မိူဝ်ႈဝႃးဝၼ်းတီႈ 28 လိူၼ်တီႊသႅမ်ႊပိူဝ်ႊ သိုၵ်းမၢၼ်ႈယိုတ်းမိူင်းၸတ်းႁဵတ်းပၢင်လိူၵ်ႈတင်ႈၵႂႃႇ ၼႂ်းဝဵင်းမူႇ ၸေႊ မိူင်းတႆးပွတ်းႁွင်ႇ ။ ၵူၼ်းမိူင်းၸိူဝ်းယူႇၼႂ်းဝဵင်းမူႇၸေႊ ၵႂႃႇပၼ် သဵင် တီႈႁူင်းပၼ်သဵင် မီးမွၵ်ႈ 1 ပုၼ်ႈ ၵူၺ်းသေ သိုၵ်းမၢၼ်ႈယိုတ်းမိူင်းၸႂ်ႉ ၶႅပ်းၵၢင်ၸႂ်လူင်ႈၼႃႈ ဢဝ်ပေႉပႃႇတီႇတၢင်ႇၸုမ်းၵိၼ်ၶၢတ်ႇၵႂႃႇ ၼႆယဝ်ႉ။

ၼႂ်းဝၼ်းပၢင်လိူၵ်ႈတင်ႈတီႈဝဵင်းမူႇၸေႊၼႆႉ ပႃႇတီႇသၢင်ႇသီႈ USDP ၶွင်သိုၵ်းမၢၼ်ႈယိုတ်းမိူင်း လႆႈၶႅပ်းၵၢင်ၸႂ်ၵႂႃႇ ၼမ်လိူဝ်ပိူၼ်ႈသုတ်းၼႆ ၵူၼ်းမိူင်းၵေႃႉယူႇၼႂ်းဝဵင်းမူႇၸေႊ လၢတ်ႈၼႄၼင်ႇၼႆ။

“ပႃႇတီႇၸိူဝ်းမႃးၶဝ်ႈလိူၵ်ႈတင်ႈၶႅင်ႇၵၼ်ၼႂ်းဝၼ်းပၢင်လိူၵ်ႈတင်ႈၼႆႉ ပေႃးႁုပ်ႈတူၺ်းၼႆ ၶဝ်ပဵၼ်ဢၼ်လဵဝ် ၵၼ်ၵူၺ်း။ ၽႂ်ပေႉၵေႃႈ ႁဝ်းၵူၼ်းမိူင်းတႄႉ ဢမ်ႇသိူဝ်း၊ ဢမ်ႇၸူမ်းတေႉတေႉ။ ဢမ်ႇၸၢင်ႈႁဵတ်းႁိုဝ်လႄႈ ၵႃႈလႆႈၵႂႃႇသႂ်ႇၵူၺ်း။ ၶႅပ်းၵၢင်ၸႂ်လူင်ႈၼႃႈၶဝ်ၼႆႉ တီႈမူႇၸေႊႁဝ်း မီးၼပ်ႉပဵၼ်ႁူဝ်မိုၼ်ႇမၼ်းလႄႇ။ ယဝ်ႉတီႈ ဝဵင်းမူႇၸေႊႁဝ်းၼႆႉ ၶႄႇၵေႃႈၼမ်ၼႃႇ။ ၶႄႇၸိူဝ်းၼႆႉသမ်ႉ ၶဝ်သႂ်ႇပၼ်ပႃႇတီႇသၢင်ႇသီႈၵူၺ်းလူး။”

ၽွၼ်းပၢင်ႈၶေႃႈတွပ်ႇ ၵၢၼ်လိူၵ်ႈတင်ႈ ၼႂ်းဝဵင်းမူႇၸေႊ ဢၼ်လႆႈမႃးၼႂ်းဝၼ်းပၢင်လိူၵ်ႈတင်ႈၼၼ်ႉ ပႃႇတီႇသၢင်ႇသီႇ လႆႈၶႅပ်းသဵင်ၵၢင်ၸႂ်တႃႇသၽႃးၵူၼ်းမိူင်း 12950 ၶႅပ်း၊ သၽႃး ၸိူဝ်ႉၸၢတ်ႈ လႆႈ 13646 ၶႅပ်း၊ သၽႃးၸႄႈမိူင်း 12523 ၶႅပ်း ။ ပႃႇတီႇသိူဝ်ၽိူၵ်ႇ (SNDP) လႆႈၶႅပ်းသဵင်ၵၢင်ၸႂ်တႃႇသၽႃးၵူၼ်းမိူင်း 11631 ၶႅပ်း၊ သၽႃးၸိူဝ်ႉၸၢတ်ႈ 9003 ၶႅပ်း လႄႈ သၽႃးၸႄႈမိူင်း လႆႈ 12027 ၶႅပ်း ၼႆယဝ်ႉ။

ပၢင်လိူၵ်ႈတင်ႈ ဢၼ်သိုၵ်းမၢၼ်ႈယိုတ်းမိူင်းၸတ်းႁဵတ်းပီ 2025-2026 ၼႆႉ ၶွမ်ႊမသျိၼ်ႊၵမ်ၵၢၼ် ပၢင်လိူၵ်ႈတင်ႈမိူင်းႁူမ်ႈတုမ် ၸႂ်ႉတိုဝ်းၶိူင်ႈၸၢၵ်ႈ MEVM သေ ႁႂ်ႈၵူၼ်းမိူင်းပၼ်သဵင် တွတ်ႈၶႅပ်းၵၢင်ၸႂ်ၵႂႃႇ။