တီႈလႅၼ်လိၼ် ထႆး – မၢၼ်ႈၼႆႉ သိုၵ်းမၢၼ်ႈယိုတ်းမိူင်းၼႄၶေႃႈဢၢင်ႈ ၽဵဝ်ႈမူၺ်ႉၸုမ်းလွၵ်ႇလႅၼ်ၵိၼ်ငိုၼ်းၼိူဝ်ဢွၼ်ႊလၢႆႊ ၵျႃႊၽျႅၼ်ႉၼႆသေ ၵူၼ်ႇယႃႉပႅတ်ႈႁူင်းတိုၵ်းသုင် တင်းၼမ်။

ၼႂ်းၼၼ်ႉ ၶဝ်ႈပႃးဝႆႉဢွင်ႈတီႈၸိုဝ်ႈလိုဝ်းလင် မိူၼ်ၼင်ႇ KK Park၊ သူၺ်ႇၵူၵ်ႉၵူဝ်ႇ လႄႈ ၵျွၵ်ႉၶတ်ႉ။ ဢိင်ၼိူဝ်ၸုမ်းပၵ်းတႃပႂ်ႉတူၺ်း ဢွင်ႈတီႈၸုမ်းၵျႃႊၽျႅၼ်ႉတူင်ႉၼိုင် Cyber Scam Monitor လႄႈ Justice for Myanmar (JFM) ၶဝ် ၵဵပ်းၶေႃႈမုလ်းပိုၼ်ၽၢဝ်ႇဝႆႉၼၼ်ႉသေ သိုဝ်ႇ Myanmar Now ၶိုၼ်းႁၢႆးငၢၼ်းဝႆႉဝႃႈ ဢွင်ႈတီႈၸုမ်းၵျႃႊၽျႅၼ်ႉတူင်ႉၼိုင်တီႈလႅၼ်လိၼ် မီးဝႆႉ 42 တီႈ။ ႁူင်းတိုၵ်းၸိူဝ်းၼၼ်ႉ မီးဝႆႉတီႈၾင်ႇမႄႈၼမ်ႉသွင်ယၢင်း (သောင်ရင်းမြစ်) တႄႇတီႈဝဵင်းမႂ်ႇ သူၺ်ႇၵူၵ်ႉၵူဝ်ႇ ၾၢႆႇႁွင်ႇဝဵင်းမျႃႉဝတီႇ တေႃႇပေႃးထိုင် ဝဵင်း ဝေႃးလေႇမျႅင်ႇ (ဝေါ်လေမြိုင်) ၾၢႆႇၸၢၼ်းဝဵင်း မျႃႉဝတီႇ။

ဢွင်ႈတီႈၸုမ်းၵျႃႊၽျႅၼ်ႉႁဵတ်းၵၢၼ် 7တီႈၼႆႉ မီးဝႆႉ ၾၢႆႇႁွင်ႇဝဵင်းမျႃႉဝတီႇ၊ 14 တီႈသမ်ႉ မီးဝႆႉ ၾၢႆႇၸၢၼ်းဝဵင်းမျႃႉဝတီႇလႄႈ 21 တီႈသမ်ႉ မီးဝႆႉတီႈဝဵင်းမျႃႉဝတီႇ မိူင်းယၢင်းၽိူၵ်ႇ လႅၼ်လိၼ်တိတ်းၸပ်းၵၼ်ဝႆႉ တင်းမိူင်းထႆး။

ၼႂ်းၶူင်းၵၢၼ်ၵျႃႊၽျႅၼ်ႉၼၼ်ႉ ၵူၼ်းမိူင်းလၢႆလၢႆတီႈမႃးႁဵတ်းၵၢၼ်ဝႆႉသေ လွၵ်ႇလႅၼ်ၵိၼ်ငိုၼ်းၵူၼ်းမိူင်း ၼိူဝ်လုမ်ႈၾႃႉတင်းၼမ်။ ၶူင်းၵၢၼ်ၼႆႉ ၶွတ်ႇၽွတ်ႈပိူင်ဝႆႉလီငၢမ်း။ ၼွၵ်ႈလိူဝ်လွၵ်ႇလႅၼ်ၵိၼ်ငိုၼ်းယဝ်ႉ မီးပႃး ၵၢၼ်ၵႃႉၶၢႆၵူၼ်းထႅင်ႈ။

ၵၢၼ်ၵျႃႊၽျႅၼ်ႉၼႆႉ တႄႇလိုဝ်းလင်မႃး ၼႂ်းၼႃႈတီႈသိုၵ်းၵဝ်ႈၵၢင်ႉၵုမ်းၵမ် ၼႂ်းၸိုင်ႈတႆးပွတ်းႁွင်ႇ လႅၼ်လိၼ် တႆး-ၶႄႇ။ ဝၢႆးလင်ၼၼ်ႉ ၸွတ်ႇၽႄႈၵႂႃႇၼႂ်းမိူင်းႁူမ်ႈတုမ်မၢၼ်ႈလၢႆလၢႆတီႈ။ ယၢမ်းလဵဝ် ၼႃႈၵၢၼ်ၵျႃႊၽျႅၼ်ႉၼၼ်ႉ ၸိုဝ်ႈလိုဝ်းလင်ဝႆႉတီႈ လႅၼ်လိၼ် ထႆး-မၢၼ်ႈ။ မိူင်းဢဵၼ်ႁႅင်းယႂ်ႇလၢႆမိူင်းၵေႃႈ ၶဝ်ႈပႃးမႃးၼႂ်းၵၢၼ်ၽဵဝ်ႈမူၺ်ႉ။

ပူၼ်ႉမႃးပႆႇပေႃးႁိုင် မိူင်းဢမေႊရိၵၼ်ႊ ပိုၼ်ၽၢဝ်ႇၶွတ်ႇၽွတ်ႈၸုမ်းၽဵဝ်ႈမူၺ်ႉ ၵၢၼ်ၵျႃႊၽျႅၼ်ႉ (Scam Centre Strike Force)။ မိူၼ်ၼႆ ဝၼ်းတီႈ 9 ဝူင်ႈပူၼ်ႉမႃးၼႆႉ မိူင်းၶႄႇ ပိုၼ်ၽၢဝ်ႇဢွၵ်ႇသဵၼ်ႈၸိုဝ်ႈ ႁူဝ်ၼႃႈၸုမ်းၵျႃႊၽျႅၼ်ႉ 100 ၵေႃႉ။

ဝၢႆးလင်ၼၼ်ႉၼိုင်ႈဝၼ်း ၼႂ်းဝၼ်းတီႈ 10 ၼႆႉ သိုၵ်းမၢၼ်ႈၼႅတ်ႈၶွတ်ႇၽွတ်ႈၸုမ်းၽဵဝ်ႈမူၺ်ႉၵျႃႊၽျႅၼ်ႉသေ ပိုၼ်ၽၢဝ်ႇဝႃႈ တေၵႂၢတ်ႇလၢင်ႉတီႉၺွပ်း ၵူၼ်းလွၵ်ႇလႅၼ်ၵိၼ်ငိုၼ်း ၼိူဝ်ဢွၼ်ႊလၢႆႊ။ တေႁူမ်ႈၸွမ်း ၸုမ်းလူင်ပွင်ၸိုင်ႈၼွၵ်ႈမိူင်းသေ ႁဵတ်းသၢင်ႈၵႂႃႇၸွမ်းၵၼ်ထႅင်ႈ ဝႃႈၼႆ။