ပၢင်လိူၵ်ႈတင်ႈ ဢၼ်တေၸတ်းႁဵတ်းၼႂ်းႁၢင်လိူၼ်တီႊသႅမ်ႊပိူဝ်ႊၼႆႉ သိုၵ်းမၢၼ်ႈယိုတ်းမိူင်း ၸုမ်းဢၼ်ၸႂ်ႉ ႁိူဝ်းမိၼ်ၶႃႈႁႅမ်ၵူၼ်းမိူင်း ၸိူဝ်းယူႇသဝ်းၼႂ်းမိူင်းႁူမ်ႈတုမ် လူႉတၢႆၵႂႃႇ ပဵၼ်ၵေႃႇပဵၼ်ၵွင်ၼၼ်ႉ တေၼမ်းၸတ်းၼႆလႄႈ ၵူၼ်းမိူင်းပိုၼ်ႉတီႈ ၼႂ်းၸႄႈတိူင်းၸၵႅင်း မိူင်းမၢၼ်ႈထုင်ႉပဵင်း ဢွၼ်ၵၼ် တႅမ်ႈလိၵ်ႈသၢၼ်ၶတ်း ဢွၵ်ႇၼႄၵၢင်ၸႂ်။
မိူဝ်ႈဝႃးဝၼ်းတီႈ 12 လိူၼ်တီႊသႅမ်ႊပိူဝ်ႊ ၸုမ်းတူင်ႉၼိုင်သၢၼ်ၶတ်းတေႃႇသိုၵ်းမၢၼ်ႈယိုတ်းမိူင်းၼမ်းၼႃႈ ၵူၼ်းမိူင်းၼႂ်းပိုၼ်ႉတီႈသေ ႁူမ်ႈၵၼ်ၸတ်းပၢင်ၼႄၵၢင်ၸႂ် သၢၼ်ၶတ်းပၢင်လိူၵ်ႈတင်ႈၵႂႃႇ ၼႂ်းၸႄႈဝဵင်းယိၼ်းမႃႇပိၼ်ႇ ၼႆယဝ်ႉ။
ၵူၼ်းမိူင်း လႄႈ ၸုမ်းတူင်ႉၼိုင်သၢၼ်ၶတ်းသိုၵ်းမၢၼ်ႈ တႅမ်ႈလိၵ်ႈတူဝ်ယႂ်ႇယႂ်ႇ သႂ်ႇၼိူဝ်ၽႅၼ်ႇၽိူၵ်ႇ ၽႅၼ်ႇလမ်ဝႆႉဝႃႈ “ယႃႇဢဝ်သဵင်ၵၢင်ၸႂ်ၸဝ်ႈၵဝ်ႇ ၵႂႃႇၵမ်ႉယၼ်ပၼ်ႁႂ်ႈသိုၵ်းမၢၼ်ႈ မီးသုၼ်ႇၶႃႈႁႅမ်ၵူၼ်းတၢႆလႆႈ ပဵၼ်တၢင်းၵၢၼ်” ဝႃႈၼႆ။
ၽွင်းၸတ်းပၢင်ၼႄၵၢင်ၸႂ်ၼၼ်ႉ ၵူၼ်းၸိူဝ်းၶဝ်ႈပႃးတူင်ႉၼိုင်ၸွမ်း ဢွၼ်ၵၼ် ယုၵ်ႉမိုဝ်းသၢမ်ၼိဝ်ႉသေ ႁွင်ႉပၢဝ်ႇသေႃႇထႅင်ႈဝႃႈ – ယႃႇပၼ်ႁႅင်း ပၢင်လိူၵ်ႈတင်ႈ လၢႆးတၢင်းၾႅတ်ႉသိၵ်ႉသ် ႁႂ်ႈပဵၼ်သဵၼ်ႈတၢင်းလွတ်ႈ တႃႇသိုၵ်းမၢၼ်ႈယိုတ်းမိူင်း ၼႆယဝ်ႉ။
လိူဝ်ၼၼ်ႉ ယင်းႁူမ်ႈၵၼ် ဢွၵ်ႇသဵင်တုၵ်းယွၼ်း ႁႂ်ႈပွႆႇပၼ်ၶိုၼ်း ၽူႈဢွၼ်ႁူဝ် လႄႈ ၵူၼ်းၸိူဝ်းတူင်ႉၼိုင် ၵၢၼ်မိူင်းတင်းသဵင်ႈ ဢၼ်သိုၵ်းမၢၼ်ႈ တီႉၺွပ်းဝႆႉၼၼ်ႉ ၼႆယဝ်ႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