ဝၼ်းတီႈ 10/12/2025 ၼႆႉ မိူင်းဢေႃႊသတေႊလီႊယိူဝ်ႊ တႄႇပိၵ်ႉဢိုတ်းႁႄႉႁၢမ်ႈ ဢမ်ႇပၼ်လုၵ်ႈဢွၼ်ႇ ၸိူဝ်းဢႃယု ၾၢႆႇတႂ်ႈ 16 ပီ ၸႂ်ႉသိုဝ်ႇတူင်ႇဝူင်းၵူၼ်း (Social Media) ဝႃႈၼႆ။

သိုဝ်ႇတူင်ႇသူင်းၵူၼ်း ၸိူဝ်းထုၵ်ႇပိၵ်ႉဢိုတ်း ဢမ်ႇပၼ်လုၵ်ႈဢွၼ်ႇၸႂ်ႉတိုဝ်းၼၼ်ႉ မီး 10 ဢၼ်။ ၼႂ်းၼၼ်ႉပႃး TikTok ၊ YouTube ၊ Instagram လႄႈ Facebook ၸိူဝ်းၼႆႉ။ မိူၼ်ၼင်ႇ YouTube Kids၊ Google Classroom လႄႈ WhatsApp ၸိူဝ်းၼႆႉတႄႉ ဢမ်ႇႁၢမ်ႈပႃး။

လွင်ႈပိၵ်ႉဢိုတ်းၸိူင်ႉၼႆ မိူင်းဢေႃႊသတေႊလီႊယိူဝ်ႊ ပဵၼ်မိူင်းဢွၼ်တၢင်းသုတ်း ၼိူဝ်လုမ်ႈၾႃႉ။ ၸွမ်းၼင်ႇ မၢႆမီႈပၵ်းပိူင်မႂ်ႇၼႆႉသေ သင်ၵူတ်ႇထတ်းႁၼ်ဝႃႈ ၾၢႆႇၶွမ်ႊပၼီႊပၢႆးသၢင်ႈၶဝ် ပၼ်ၶႂၢင်ႉလုၵ်ႈဢွၼ်ႇ ဢႃယု 16 ပီလူင်းတႂ်ႈ ၸႂ်ႉတိုဝ်းဝႆႉၼႆၸိုင် တေၺႃးတၢမ်ႇမႂ်ငိုၼ်း 33 လၢၼ်ႉတေႃႊလႃႊ ဝႃႈၼႆ။

ၵွပ်ႈၼၼ်လႄႈ တႄႇၸဵမ်မိူဝ်ႈဝၼ်းတီႈ 4/12/2025 မႃးၼႆႉ ၶွမ်ႊပၼီႊ Facebook (Meta) တႄႇပိၵ်ႉဢိုတ်း လွင်ႈပၼ်ၶႂၢင်ႉလုၵ်ႈဢွၼ်ႇ ဢႃယု 16 ပီလူင်းတႂ်ႈ ၸႂ်ႉတိုဝ်း Facebook တီႈၼႂ်းမိူင်း ဢေႃႊသတေႊလီႊယိူဝ်ႊ။

ၵဵဝ်ႇလူၺ်ႈလွင်ႈၼႆႉသေ ၶွမ်ႊပၼီႊၾၢႆႇပၢႆးသၢင်ႈ လႄႈ ၸိူဝ်းတူင်ႉၼိုင်တႃႇသုၼ်ႇလႆႈလၢတ်ႈၸႃလွတ်ႈလႅဝ်းၶဝ် ဢွၼ်ၵၼ်ထတ်းသၢင်ဝႆႉယူႇသေတႃႉ ပေႃႈမႄႈလုၵ်ႈဢွၼ်ႇ လႄႈတင်း ၸိူဝ်းတူင်ႉၼိုင် လွင်ႈလုၵ်ႈဢွၼ်ႇၶဝ်တႄႉ ဢွၼ်ၵၼ်ႁၼ်လီႁပ်ႉတွၼ်ႈဝႆႉ။

