တီႈၵဵတ်ႉလၢၼ်ႇ ၼိူဝ်သဵၼ်ႈတၢင်း ႁူဝ်ပူင်း – တူၼ်ႈတီးၸိုင်ႈတႆးပွတ်းၸၢၼ်းၼၼ်ႉ ပလိၵ်ႈမၢၼ်ႈ သိုၵ်းမၢၼ်ႈ ၵူတ်ႇထတ်းၶူဝ်းၵုၼ်ႇ ဝႂ်လၢႆႊသိၼ်ႊရူတ်ႉၵႃးသေ ယွၼ်းငိုၼ်း ၸဝ်ႈၵႃးတၢင်ႇၵုၼ်ႇ ၼပ်ႉႁူဝ်သႅၼ်ပျႃး ဝႃႈၼႆ ။
တႄႇႁူဝ်လိူၼ် တီႊသႅမ်ႊပိူဝ်ႊ ၼႆႉမႃး သိုၵ်းမၢၼ်ႈပႂ်ႉႁိမ်းတူဝ်းၵဵတ်ႉ ၼိူဝ်သဵၼ်ႈတၢင်းႁူဝ်ပူင်း- တူၼ်ႈတီးသေ ပႂ်ႉၵူတ်ႇထတ်း ႁၢမ်ႈၵႃးတၢင်ႇၵုၼ်ႇယွႆႈၶဝ်ႈဢွၵ်ႇၵႂႃႇမႃး။ ပေႃးၵူတ်ႇထတ်းထူပ်းႁၼ်ၸိုင် ယွၼ်းငိုၼ်း ၼိုင်ႈလမ်း 8 မိုၼ်ႇပျႃး ၊ ၵႃးတၢင်ႇ ထၢၼ်ႇႁိၼ် ၊ လဵၵ်း ၊ ၸိူဝ်ႉၽိူင်း ၸိူဝ်းၼႆႉယွၼ်းထိုင် 1 သႅၼ်ပျႃး ႁဵတ်းႁႂ်ႈၸဝ်ႈၵႃး ယၢပ်ႇၽိုတ်ႇၵိၼ်းၸႂ် ဝႃႈၼႆ ။
ၸဝ်ႈၵႃးၵႂႃႇမႃးလၢတ်ႈၽူႈတွႆႇႁွၵ်ႈဝႃႈ -“ ပိူင်လူင်မၼ်းၶဝ်ၵူတ်ႇထတ်း ၵႃးတၢင်ႇၵုၼ်ႇ ၊ ဢၼ်ၵူတ်ႇထတ်း ႁၢဝ်ႈႁႅင်းၼႆႉ တေပဵၼ်တၢင်း 6 လၵ်းၼႆႉ ၊ မၢင်ၸိူဝ်းလႆႈပႂ်ႉ 1-2 ဝၼ်း ၊ ၶဝ်ယွၼ်းငိုၼ်းၸဝ်ႈၵႃး ၵႃႈဢမ်ႇပၼ်ဢမ်ႇၸူး ယွၼ်းတိၵ်းတိၵ်း ၊ ပေႃးဢမ်ႇပၼ်ငိုၼ်း ၶဝ်ဢမ်ႇပၼ်လတ်းၵႂႃႇမႃး ၊ ပေႃးပဵၼ် ၵႃးတၢင်ႇၵုၼ်ႇဢၼ်ဢွၼ်ႇယွၼ်းထိုင် 8 မိုၼ်ႇ ၊ ပေႃးၵႃးလူင်ၶႅၼ်းယွၼ်းၼမ် ”- ဝႃႈၼႆ ။
ယွၼ်ႉ ပလိၵ်ႈသိုၵ်းမၢၼ်ႈၵူတ်ႇထတ်းၵႃးၵႂႃႇမႃးႁၢဝ်ႈႁႅင်းယွၼ်းငိုၼ်းၵဵပ်းၶွၼ်ႇၼမ်လႄႈ ႁဵတ်းႁႂ်ႈ ၸဝ်ႈၵႃး ဢမ်ႇၵိုတ်းၼမ်ႉမျႅတ်ႈၼမ်ႉတွၼ်း ႁႃၵိၼ်လဵင်ႉတွင်ႉယၢပ်ႇၽိုတ်ႇၵိၼ်းၸႂ်ဝႆႉ ၼႆယဝ်ႉ ။
