(သဵင်ၵၢင်ၸႂ်ၵူၼ်းၼုမ်ႇ)

ၼႂ်းဝၼ်းတီႈ 18 လိူၼ်ဢေႃၵၢတ်ႉသ် ၼၼ်ႉ ၶွမ်ႊမသျိၼ်ႊ ၵၢၼ်လိူၵ်ႈတင်ႈ သိုၵ်းမၢၼ်ႈပိုၼ်ၽၢဝ်ႇဢွၵ်ႇ မႃးဝႃႈ တေၸတ်းပၢင်လိူၵ်ႈတင်ႈပတ်းပိုၼ်ႉၸိုင်ႈမိူင်းၵႂႃႇ 3 ၶၵ်ႉ 3 တွၼ်ႈ။ ၼႂ်းဝၼ်းတီႈ 28/12/2025 ၼႆႉ တေၸတ်းႁဵတ်းပၢင်လိူၵ်ႈတင်ႈၶၵ်ႉတွၼ်ႈ 1 ၼႂ်းလိူၼ်ထူၼ်ႈ 1 ပီ 2026 သမ်ႉၶၵ်ႉတွၼ်ႈ 2 လႄႈ 3  ဝႃႈၼႆ ။

 ဢၼ်လၢႆးသိုၵ်းမၢၼ်ႈႁဵတ်းယူႇယၢမ်းလဵဝ်ၼႆႉ ႁဵတ်းၵႂႃႇၸွမ်း ပိူင်ငဝ်ႈပိုင်းမိူင်း 2008 တွၼ်ႈ 399 (က) ၊ ၾိင်ႈမိူင်း ၶွမ်ႊမသျိၼ်ႊ ၵၢၼ်လိူၵ်ႈတင်ႈတွၼ်ႈ 10 – ဝႃႈၼႆဝႆႉ။

ၼႂ်းငဝ်းလၢႆးဝၢၼ်ႈမိူင်းဢမ်ႇၼိမ်သဝ်းၼင်ႇၼႆ သိုၵ်းမၢၼ်ႈသမ်ႉတေၸႂ်ႉလၢႆးပၢင်လိူၵ်ႈတင်ႈ ဢၼ်တဵၵ်းၶိူင်ႈၸၢၵ်ႈသေ ပၼ်သဵင်ၵၢင်ၸႂ်  လူၺ်ႈလၢႆး (MEVM)  – ပဵၼ်ၶိူင်ႈၸၢၵ်ႈဢၼ်ၶဝ် ၶူင်သၢင်ႈႁဵတ်းဢွၵ်ႇႁင်းၵူၺ်းလႄႈမၵ်းမၼ်ႈႁင်းၵူၺ်း- လူၺ်ႈဢမ်ႇပၼ်တၢင်ႇၸုမ်း ၼႂ်းလုမ်ႈၾႃႉ မႃးထတ်းမႃးတူၺ်း။

ၼွၵ်ႈလိူဝ်ၼၼ်ႉဢမ်ႇၵႃး ပၢင်လိူၵ်ႈတင်ႈ ဢၼ်တေၸတ်းၼႆႉ –  တွၼ်ႈတႃႇ သၽႃးၵူၼ်းမိူင်း 330 တီႈၼင်ႈၼၼ်ႉ တေၸႂ်ႉပိူင်လၢႆး ၽူႈပေႉၵိၼ်ၶၢတ်ႇ FPTP သေလိူၵ်ႈတင်ႈၵႂႃႇ၊ တွၼ်ႈတႃႇ သၽႃးၸိူဝ်ႉၸၢတ်ႈ (သၽႃးၼိူဝ်) 110 တီႈၼင်ႈသမ်ႉ တေၸႂ်ႉလၢႆးၼပ်ႉသွၼ်ႇၸွမ်းဝၢၵ်ႈ တူဝ်တႅၼ်း MMP သေလိူၵ်ႈတင်ႈ၊ ၼႂ်းၼၼ်ႉ တေၶိုၼ်းၸႂ်ႉလၢႆးၽူႈပေႉၵိၼ်ၶၢတ်ႇ FPTP သေလိူၵ်ႈဢဝ် 84 တီႈၼင်ႈ (84 ၶဵတ်ႇလိူၵ်ႈတင်ႈ/ မဲဆန္ဒနယ်) ၊ တေၸႂ်ႉလၢႆး ပိူင်လိူၵ်ႈတင်ႈၸွမ်းပုၼ်ႈသုၼ်ႇ PR သေ လိူၵ်ႈ 26 တီႈၼင်ႈ (26 ၶဵတ်ႇလိူၵ်ႈတင်ႈ/ မဲဆန္ဒနယ်) – ဝႃႈၼႆထႅင်ႈ ။

