ႁူဝ်ၼႃႈသိုၵ်းမၢၼ်ႈယိုတ်းမိူင်း ၸွမ်ၸိၵ်းသိုၵ်းမိၼ်းဢွင်ႇလၢႆႇ လၢတ်ႈဝႃႈ – ၼႂ်းလိူၼ်မၢတ်ႉၶျ် ပီ 2026 ပီၼႃႈၼႆႉ တေလႅၵ်ႈလၢႆႈလူင်ပွင်ၸိုင်ႈမႂ်ႇယဝ်ႉ ဝႃႈၼႆ။ လွင်ႈၼႆႉ မိၼ်းဢွင်ႇလၢႆႇ လၢတ်ႈၵႂႃႇ ၽွင်းမိူဝ်ႈႁူပ်ႉထူပ်းၵၼ်တင်း ၸုမ်းလူင်ပွင်ၸိုင်ႈတိူင်းယၢၼ်ႇၵုင်ႇ ၼႂ်းဝၼ်းတီႈ 11 လိူၼ်တီႊသႅမ်ႊပိူဝ်ႊ (မိူဝ်ႈဝႃး)ၼႆႉ။

ပၢင်လိူၵ်ႈတင်ႈ ဢၼ်သိုၵ်းမၢၼ်ႈတေဢွၼ်ၼမ်းၸတ်းႁဵတ်းၼႆႉ ၶၵ်ႉတွၼ်ႈၼိုင်ႈ တေပဵၼ် ဝၼ်းတီႈ 28 လိူၼ်တီႊသႅမ်ႊပိူဝ်ႊ ပီ 2025။ ၶၵ်ႉတွၼ်ႈသွင် တေပဵၼ် ဝၼ်းတီႈ 11 လိူၼ်ၵျႅၼ်ႊၼိဝ်ႊရီႊ ပီ 2026 လႄႈ ၶၵ်ႉတွၼ်ႈသၢမ်သမ်ႉ တေပဵၼ် ဝၢႆးလင်ၼၼ်ႉသွင်ဝူင်ႈ (တေမႅၼ်ႈဝၼ်းတီႈ 25 လိူၼ်ၵျႅၼ်ႊၼိဝ်ႊရီႊ) လိူၼ်ၼႃႈ။

သင်ဝႃႈ ၸတ်းပၢင်လိူၵ်ႈတင်ႈ ယဝ်ႉတူဝ်ႈလီငၢမ်းယဝ်ႉၼႆ တေႁွင်ႉသၽႃးသေ ၶွတ်ႇၽွတ်ႈလူင်ပွင်ၸိုင်ႈမႂ်ႇ၊ တေမွပ်ႈပၼ်ဢႃႇၼႃႇ ၸတ်းပွင်ဝၢၼ်ႈမိူင်းၵႂႃႇၼႆ ၸွမ်ၸိၵ်းသိုၵ်း မိၼ်းဢွင်ႇလၢႆႇ လၢတ်ႈၵႂႃႇၼင်ႇၼႆ။

ၼႂ်းမိူင်းႁူမ်ႈတုမ်မၢၼ်ႈပတ်းပိုၼ်ႉၼႆႉ မီးယူႇ 330 ၸႄႈဝဵင်း၊ ဢၼ်တေၸတ်းႁဵတ်းပၢင်လိူၵ်ႈတင်ႈၼႆႉ မီးဝႆႉ 274 ၸႄႈဝဵင်း ၵေႃႇမသျိၼ်ႇၵမ်ၵၢၼ်ပၢင်လိူၵ်ႈတင်ႈသိုၵ်းမၢၼ်ႈ ပိုၼ် ၽၢဝ်ႇပဵၼ်တၢင်းၵၢၼ်ဝႆႉ။ လိူဝ်ၼၼ်ႉ ၸႄႈဝဵင်းမၢင်တီႈၼႆႉ တေၸၢင်ႈၸတ်းပၢင်လိူၵ်ႈတင်ႈလႆႈၼိူဝ်ဝဵင်းၵူၺ်း။ ၼႂ်းၼႃႈတီႈသိုၵ်းၸၢဝ်းၶိူဝ်း လႄႈ ၸုမ်းလုၵ်ႉၽိုၼ်ႉၶဝ်ၵုမ်းၵမ်ဝႆႉတႄႉ တေဢမ်ႇၸၢင်ႈၸတ်း ဝႃႈၼႆ။

သိုၵ်းမၢၼ်ႈ ၶိုင်ဢၢၼ်းႁဵတ်းပၢင်လိူၵ်ႈတင်ႈယူႇမႅၵ်းမႅၵ်းသေတႃႉ ၾၢႆႇၼိုင်ႈသမ်ႉ ၸုမ်းလုၵ်ႉၽိုၼ်ႉလႄႈ သိုၵ်းၸၢဝ်းၶိူဝ်းၶဝ်တႄႉလၢတ်ႈဝႃႈ ပဵၼ်ပၢင်လိူၵ်ႈတင်ႈပွမ်ၵူၺ်း ဢမ်ႇပဵၼ်တၢင်းၵၢၼ်။ ယွၼ်ႉၼၼ် ၵူၼ်းမိူင်းယႃႇပေၶဝ်ႈႁူမ်ႈၸွမ်း၊ ၸိူဝ်းႁူမ်ႈသိုၵ်းမၢၼ်ႈတူင်ႉၼိုင်ၸွမ်းၵေႃႈ တေဢဝ်တၢင်းၽိတ်းၼၵ်းၼႃၵႂႃႇၼႆ ပိုၼ်ၽၢဝ်ႇတိုၵ်းသူၼ်းဝႆႉ ၼင်ႇၼႆ။