လူင်ပွင်ၸိုင်ႈ မိူင်းဢေႃႊသတေႊလီႊယိူဝ်ႊ လၢတ်ႈဝႃႈ – ၵၢၼ်ၸႂ်ႉတိုဝ်း သူဝ်ႊသျႄႊမီႊတီႊယိူဝ်ႊ ၼႆႉ ႁဵတ်းႁႂ်ႈၵူၼ်းၼုမ်ႇလုၵ်ႈဢွၼ်ႇၶဝ် သုမ်းၶၢဝ်းယၢမ်းၸွမ်းတၢင်းၼမ် လႄႈ ႁဵတ်းႁႂ်ႈတုမ်ႉတိူဝ်ႉပၢႆးယူႇလီပႃး ဝႃႈၼႆ။

ႁူဝ်ၼပ်ႉတၢင်းၼမ်လုၵ်ႈဢွၼ်ႇ ၼႂ်းၵႄႈဢႃယု 10 – 15 ပီ ၸႂ်ႉတိုဝ်းသူဝ်ႊသျႄႊမီႊတီႊယိူဝ်ႊၼႆႉ မီးမွၵ်ႈ 96%၊ ၼႂ်းလုၵ်ႈဢွၼ်ႇ 10 ၵေႃႉၼၼ်ႉ တႃႇ 7 ၵေႃႉ ဢွၼ်ၵၼ်တူၺ်းၺႃး လွင်ႈတၢင်း (Content)ၸိူဝ်းမီးၽေး လူၺ်ႈဢမ်ႇမီးလွင်ႈႁႄႉႁၢမ်ႈ ၼႆယဝ်ႉ။

လွင်ႈတၢင်း (Content) ဢၼ်ႁဵတ်းႁႂ်ႈ မီးလွင်ႈထၢင်ႇလဵၵ်ႉၼိူဝ် ၼၢင်းယိင်း၊ ႁဵတ်းႁႂ်ႈပဵၼ်လွင်ႈၵေႃႇၵၢၼ်ႁၢႆႉ၊ ဢမ်ႇမီးၸႂ်ၶႂ်ႈၵိၼ်ၶႂ်ႈယႅမ်ႉလႄႈ ၶႂ်ႈၶႃႈတူဝ်တၢႆၸိူဝ်းၼႆႉ ပဵၼ်ဢၼ်မီးၽေးတေႃႇလုၵ်ႈဢွၼ်ႇ ၸိူဝ်းဢႃယုပႆႇတဵမ်ၼၼ်ႉတေႉတေႉ ဝႃႈၼႆ။

ယၢမ်းလဵဝ် မိူၼ်ၼင်ႇ မိူင်း ၼိဝ်ႊသီႊလႅၼ်ႊ၊ ၼေႃႊဝေႊလ်၊ တဵင်ႊမၢတ်ႉၶ်၊ ၾရင်ႊသဵတ်ႊ၊ သပဵၼ်ႊ၊ ပရဵတ်ႊတဵင်ႊ လႄႈ မလေးသျႃး ၸိူဝ်းၼႆႉၵေႃႈ ဢွၼ်ၵၼ်သူၼ်ၸႂ်ပၵ်းတႃ လဵပ်ႈႁဵၼ်းတူၺ်းၸွမ်း လွင်ႈမိူင်းဢေႃႊသတေႊလီႊယိူဝ်ႊ ပိၵ်ႉဢိုတ်းႁႄႉႁၢမ်ႈ ဢမ်ႇပၼ်လုၵ်ႈဢွၼ်ႇ ဢႃယု 16 ပီလူင်တႂ်ႈ ၸႂ်ႉတိုဝ်း သူဝ်ႊသျႄႊမီႊတီႊယိူဝ်ႊ ၼႆႉ ဝႃႈၼႆ။