ႁႅင်းၵၢၼ်ၵူၼ်းမိူင်းမၢၼ်ႈ 200 ပၢႆ ၸိူဝ်းႁဵတ်းၵၢၼ်ဝႆႉ တီႈႁူင်းၵၢၼ်ႁဵတ်းမၢၵ်ႇႁူဝ် ၼႂ်းဝဵင်း သမုတ်ႊသႃၶွၼ်း မိူင်းထႆး ၺႃးၼၢႆးၼႃႈ (ပွႆးၸႃး) ၵူၼ်းမိူင်းမၢၼ်ႈၵေႃႉၼိုင်ႈ လႅၼ်ဢဝ် ငိုၼ်း ၵႃႈတေႃႇဝတ်းဝႂ်ၵႂႃႇ တႃႇငိုၼ်း 2 လၢၼ်ႉဝၢတ်ႇပၢႆ ဝႃႈၼႆ။

ၸုမ်းၾၢႆႇၸွႆႈထႅမ်ႁႅင်းၵၢၼ် (MHAC) လၢတ်ႈဝႃႈ – ၸဝ်ႈၶွင်ႁူင်းၵၢၼ်ၼႆႉ ပဵၼ်ၶႄႇ။ ၼၢႆႈၼႃႈ (ပွႆးၸႃး)ၼႆႉသမ်ႉ လွၵ်ႇလႅၼ်ဢဝ်ငိုၼ်းသေ ပၢႆႈဝႆႉ ႁိုင်ၶၢဝ်းတၢင်း 3 လိူၼ်ယဝ်ႉ၊ ယၢမ်းလဵဝ် ဝႂ်ၶႂၢင်ႉယူႇသဝ်းႁဵတ်းၵၢၼ် တႃႇႁႅင်းၵၢၼ် 200 ပၢႆၼၼ်ႉ မူတ်းဢႃယုဝႆႉ၊ ႁႅင်းၵၢၼ်ၶဝ်တုၵ်းယွၼ်း ႁႂ်ႈၸဝ်ႈၵၢၼ်ၸွႆႈဢဝ်ပုၼ်ႈၽွၼ်းပၼ်သေတႃႉ ၾၢႆႇၸဝ်ႈၵၢၼ် ဢမ်ႇၸွႆႈၵႄႈလိတ်ႈပၼ်သင် ဝႃႈၼႆ။

ၸွမ်းၼင်ႇ ႁႅင်းၵၢၼ်ၶဝ်ယွၼ်းတၢင်းၸွႆႈထႅမ်သေ ၼႂ်းဝၼ်းတီႈ 11/12/2025 ၼႆႉ ယူႇတီႈၸုမ်းၸွႆႈထႅမ်ႁႅင်းၵၢၼ် MHAC ၼႂ်းမိူင်းထႆး လႆႈၵႂႃႇတွင်ႈထၢမ်သေ တိူင်ႇလၢတ်ႈဝႆႉတီႈ ၽူႈမီးပုၼ်ႈၽွၼ်းၾၢႆႇထႆး။

ၾၢႆႇၼိုင်ႈသမ်ႉ လုမ်းၽွင်းတၢင်မိူင်းမၢၼ်ႈတီႈၵုင်းထဵပ်ႈ ပိုၼ်ၽၢဝ်ႇဝႆႉဝႃႈ – မီးႁႅင်းၵၢၼ်ၵူၼ်းမိူင်းမၢၼ်ႈၵမ်ႈၽွင်ႈ ႁဵတ်းၽိုၼ်လိၵ်ႈၽိုၼ်လၢႆး ဢၼ်ပွမ်သေ ယိုၼ်ႈတၢင်ႇတုၵ်းယွၼ်းငိုၼ်းၵႃႈသၢႆႈတႅၼ်းဝႆႉ ဝႃႈၼႆ။

ႁႅင်းၵၢၼ်မိူင်းမၢၼ်ႈ ၸိူဝ်းႁဵတ်းၵၢၼ်ဝႆႉယူႇတီႈၼႂ်းမိူင်းထႆးၼႆႉ သင်ဝႃႈပဵၼ်ၽေးၵိုင်ႉၵၢင်ႉ ၼႂ်းၶၢဝ်းယၢမ်းႁဵတ်းၵၢၼ် (ဢမ်ႇၼၼ်) ယွၼ်ႉလွင်ႈတၢင်းသေလွင်ႈလႄႈ လႆႈလူႉတၢႆ ၵႂႃႇၸိုင် ၵူၼ်းၼႂ်းမုင်ႉႁေႃႁိူၼ်း ၸိူဝ်းယူႇဝႆႉတီႈၼႂ်းမိူင်းထႆး မီးသုၼ်ႇတၢင်ႇၽိုၼ်လိၵ်ႈလၢႆး ယိုၼ်ႈယွၼ်းငိုၼ်းၵႃႈသၢႆႈတႅၼ်း ၼင်ႇဢၼ်ၵိုင်ႇလႆႈ။ ယူႇတီႈလုမ်းၽွင်းတၢင်မၢၼ်ႈ တေၵူတ်ႇထတ်းသေ ဢွၵ်ႇပၼ်လိၵ်ႈႁပ်ႉႁွင်း။

ၵူၺ်းၵႃႈ ယၢမ်းလဵဝ် မီးၵူၼ်းႁဵတ်းၽိုၼ်လိၵ်ႈ ဢၼ်ပွမ်သေ တၢင်ႇယိုၼ်ႈယွၼ်းငိုၼ်း ၵႃႈသၢႆႈတႅၼ်းဝႆႉ။ ယွၼ်ႉၼၼ် သင်ဝႃႈၵူတ်ႇထတ်းႁၼ် ၸိူဝ်းယိပ်းဝႆႉၽိုၼ်လိၵ်ႈလၢႆး ဢၼ်ပွမ်လႄႈ ၵူၼ်းႁဵတ်းဢွၵ်ႇပၼ်ၽိုၼ်လိၵ်ႈလၢႆးပွမ်ၼႆၸိုင် လုမ်းၽွင်းတၢင်မၢၼ်ႈ တေႁူမ်ႈတင်းၾၢႆႇၽူႈမီးပုၼ်ႈၽွၼ်းၶဝ်သေ ၵူတ်ႇထတ်းဢဝ်လိူင်ႈၵႂႃႇ ၼႆယဝ်ႉ။