႆးပွတ်းၸၢၼ်း ၊ မၼ်းၼၢင်းၼႆႉ မႃးၵိူတ်ႇမိူင်းထႆး ။ မၼ်းၼၢင်းဢၢၼ်းၵႂႃႇၸွႆႈၵူၼ်းၸိူဝ်းထူပ်းၽေးၵိုင်ႉၵၢင်ႉၼၼ်ႉလႄႈ ၺႃးၵႃးမႃးၽႃႇသႂ်ႇ ထိုင်တီႈ သဵၼ်တူၵ်းၶူဝ် မၢတ်ႇၸဵပ်း လူႉတၢႆ ။

ၸၢႆးတႆးထိူၼ်ႇ ၽူႈၸွႆႈထႅမ် ႁႅင်းၵၢၼ်တႆး ဝဵင်းၵဵင်းမႂ်ႇ လၢတ်ႈတီႈၽူႈတွႆႇႁွၵ်ႈဝႃႈ –
ၼၢင်းယိင်းတႆးႁဝ်း တိုၵ်ႉၼုမ်ႇ တိုၵ်ႉမႅၼ်ႈၽွင်း ႁဵၼ်းယဝ်ႉ ၊ သမ်ႉမႃးပဵၼ်ၸိူင်ႉၼႆ လီသေးလၢႆၼႃႇ ။ ၵႃးၼႆႉ မၼ်းမႃးၽႃႇသွၼ်ႉၵၼ်ၼမ်ၼႃႇ ၊ မိူဝ်ႈလဵဝ်တႄႉ ဢဝ်ၶၢပ်ႈတူဝ်မၼ်းမႃးဝႆႉဝတ်ႉၵူႇတဝ်ႈ ။ ၵေႃႉဢၼ်ပဵၼ်ၽူဝ်မၼ်းၵေႃႈ ၺႃးၽႃႇမိူၼ်ၵၼ် ။ ၶႃဢၢင်ႈၵႂႃႇၸွႆႈၵူၼ်းထူပ်းၽေးၵိုင်ႉၵၢင်ႉၸိူဝ်းၼၼ်ႉ သမ်ႉၺႃးၵႃးၽႃႇသႂ်ႇ။ မိူဝ်ႈလဵဝ် ၽူဝ်မၼ်းၵေႃႈ မီးယူႇၼႂ်းႁူင်းယႃ ပဵၼ်ႁႅင်းဝႆႉ ” -ဝႃႈၼႆ။

တေပူၼ်ႉၶၢပ်ႈတူဝ် ၼွင်ႉၶျူမ်ႊၽူႉ ၼႂ်းဝၼ်းတီႈ 16/12/2025 ဝၼ်းဢင်းၵၢၼ်း ။ ပီႈၼွင်ႉလႄႈ ၵူၼ်းၸိူဝ်းၵဵဝ်ႇၶွင်ႈၸွမ်း ဢွၼ်ၵၼ် မႃးၸွႆႈၵၼ်လူႇတၢၼ်းယၢတ်ႇၼမ်ႉ ပၼ် ၼႆ ၸၢႆးတႆးထိူၼ်ႇသိုပ်ႇလၢတ်ႈ။
ၼွင်ႉၶျူမ်ႊၽူႉ ၼႆႉ ဢၢၼ်းၵႂႃႇၸွႆႈၵူၼ်းဢၼ်ထူပ်းၽေးသေ ၵိုင်ႉၵၢင်ႉလႆႈလူႉသဵင်ႈၵႂႃႇလႄႈ ၵူၼ်းထႆးဢၼ်ႁူႉလွင်ႈႁူႉတၢင်းၸွမ်း ဢွၼ်ၵၼ် ပဵၼ်ၸႂ်ဢမ်ႇလီလႄႈ ဢဝ်ၵုင်ႇမုၼ် ဢၼ်မၼ်းၼၢင်း မီးၸႂ်လီ ဢၢၼ်းၸွႆႈထႅမ်ၵူၼ်းၼမ် ။ မၼ်းၼၢင်း ပဵၼ်ၵူၼ်းမိူင်းလီ ၼႆ – လိုဝ်းယူႇၼႂ်းတူင်ႇထႆး ၼင်ႇၼႆ။