ၼွၵ်ႈလိူဝ်ၸႂ်ႉလၢႆးသုၵ်ႉယုင်ႈၼႆႉယဝ်ႉ  သိုၵ်းမၢၼ်ႈ ပိုၼ်ၽၢဝ်ႇ ၾၢင်ႉဝႆႉပဵၼ်တၢင်းၵၢၼ်ဝႃႈ- ပၢင်လိူၵ်ႈတင်ႈ ပွၵ်ႈၵမ်းၼႆႉ တၵ်းတေလႆႈၸတ်းႁဵတ်းၵႂႃႇ ႁႂ်ႈပေႃးဢွင်ႇမၢၼ်။ ၽႂ် ဢမ်ႇပၼ်ႁႅင်း ပၢင်လိူၵ်ႈတင်ႈ၊ ၽႂ်တင်ႈၸႂ်ယႃႉၵဝ်းပၢင်လိူၵ်ႈတင်ႈ၊ လၢတ်ႈၸႃႁဵတ်းသၢင်ႈ ပိုၼ်ၽၢဝ်ႇ သေႉၼႄးလွင်ႈပၢင်လိူၵ်ႈတင်ႈ၊ ၽႂ်ႁူၺ်းသူၼ်းႁႂ်ႈၵူၼ်းမိူင်း ဢမ်ႇၶဝ်ႈႁူမ်ႈပၢင်လိူၵ်ႈတင်ႈ – လူၺ်ႈလၢႆးတၢင်းဢွမ်ႈၵေႃႈလီ ၵမ်းသိုဝ်ႈၵေႃႈယဝ်ႉ တေလႆႈၺႃးတၢမ်ႇၶွၵ်ႈ ဢေႇသုတ်း 3 ပီ တေႃႇတင်းၸူဝ်ႈၸၢတ်ႈ။ တေပၼ်တူတ်ႈတၢမ်ႇၵႂႃႇ ၼၵ်းၼၵ်းၼႃၼႃ ဝႃႈ ၼႆဝႆႉ။

ဢမ်ႇၸႂ်ႈတႃႇငမ်းယဵၼ်လႄႈ  ပၢင်လိူၵ်ႈတင်ႈၼႆႉ တၵ်းလႆႈသၢၼ်ၶတ်း

ၼူၼ်းၼူၼ်း ၼၢင်းယိင်းၼုမ်ႇၽူႈတူင်ႉၼိုင်လွင်ႈသုၼ်ႇလႆႈၼၢင်းယိင်း  လၢတ်ႈဝႃႈ  – ပၢင်လိူၵ်ႈတင်ႈဢၼ်ၸဝ်ႈဢႃႇၼႃႇသိုၵ်းတေၸတ်းႁဵတ်းၵမ်းၼႆႉ ပဵၼ်ပုၼ်ႇသုၼ်ႇတွၼ်ႈတႃႇၶဝ်ၵူၺ်း ဢမ်ႇၸႂ်ႈ Democracy  ဢမ်ႇၸႂ်ႈတႃႇၽဵင်ႇပဵင်း ၊ ဢမ်ႇၸႂ်ႈတႃႇငမ်းယဵၼ်လႄႈ ပၢင်လိူၵ်ႈတင်ႈၼႆႉတၵ်းတေလႆႈသၢၼ်ၶတ်း – ဝႃႈၼႆ။

