ဝၼ်းတီႈ 11/12/2025 ၼႆႉ ၸုမ်းၶဝ်ႈၼမ်ႉတၢင်းၵိၼ်လုမ်ႈၾႃႉ WFP ပၼ်ၾၢင်ႉဝႃႈ – ၼႂ်းပီ 2026 ပီၼႃႈၼႆႉ ႁူဝ်ၼပ်ႉၵူၼ်းမိူင်းႁူမ်ႈတုမ်မၢၼ်ႈ တႃႇ 12 လၢၼ်ႉပၢႆ ၸၢင်ႈၺႃး ၽေးဢိုပ်းယၢၵ်ႈ ၶဝ်ႈၼမ်ႉတၢင်းၵိၼ် ဢမ်ႇၵုမ်ႇထူၼ်ႈ ဝႃႈၼႆ။

ယွၼ်ႉပၼ်ႁႃပတိၵ်ႈၶၢတ်ႈ ၼႂ်းမိူင်းႁူမ်ႈတုမ်မၢၼ်ႈႁၢဝ်ႈႁႅင်းၶိုၼ်ႈမႃး၊ ႁူဝ်ၼပ်ႉၵူၼ်း ၸိူဝ်းလႆႈပၢႆႈၽၢတ်ႇ ႁိူၼ်းယေးတီႈယူႇ ၼမ်ၶိုၼ်ႈမႃးလႄႈ ႁဵတ်းႁႂ်ႈငဝ်းလၢႆးၵၢၼ်ႁႃၵိၼ် လဵင်ႉတွင်ႉ ၵပ်ႉၵိၼ်းၶၢၼ်ၸႂ်မႃး။ ၸိူဝ်းပဵၼ် မႄႈလုၵ်ႈဢွၼ်ႇ ဢမ်ႇၸၢင်ႈသိုဝ်ႉၵိၼ်တၢင်းၵိၼ်တၢင်းယႅမ်ႉ ဢၼ်မႅၼ်ႈၸွမ်းပၢႆးယူႇလီ၊ လုၵ်ႈဢွၼ်ႇၼပ်ႉႁူဝ်ႁဵင်ၵေႃႉၵေႃႈ ဢမ်ႇလႆႈၵိၼ် ဢၼ်မီးဢႃႇႁႃႇရတဵမ်ထူၼ်ႈ။ မႄႈလုၵ်ႈဢွၼ်ႇလႄႈ လုၵ်ႈဢွၼ်ႇ တႃႇ 4 သႅၼ်ပၢႆ လႆႈႁူပ်ႉၽေး ဢမ်ႇလႆႈၵိၼ်တၢင်းၵိၼ်ဢိမ်ႇတဵမ်ထူၼ်ႈ၊ လႆႈၵိၼ်ၶဝ်ႈလၢႆ ဢမ်ႇၼၼ် ၶဝ်ႈတူမ်ႈ ၶဝ်ႈႁုင်လႅဝ်ၵူၺ်း ဝႃႈၼႆ။

ၸွမ်းၼင်ႇ UNOCHA ပိုၼ်ၽၢဝ်ႇဝႆႉၵမ်းလိုၼ်းသုတ်းၼႆႉ ႁူဝ်ၼပ်ႉၵူၼ်းမိူင်းႁူမ်ႈတုမ်မၢၼ်ႈ ၸိူဝ်းပၢႆႈဢွၵ်ႇမိူင်း ယၢမ်းလဵဝ်ၼႆႉ မီး 3.6 လၢၼ်ႉၵေႃႉ။ ၶၢတ်ႈလၢမ်းဝႆႉဝႃႈ တေႃႇထိုင် ၼႂ်းပီတေမႃးၼႆႉ တေတိူဝ်းၼမ်ၶိုၼ်ႈမႃးထိုင် 4 လၢၼ်ႉၵေႃႉ။

ၼႂ်းပီၼႃႈ 2026 ၵူၼ်းမိူင်းႁူမ်ႈတုမ်မၢၼ်ႈ ၸိူဝ်းယၢပ်ႇၵိၼ်းၶၢၼ်ၸႂ်လူဝ်ႇတၢင်းၸွႆႈထႅမ် ၸၢင်ႈမီး 12 လၢၼ်ႉပၢႆၼၼ်ႉ ယူႇတီႈၸုမ်း WFP ယိူင်းဢၢၼ်းတေၸွႆႈထႅမ်ပၼ်ၵႂႃႇ တႃႇ 1.3 လၢၼ်ႉပၢႆလႄႈ လူဝ်ႇငိုၼ်း ဢမေႊရိၵၼ်ႊ တေႃႊလႃႊ 125 လၢၼ်ႉ ဝႃႈၼႆ။