ၸွမ်ၸိုင်ႈမိူင်းဢမေႊရိၵၼ်ႊ တေႃႊၼႄႊလ်ထရမ်ႉ တႄႇပၼ်ၶႂၢင်ႉ ဝီႊသႃႊ(Visa)သႅၼ်းမႂ်ႇ တွၼ်ႈတႃႇၵူၼ်းၼွၵ်ႈမိူင်း ၸိူဝ်းပဵၼ်သထေးၽူႈမၢၵ်ႈမီး။

ဝီႊသႃႊ(Visa)မႂ်ႇၼႆႉႁွင်ႉဝႃႈ gold card။ သင်ၶႂ်ႈယိပ်း ဝီႊသႃႊ(Visa)သႅၼ်းၼႆႉၸိုင် တေလႆႈသိုဝ်ႉဢဝ် ၵိုင်ႇၵႃႈၶၼ်ငိုၼ်း 1 လၢၼ်ႉတေႃႊလႃႊ ဢမေႊရိၵၼ်ႊ။ ၵူၼ်းၼွၵ်ႈမိူင်း ၸိူဝ်းယိပ်းဝႆႉ ဝီႊသႃႊသႅၼ်းၼႆႉ မီးတိုဝ်ႉတၢင်း တႃႇတေတၢင်ႇယွၼ်းပဵၼ်ၵူၼ်းမိူင်းဢမေႊရိၵၼ်ႊလႆႈ ငၢႆႈလူမ်။ ၶွမ်ႊပၼီႊယႂ်ႇလူင် ၼႂ်းမိူင်းဢမေႊရိၵၼ်ႊၵေႃႈ တေၸၢင်ႈထိင်းဝႆႉ ၽူႈလူင်ႉလႅၼ်ႇ ၸိူဝ်းမီးၵႃႈၶၼ်တႃႇၶွမ်ႊပၼီႊၶဝ်ၼႆ – ၸွမ်ၸိုင်ႈထရမ်ႉ တႅမ်ႈတၢင်ႇဝႆႉတီႈၼိူဝ်သိုဝ်ႇတူင်ႇဝူင်းမၼ်းၸၢႆး ၼႂ်းဝၼ်းတီႈ 10/12-2025 ၼႆႉ။

ၼႂ်းႁူဝ်ပီ 2025 ၼႆႉ ၸွမ်ၸိုင်ႈထရမ်ႉ ယၢမ်ႈပိုၼ်ၽၢဝ်ႇဝႆႉဝႃႈ လႆႈႁၢင်ႈႁႅၼ်းၶပ်ႉမၢႆ တႃႇတေၶၢႆ ဝီႊသႃႊ ၶိုၵ်ႉတွၼ်း gold card ပၼ်ၵူၼ်းၼွၵ်ႈမိူင်း ၸိူဝ်းပဵၼ်ၽူႈမၢၵ်ႈမီး ၼႆသေ ၸင်ႇႁဵတ်းသၢင်ႈၽေႃႇၼမ်ႉၼႄတူဝ်မႃး ယၢမ်းလဵဝ်ၼႆႉ။

ၸွမ်းၼင်ႇ မူႇပိူင်ၸွမ်ၸိုင်ႈထရမ်ႉသေ ၽွင်းမိူဝ်ႈဢမေႊရိၵၼ်ႊ တိူဝ်းၶဵင်ႈၶႅင်မူႇပိူင်ၾၢႆႇၵူတ်ႇထတ်း ၵူၼ်းၶဝ်ႈဢွၵ်ႇမိူင်း၊ တိူဝ်းၶိုၼ်ႈၵႃႈဝီႊသႃႊ လွင်ႈပၼ်ၶႂၢင်ႉႁဵတ်းၵၢၼ်လႄႈ ၽဵဝ်ႈမူၺ်ႉတီႉၺွပ်း ၵူၼ်းၸိူဝ်းယူႇသဝ်းၼႂ်းမိူင်းဢမေႊရိၵၼ်ႊ လူၺ်ႈဢမ်ႇမႅၼ်ႈတၢင်းၵၢၼ်ယူႇၼႆႉ ၸင်ႇတႄႇၵပ်းသိုပ်ႇပၼ် ဝီႊသႃႊ gold card ၼႆႉမႃး။

