ၸွမ်ၽွင်းလူင်ၸိုင်ႈထႆး ဢၼုထိၼ်ႊ ၶျၢၼ်ႊဝီႊရၵုၼ်ႊ လၢတ်ႈဝႃႈ ပၢင်တိုၵ်းတီႈလႅၼ်လိၼ်ထႆး- ၵမ်ႊပေႃႊတီႊယႃႊ တေသိုပ်ႇပဵၼ်ၵႂႃႇထႅင်ႈ- ယွၼ်ႉဝႃႈ ပႆႇလႆႈၶေႃႈတူၵ်းလူင်းၵိုတ်းတိုၵ်းဝႃႈၼႆ။

ၸွမ်ၽွင်းလူင်ၸိုင်ႈထႆးၸူဝ်ႈၶၢဝ်း ဢၼုထိၼ်ႊ ႁဵတ်းပၢင်သပ်းၸႅင်ႈၶၢဝ်ႇ မိူဝ်ႈဝႃး ဝၼ်းတီႈ 13/12/2025 သေလၢတ်ႈဝႃႈ မိူင်းၸိုင်ႈထႆး တေၵႅတ်ႇၶႄၵူၼ်းမိူင်းၵႂႃႇ။ ၵႃႈပႆႇလႆႈၶေႃႈတူၵ်းလူင်းၵိုတ်းတိုၵ်းတႄႉ တိုၼ်းတေသိုပ်ႇပိုတ်းယိုဝ်းၵႅတ်ႇၶႄဝၢၼ်ႈမိူင်းၵႂႃႇ ဝႃႈၼႆ။

လွင်ႈၼႆႉ မိူဝ်ႈဝၼ်းတီႈ 12/12/2025 ၼၼ်ႉ ၸွမ်ၸိုင်ႈမိူင်းဢမေႊရိၵၼ်ႊ ၻေႃႊၼႄႊလ်ထရမ်ႉ ပိုၼ်ၽၢဝ်ႇလၢတ်ႈဝႃႈ – လႆႈသိုပ်ႇၾူၼ်ႊဢုပ်ႇၵၼ်တင်း ၸွမ်ၽွင်းလူင် မိူင်းထႆးလႄႈတင်းမိူင်းၵမ်ႊပေႃႊတီႊယႃႊယဝ်ႉ။ တူၵ်းလူၵ်းလႆႈၸႂ်ၵိုတ်းတိုၵ်းၵၼ်ယဝ်ႉ – ဝႃႈၼႆသေတႃႉ – ထိုင်မႃးဝၼ်းတီႈ 13/12/2025 ၵေႃႈ ၸွမ်ၽွင်းလူင်ၸိုင်ႈထႆး တိုၵ်ႉလၢတ်ႈတီႈပၢင်သပ်းၸႅင်ႈၶၢဝ်ႇ ဝႃႈ တေသိုပ်ႇတိုၵ်းၵၼ်ယူႇဝႃႈၼႆထႅင်ႈ ။

တႄႇဝၼ်းတီႈ 7/12/2025 မႃးသိုၵ်းထႆးလႄႈ ၵမ်ႊပေႃႊတီႊယႃႊ တႄႇပိုတ်းယိုဝ်းတိုၵ်းတေႃးၵၼ်မႃးၶိုၼ်းႁၢဝ်ႈႁႅင်း ။ တႄႇဢဝ်ၼၼ်ႉမႃး တေႃႇထိုင်ဝၼ်းတီႈ 13/12/2025 ၼႆႉၵူၼ်းသိုၵ်းၾၢႆႇထႆးတၢႆ 15 ၵေႃႉ မၢတ်ႇၸဵပ်း 270 ၵေႃႉယဝ်ႉ။ ၵူၼ်းမိူင်းထႆးၸိူဝ်းယူႇၸွမ်းလႅၼ်လိၼ် တၢႆ 7 ၵေႃႉ။ လႆႈၶၢႆႉပၢႆႈတီႈယူႇယွၼ်ႉပၢင်တိုၵ်း မီးယူႇ 263105 ၵေႃႉ။ လူင်ပွင်ၸိုင်ႈထႆး ပိုတ်ႇပၼ်ပၢင်သဝ်းၵူၼ်းပၢႆႈၽေးသိုၵ်း မီးယူႇ 970 တီႈ ။

ယွၼ်ႉပိူဝ်ႈၼႆႉသေ ထႆးသင်ႇပိၵ်ႉလၢၼ်ႇလႅၼ်လိၼ်ထႆး-ၵမ်ႊပေႃႊတီႊယႃႊ ဝႆႉမူတ်းယဝ်ႉ။ ၵူၼ်းမိူင်းၵမ်ႊပေႃႊတီႊယႃႊဢၼ်ႁဵတ်းၵၢၼ်ယူႇမိူင်းထႆးလႄႈသင် ၵူၼ်းမိူင်းထႆး ဢၼ်ႁဵတ်းၵၢၼ်ယူႇၼႂ်းၵမ်ႊပေႃႊတီႊယႃႊၼၼ်ႉလႄႈသင် – ယႃႇၽူမ်ႈတူင်ႉၼိုင်ၵႂႃႇမႃးတၢင်းလႂ်။ ႁႂ်ႈပႂ်ႉထွမ်ႇတူၺ်းငဝ်းလၢႆးပၢင်တိုၵ်းသိုၵ်းသိူဝ်လႄႈ လွင်ႈၵိုတ်းတိုၵ်းၵၼ် ဢမ်ႇၼၼ်ၶေႃႈပိုၼ်ၽၢဝ်ႇလူင်ပွင်ၸိုင်ႈဢၼ်တေဢွၵ်ႇမႃးသေလူးၵွၼ်ႇ- ဝႃႈၼႆဝႆႉ။