“ ပၢင်လိူၵ်ႈတင်ႈၼႆႉ  ယွၼ်ႉသင်လႄႈ ၶဝ်ၶႂ်ႈႁဵတ်းၼႆ ယွၼ်ႉၶဝ်လူဝ်ႇလႆႈ လၢႆလၢႆမိူင်းၼႂ်းလုမ်ႈၾႃႉ မၵ်းမၼ်ႈ ( နိုင်ငံတကာ အသိမှတ်ပြုမှု)  ။ ယွၼ်ႉသင်ၼႆ ၸဵမ်မိူဝ်ႈ 2021 မႃးၶဝ်ယိုတ်းဢႃႇၼႃႇမႃးၼႆႉ ပိူင်ၾၢင် ၶဝ်ၵေႃႈတူၵ်း လၢႆလၢႆမိူင်းၵေႃႈ Boycott ၶဝ် ဢမ်ႇႁၼ်လီၸွမ်းၶဝ်မႃး ၊ ပိူင်လူင်မၼ်း UN ၊ EU လႄႈ ဢႃႊသီႊယၢၼ်ႊၶဝ်ယဝ်ႉ ပိူၼ်ႈဢမ်ႇႁၼ်လီၸွမ်းၶဝ် ။

ၵူၺ်းၵႃႈ မိူၼ်ၼင်ႇ မိူင်းဢၼ်မီးဢမ်းၼၢတ်ႈသုင် မိူၼ်ၼင်ႇ မိူင်းၶႄႇ ၊ ရတ်ႉသျႃႊ ၊ ၵူဝ်ႊရီႊယိူဝ်ႊ လႄႈ ဢိၼ်ႊတီႊယိူဝ်ႊ  ၸိူဝ်းၼႆႉတႄႉ ၶဝ်ႈပဵၼ်ၸဝ်ႈဢႃႇၼႃႇ မိူၼ်ၵၼ် ယွၼ်ႉၼၼ် ၶဝ်တိုၵ်ႉပၼ်ႁႅင်း ပၢင်လိူၵ်ႈတင်ႈ ။ ယွၼ်ႉသင်လႄႈၼႆ ၶဝ်ၵေႃႈဢမ်ႇၸႂ်ႈမိူင်း Democracy လႄႈ ၶဝ်ပၼ်ႁႅင်း ၊ ၶဝ်လႆႈ ၼမ်ႉတွၼ်း ၵဵဝ်ၵပ်း ၸုမ်းၸဝ်ႈဢႃႇၼႃႇ သိုၵ်းမၢၼ်ႈပႃး မိူင်းၶႄႇၼႆႉ ၶဝ်လႆႈ  ၼမ်ႉတွၼ်း ၼမ်ႁႅင်းၼႃႇ။ ယွၼ်ႉၼၼ် ၶဝ်ဢမ်ႇၶႂ်ႈႁႂ်ႈမႃးတုမ်ႉတိူဝ်ႉ ၼမ်ႉမျၢတ်ႈၼမ်ႉတွၼ်းၶဝ်လႄႈ ၶဝ်ပၼ်ႁႅင်းသိုၵ်းမၢၼ်ႈ ။