သဵၼ်ႈတၢင်း ႁူဝ်ပူင်း – တူၼ်ႈတီးၼႆႉ မီးၵဵတ်ႉလၢၼ်ႇသိုၵ်းမၢၼ်ႈ ဢမ်ႇယွမ်း 4 ဢၼ် ။ ၵႆႉယွၼ်းငိုၼ်း တီႈၸဝ်ႈရူတ်ႉၵႃးၵႂႃႇမႃးသေဢမ်ႇၵႃး ၵႆႉၵူတ်ႇထတ်းပႃးဝတ်းဝႂ်လၢႆႊသိၼ်ႊ ရူတ်ႉၵႃးပႃး- ၵူၼ်းပိုၼ်ႉတီႈ လၢတ်ႈ ။
လိူဝ်ၼၼ်ႉ တႄႇႁူဝ်လိူၼ် တီႊသႅမ်ႊပိူဝ်ႊၼႆႉမႃး ပလိၵ်ႈ/သိုၵ်းမၢၼ်ႈပႂ်ႉ ၵူတ်ႇထတ်း ဝတ်းဝႂ်လၢႆႊသိၼ်ႊ ရူတ်ႉၵႃးႁၢဝ်ႈႁႅင်းၶိုၼ်းတီႈတၢင်း4 ယႅၵ်ႈ ၾႆးၶဵဝ် ၾႆးလႅင် ဝဵင်းတူၼ်ႈတီး လႄႈ ၸွမ်းၵဵတ်ႉလၢၼ်ႇ တၢင်း ၶဝ်ႈ ဢွၵ်ႇဝဵင်းတူၼ်ႈတီးၶိုၼ်းႁၢဝ်ႈႁႅင်း ။
ၼၢင်းယိင်းဝဵင်းတူၼ်ႈတီႈလၢတ်ႈၽူႈတွႆႇႁွၵ်ႈဝႃႈ -“တလဵဝ်သိုၵ်းမၢၼ်ႈၶဝ် ၵူတ်ႇထတ်းၶိုၼ်းႁႅင်းၼႃႇ ယွၼ်ႉသင်တႄႉဢမ်ႇႁူႉ ၊ ပေႃးဝႃႈဢမ်ႇမီးလၢႆႊသိၼ်ႊၵေႃႈဝႃႈ ဢမ်ႇမီး ၊ ပေႃးမီးသမ်ႉမၢပ်ႇၼႄးဝႃႈ ပဵၼ်ဢၼ်ပွမ်ၼႆ ယွၼ်းငိုၼ်း။ ၸူဝ်ႈဝူင်ႈဝၢင်ႈၼႆႉ ၵူတ်ႇထတ်းႁႅင်း ၵူၼ်းတေၶိုၼ်ႈမႃးတူၼ်ႈတီးၼႆႉၵေႃႈ လီၾၢင်ႉၵၼ်”- ဝႃႈၼႆ ။
တႄႇသိုၵ်းမၢၼ်ႈ မိၼ်းဢွင်ႇလၢႆႇ ၸီႉသင် ႁႂ်ႈၵူတ်ႇထတ်းရူတ်ႉၵႃး ၸိူဝ်းဢမ်ႇလႆႈတၢင်ႇဝႆႉမၢႆၾၢင် (လၢႆႊ သိၼ်ႊ) ဝႆႉၸိူဝ်းၼၼ်ႉယဝ်ႉ ၶႃႈႁၢပ်ႇၵၢၼ်ၶုၼ်ၾၢႆႇၵဵဝ်ႇၶွင်ႈ လိုပ်ႈလမ်းတီႉၺွပ်းရူတ်ႉၵႃးသေ ၸႂ်ႉဢဝ် ငိုၼ်း ထုတ်ႇဢဝ်ၶိုၼ်း 1 လမ်း 8 မိုၼ်ႇထိုင် 1 သႅၼ်ပျႃး။ တေႃႇထိုင်ဝၼ်းမိူဝ်ႈၼႆႉ ပလိၵ်ႈသိုၵ်းမၢၼ်ႈ ၵူတ်ႇထတ်း ဝတ်းဝႂ်လၢႆႊသိၼ်ႊ မီးၸမ် 5 လိူၼ်ယဝ်ႉ ႁဵတ်းႁႂ်ႈၵူၼ်းၵႂႃႇမႃးယၢပ်ႇၽိုတ်ႇၵိၼ်းၸႂ်ၼႆယဝ်ႉ ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