ၶွမ်ႊပၼီႊ ဢမေႊရိၵၼ်ႊ ၸိူဝ်းတေၶႂ်ႈၸၢင်ႈၽူႈႁၢပ်ႇၵၢၼ်ၼႂ်းသႅၼ်း ပဵၼ်ၽူႈလူင်ႉလႅၼ်ႇလမ်ႇလွင်ႈၸိူဝ်းၼၼ်ႉတႄႉ တေလႆႈသိုဝ်ႉ gold card ၼႆႉ 2 လၢၼ်ႉတေႃႊလႃႊ ဢိၵ်ႇပႃး ၵႃႈၸႂ်ႉၸၢႆႇတၢင်ႇၸိူဝ်း ဢၼ်ပႃး platinum card ။ ၼႂ်းဢမ်ႇႁိုင်သင်ၼႆႉၵေႃႈ တေၵပ်းသိုပ်ႇပၼ်ဝီႊသႃႊ သႅၼ်းမႂ်ႇထႅင်ႈဢၼ်ၼိုင်ႈ ဢၼ်ပႃးသုၼ်ႇတိုဝ်ႉတၢင်းၶိုၵ်ႉတွၼ်း မိူၼ်ၼင်ႇဢမ်ႇလႆႈသႂ်ႇၶွၼ်ႇၸဵမ်ၸိူဝ်းၼႆႉ ၼႆယဝ်ႉ။

ၵူၼ်းၸိူဝ်းတေတၢင်ႇယိုၼ်ႈယွၼ်းဝီႊသႃႊ gold card ၼႆႉ ၼႂ်းၶၢဝ်းယၢမ်းၽူႈမီးပုၼ်ႈၽွၼ်းၶဝ် တိုၵ်ႉၵူတ်ႇထတ်းယူႇၼၼ်ႉ တေလႆႈသႂ်ႇငိုၼ်းဝႆႉလူင်ႈၼႃႈ တႃႇ 15000 တေႃႊလႃႊသေ ငိုၼ်းၼႆႉ တေဢမ်ႇပၼ်ၶိုၼ်း ဝႃႈၼႆ။

တႄႇၸဵမ်မိူဝ်ႈ ၸွမ်ၸိုင်ႈထရမ်ႉ ၵပ်းသိုပ်ႇၼႄ ဝီႊသႃႊ gold card ၼႂ်းလိူၼ်ၵျႅၼ်ႊၼိဝ်ႊရီႊ ႁူဝ်ပီ 2025 ၼႆႉမႃး ၺႃးလွင်ႈထတ်းသၢင်ဝႆႉ တၢင်းၼမ်တၢင်းလၢႆ။

ၸွမ်ၸိုင်ႈထရမ်ႉတႄႉ လၢတ်ႈဝႃႈ – ဝီႊသႃႊ gold card ၼႆႉ ဢမ်ႇပေႃးမီးလွင်ႈပႅၵ်ႇပိူင်ႈသင်ၵၼ်တင်း ဝီႊသႃႊ green card ဢၼ်ၸႂ်ႉတိုဝ်းဝႆႉယူႇယၢမ်းလဵဝ်ၼႆႉ။ green card ၼႆႉ ၵူၼ်းၼွၵ်ႈမိူဝ်း ၸိူဝ်းမီးငိုၼ်းၶဝ်ႈပႅၵ်ႇပိူင်ႈၵၼ် ၵူႈသႅၼ်းထၢၼ်ႈ လႆႈၶႂၢင်ႉယူႇသဝ်းႁဵတ်းၵၢၼ်ၼႂ်းမိူင်းဢမေႊရိၵၼ်ႊ ထိုင် 5 ပီသေ မီးသုၼ်ႇတၢင်ႇယိုၼ်ႈယွၼ်းပဵၼ် ၵူၼ်းမိူင်းဢမေႊရိၵၼ်ႊ။ ၵူၺ်းၵႃႈ gold card ၼႆႉတႄႉ ယိူင်းဢၢၼ်းႁဵတ်းဢွၵ်ႇမႃး တႃႇၽူႈလူင်ႉလႅၼ်ႇၸၼ်ႉသုင်ၶဝ်။ ဢမေႊရိၵၼ်ႊၼႆႉ ၶႂ်ႈလႆႈၵူၼ်း ၸိူဝ်းတေၸွႆႈသၢင်ႈ ႁႂ်ႈမီးၽွၼ်းလီတေႃႇမိူင်းၶဝ်ၵူၺ်း ဝႃႈၼႆ။