ယွၼ်ႉၼၼ် ၶႄႇၶဝ်ၼႆႉ ၸုၵ်းၶိုင်ႈၵၢင်မၼ်း ပၢင်လိူၵ်ႈတင်ႈၼႆႉၵေႃႈၶဝ်ႈၸုၵ်း မိူၼ်ၼင်ႇ ရတ်ႉသျႃႊလႄႈ ၵူဝ်ႊရီႊယိူဝ်ႊ ၸိူဝ်းၼႆႉ ၶဝ်ႈၵေႃႈလႆႈၶၢႆ မၢၵ်ႇၵွင်ႈၸိုၼ်းယၢမ်း ၶိူင်ႈၶူဝ်း မၢၵ်ႇၵွင်ႈ ၊ မၢၵ်ႇၸိုၼ်းယၢမ်းႁႃႉ ၶိူင်ႈမိၼ် ၸရူၼ်ႊ ၸိူဝ်းၼႆႉ သိုၵ်းမၢၼ်ႈၶဝ်ၵေႃႈပိူင်ႈဢိင် မိူင်းရတ်ႉသျႃႊ ၵႂႃႇၶိုၼ်ႈ(စစ်ရေးနည်းပညာ) security ၸိူဝ်းၼႆႉ ၶဝ်တိုၼ်းၸမ်ၸႂ် ၵၼ်လႄႈ သၢမ်မိူင်းၼႆႉပၼ်ႁႅင်းၶဝ်ၼႆႉ ဢမ်ႇၸႂ်ႈတွၼ်ႈတႃႇ လွင်ႈငမ်းယဵၼ် လႄႈ တႃႇမိူင်းမၢၼ်ႈလွတ်ႈလႅဝ်း ။  ဢိၼ်ႊတီႊယိူဝ်ႊၼႆႉ ယွၼ်ႉသင်လႄႈ ၶဝ်ပၼ်ႁႅင်းၼႆ ၶဝ်ဝူၼ်ႉဝႃႈ ၶဝ်ယူႇတိတ်းၸပ်းမိူင်းမၢၼ်ႈလႄႈမိူင်းၶႄႇ ၶဝ်ပဵၼ်မိူင်း ၻီႊမူဝ်ႊၶရေသီႊ ဢၼ်ယၢဝ်း လိူဝ်ပိူၼ်ႈသေတႃႉၵေႃႈ ဝၢႆးၼႆႉမႃးၶဝ်ၵႂႃႇလဵၼ်ႈၵေႃႉၵၼ်တင်းၸဝ်ႈဢႃႇၼႃႇ ၸၢင်ႈပဵၼ်လႆႈ လွင်ႈပၢႆးမၢၵ်ႈမီး ၵေႃႈၸၢင်ႈပဵၼ်လႆႈ တွၼ်ႈတႃႇတေလႆႈၼမ်ႉမျၢတ်ႈၼမ်ႉတွၼ်းၵူၺ်း ။

ယဝ်ႉၵေႃႈ ၶေႃႈထီႉသၢမ် သိုၵ်းမၢၼ်ႈႁဵတ်းပၢင်လိူၵ်ႈတင်ႈၼႆႉ ဢမ်ႇၸႂ်ႈတႃႇငမ်းယဵၼ် တွၼ်ႈတႃႇ ၵူၼ်းမိူင်း ။  တွၼ်ႈတႃႇပၢင်လိူၵ်ႈတင်ႈၼႆႉ ၶိုၼ်းၶိုၼ်းဝၼ်းဝၼ်း ဢဝ်တရူၼ်ႊ မၢၵ်ႇလူင် ပွႆႇသႂ်ႇပိုၼ်ႉတီႈသိုၵ်းၸၢဝ်းၶိူဝ်းၵုမ်းယဝ်ႉဢမ်ႇၵႃး ၊ ထႅမ်ႁႅင်းသိုၵ်း တိုၵ်းဢဝ်ၶိုၼ်း ပိုၼ်ႉတီႈသိုၵ်းၸၢဝ်းၶိူဝ်းၵုမ်းၵမ်ၸိူဝ်းၼႆႉ ယွၼ်ႉသင်လႄႈ ၶဝ်ႁဵတ်းၸိူင်ႉၼၼ်ၼႆႉ  Principle of Democracy ၼႆႉ တေပဵၼ် Freedom တေလႆႈပဵၼ် သဵင်ၵၢင်ၸႂ်ၵူၼ်းမိူင်းလိူၵ်ႈတင်ႈ ၊ တေလႆႈမီးသဵင်ၵၢင်ၸႂ်ၵူၼ်းမိူင်းၶႂ်ႈႁဵတ်း ၊ ၵူၺ်းၵႃႈ ၸဝ်ႈဢႃႇၼႃႇၶဝ်ၼႆႉ ၶဝ်ႁဵတ်း တွၼ်ႈတႃႇဢႃႇၼႃႇ ဢၼ်ၶဝ်ယိပ်းၼႆႉ ပဵၼ်တၢင်းၵၢၼ် လႄႈဢဝ်ၵူၼ်းတၢႆ ၶိုၼ်းၶိုၼ်းဝၼ်းဝၼ်း ၊ တွၼ်ႈတႃႇတေလႆႈ ပၢင်လိူၵ်ႈတင်ႈၼႆႉ ၊ ပေႃးၶဝ်လႆႈၶိုၼ်း ၶဝ်ၵုမ်းလႆႈၵေႃႈ ၵူၼ်းၵေႃႈတေမႃးသႂ်ႇပၼ်ၶႅပ်းၵၢင်ၸႂ်ၶဝ် ၶဝ်ၵေႃႈတေဝူၼ်ႉၸိူင်ႉၼၼ် ၊ ၶဝ်ၶႂ်ႈၼႄ လုမ်ႈၾႃႉဝႃႈ ၵူၼ်းမိူင်း ၵမ်ႉထႅမ်ႁဝ်းလႄႈ ႁဝ်းၸင်ႇဢူပ်ႉပိူင်ႇ ပၢင်လိူၵ်ႈတင်ႈဢၼ်ႁဝ်းၸတ်းႁဵတ်းၼႆႉၵေႃႈမၼ်းၸႅတ်ႈၸၢင်ႇ ပဵၼ်ပိူင် တီႇမူဝ်ႇၶရေသီႇ လူဝ်ႇၼႄၾၢင်ႁၢင်ႈၸိူင်ႉၼၼ်လႄႈ ၶဝ်ႁဵတ်း ၵူၺ်း ။

