ၸုမ်းလဵၼ်ႈဢဵၼ်ႁႅင်း မိူင်းၵမ်ႊပေႃႊတီႊယိူဝ်ႊ တၢင်းသဵင်ႈ ထွၼ်တူဝ်ဢွၵ်ႇ တီႈၼႂ်းပၢင်ၶႄႉၶဵင်ႇလဵၼ်ႈဢဵၼ်ႁႅင်း ဢေႊသျႃႊၸဵင်ႇၸၢၼ်းဝၼ်းဢွၵ်ႇ (SEA Games) 2025 ဢၼ် မိူင်းထႆး ႁပ်ႉပဵၼ်ၸဝ်ႈႁိူၼ်းသေ ၸတ်းႁဵတ်း၊ ယွၼ်ႉငဝ်းလၢႆးပၢင်တိုၵ်းၸွမ်းလႅၼ်လိၼ် မိူင်းထႆး တင်း မိူင်းၵမ်ႊပေႃႊတီႊယိူဝ်ႊ ႁၢဝ်ႈႁႅင်းၶိုၼ်ႈမႃး ဝႃႈၼႆ။
ၶၢဝ်ႇ Thai PBS ႁၢႆးငၢၼ်းဝႆႉဝႃႈ – ၵွၼ်ႇၼႃႈၼႆႉ မိူင်းၵမ်ႊပေႃႊတီႊယိူဝ်ႊ လႆႈသႂ်ႇသဵၼ်ႈမၢႆဝႆႉ တႃႇၶဝ်ႈၶေႉၶဵင်ႇၼႂ်းလွၵ်းလၢႆးလဵၼ်ႈဢဵၼ်ႁႅင်း 12 သႅၼ်း။ ၼႂ်းဝၼ်းပိုတ်ႇပၢင်ပွႆး ဝၼ်းတီႈ 9/12/2025 ၼႆႉၵေႃႈ ၽူႈလဵၼ်ႈဢဵၼ်ႁႅင်း မိူင်းၵမ်ႊပေႃႊတီႊယိူဝ်ႊ 137 ၵေႃႉလႄႈ ၽူႈမီးပုၼ်ႈၽွၼ်းၶဝ် ၶဝ်ႈႁူမ်ႈၸွမ်း၊ ဝၢႆးလင်ၼၼ်ႉ ၸင်ႇပိုၼ်ၽၢဝ်ႇထွၼ်တူဝ် ဢွၵ်ႇၶိုၼ်းတၢင်းသဵင်ႈ ဝႃႈၼႆ။
ယွၼ်ႉငဝ်းလၢႆးပၢင်တိုၵ်းၸွမ်းလႅၼ်လိၼ် မိူင်းထႆး – မိူင်းၵမ်ႊပေႃႊတီႊယိူဝ်ႊသေ ၸိူဝ်းပဵၼ်မုင်ႉႁေႃႁိူၼ်း ၽူႈလဵၼ်ႈဢဵၼ်ႁႅင်းၶဝ် မႆႈၸႂ်လွင်ႈႁူမ်ႇလူမ်ႈတႃႇပွၵ်ႈမိူင်းၶိုၼ်းလႄႈ ၸင်ႇလႆႈထွၼ်တူဝ်ဢွၵ်ႇ တီႈၼႂ်းပၢင်ၶေႉၶဵင်ႇၼၼ်ႉ ၼႆယဝ်ႉ။
ယွၼ်ႉပၢင်တိုၵ်း ဢၼ်တႄႇပဵၼ်မႃးၶိုၼ်းၼႂ်းဝူင်ႈၼႆႉသေ ၵူၼ်သိုၵ်း လႄႈ ၵူၼ်းမိူင်းတင်းသွင်ၾၢႆႇ လူႉတၢႆဢမ်ႇယွမ်း 13 ၵေႃႉ၊ ၵူၼ်းမိူင်းၸိူဝ်းယူႇသဝ်းဝႆႉၸွမ်းလႅၼ်လိၼ် သွင် ၾင်ႇၸိုင်ႈမိူင်း လႆႈၶၢႆႉပၢႆႈၵႂႃႇယူႇသဝ်းဝႆႉ ဢွင်ႈတီႈလွတ်ႈၽေး မွၵ်ႈ 5 သႅၼ်ပၢႆၼႆ ၽူႈမီးပုၼ်ႈၽွၼ်းၶဝ် ပိုၼ်ၽၢဝ်ႇဝႆႉၼင်ႇၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