ပၢင်လိူၵ်ႈတင်ႈၼႆႉ ဢမ်ႇထုၵ်ႇလီႁဵတ်း ဢမ်ႇထုၵ်ႇလီၵမ်ႉထႅမ် ယွၼ်ႉသင်လႄႈၼႆ ၵၢၼ်တီႈဝႃႈပၢင်လိူၵ်ႈတင်ႈဢၼ်ဝႃႈၼႆႉ မၼ်းတေလႆႈၵႂႃႇၸွမ်းပၵ်းပိူင် ၊ လွတ်ႈလႅဝ်း ၵၢင်ၸႂ်ၵူၼ်း ယဝ်ႉၵေႃႈ ဢမ်ႇပူၼ်ႉပႅၼ်သုၼ်လႆႈသုၼ်ပဵၼ်ၵူၼ်းမိူင်း ၊ တလဵဝ် ဢၼ်ၶဝ်ႁဵတ်းယူႇယၢမ်းလဵဝ်ၼႆႉ ပွႆႇမၢၵ်ႇ ပဵၼ်ပၢင်တိုၵ်း ၶႃႈၵူၼ်းမိူင်း ၵူႈမိုဝ်ႉၵူႈဝၼ်း ႁဵတ်းႁႂ်ႈၵူၼ်းမိူင်းၵိၼ်းၸႂ် ဢမ်ႇမီးတင်းလိူၵ်ႈ သေ ႁႂ်ႈမႃးလိူၵ်ႈၶဝ် ယွၼ်ႉၼၼ် ပၢင်လိူၵ်ႈတင်ႈၼႆႉ လူဝ်ႇလႆႈသၢၼ်ၶတ်း ။

ၶႂ်ႈႁႂ်ႈၵူၼ်းမိူင်းတႆးႁဝ်းၶႃႈၼႆႉNGO ၊ CSO ၊ Media  ၵူၼ်းတူင်ႉၼိုင်ၾၢႆႇၵၢၼ်မိူင်း လီပၼ်တၢင်းႁူႉတီႈၵူၼ်းမိူင်းႁဝ်း လွင်ႈပၢင်လိူၵ်ႈတင်ႈၼႆႉ ၸွင်ႇမၼ်းၸႅတ်ႈၸၢင်ႇႁႃႉ ဢမ်ႇၸႅတ်ႈၸၢင်ႇ ၊ တီႈတင်းမိူင်းတႆး မိူင်းပၼ် ၊ ၶူဝ်လမ် ၊ ၼမ်ႉၸၢင် ဢၼ်မီး ၸုမ်းပႃႇတီႇ သိူဝ်ၾိူၵ်ၼႆႉၵေႃႈ ၶဝ်ဢမ်ႇၸႂ်ႈဝႃႈ ႁဵတ်းတွၼ်ႈတႃႇ ၵူၼ်းမိူင်း ၶဝ်ႁဵတ်းတွၼ်ႈတႃႇ ၼမ်ႉမျၢတ်ႈၼမ်ႉတွၼ်းလႆႈၸွမ်း ၸဝ်ႈဢႃႇၼႃႇ သိုၵ်းမၢၼ်ႈလႄႈ ၶဝ်ႁဵတ်း ၊ တလဵဝ်ၼႆႉ ၵူၼ်းၼုမ်ႇတႆး ၵူၼ်းတူင်ႉၼိုင် တူင်ႇဝူင်းတႆး ၸိူဝ်းၼႆႉတင်းသဵင်ႈ ႁႂ်ႈဢွၵ်ႇမႃးသၢၼ်ၶတ်း ၵဵဝ်ၵပ်း ပၢင်လိူၵ်ႈတင်ႈၼႆႉဢမ်ႇမီး လီမွင်ႇၸႂ်တႄႉဢေႃႈ ။ ”

ၸွင်ႇမၼ်းတေလႆႈ လွင်ႈၽဵင်ႇပဵင်းတေႉယူႇႁႃႉ

 ပၢင်လိူၵ်ႈတင်ႈ ဢၼ်သိုၵ်းမၢၼ်ႈတေၸတ်းႁဵတ်းၼႆႉဢမ်ႇၸႂ်ႈပိူင် Democracy ဢၼ်ၸႅတ်ႈၸၢင်ႇ လႄႈ တေဢမ်ႇမီးလွင်ႈၽဵင်ႇပဵင်းလႆႈၼႆ ၸၢႆးဢၢႆႈပိုၼ်း လုၵ်ႈႁဵၼ်းၸၼ်ႉၸွမ်လၢတ်ႈၼင်ႇၼႆ။

“ၶဝ်လၢတ်ႈဝႃႈ ၶဝ်တေႁဵတ်းတွၼ်ႈတႃႇ လွင်ႈၼိမ်သဝ်း တႃႇၼႂ်းပိုၼ်ႉတီႈဝႃႈၼႆသေတႃႉ – ပၢင်လိူၵ်ႈတင်ႈၵမ်းၼႆႉ ပႃႇတီႇ ယႂ်ႇဢၼ်ဢမ်ႇႁၼ်လီၵမ်ႉထႅမ်ၸဝ်ႈဢႃႇၼႃႇသိုၵ်းၵေႃႈ ဢမ်ႇၸၢင်ႈၶဝ်ႈႁူမ်ႈပႃး ၊ ၵူၼ်းမိူင်းၵူႈၵေႃႉၵေႃႈ ဢမ်ႇၸၢင်ႈၶဝ်ႈႁူမ်ႈပႃး ဢမ်ႇမီးလွင်ႈ လွတ်ႈလႅဝ်းသင် ၊ ပိူင်ပိုၼ်ႉထၢၼ်  ဢၼ်လူဝ်ႇပႃးၸိူဝ်းၼႆႉတင်းဢမ်ႇပႃး ။  ဢမ်ႇၸႂ်ႈပၢင်လိူၵ်ႈတင်ႈ ဢၼ်ၸႅတ်ႈၸၢင်ႇ။ ၶဝ်ၶႂ်ႈ  သၢင်ႈဢႃႇၼႃႇၵၢၼ်ၽွင်းငမ်းၶဝ်  ႁႂ်ႈမၼ်ႈၵိုမ်းၵႂႃႇၵူၺ်း။  ၶဝ်ဢမ်ႇသႂ်ႇၸႂ်လွင်ႈဝႃႈ  ၸွင်ႇမၼ်းတေမီး လွင်ႈၽဵင်ႇပဵင်းလႄႈ ၸွင်ႇၵူၼ်းမိူင်းၵူႈၵေႃႉတေၶဝ်ႈႁူမ်ႈပႃး ။

 ၼႂ်းၵႄႈလွင်ႈသုၵ်ႉသၵ်ႉၼမ်သေ မႃးၸတ်းႁဵတ်းပၢင်လိူၵ်ႈတင်ႈၼႆႉ ၶႃႈႁၼ်ဝႃႈ ပၢင်လိူၵ်ႈတင်ႈ ဢၼ်သိုၵ်းမၢၼ်ႈ ဢွၼ်ၸတ်းၼႆႉၶဝ် ၶႂ်ႈႁႂ်ႈမႃးပဵၼ်တွၼ်ႈတႃႇႁႅင်းၵမ်ႉ လွင်ႈပိူင်ၽွင်းငမ်း သိုၵ်းမၢၼ်ႈ  ၵူၺ်း။  မၼ်းတေဢမ်ႇၵႂႃႇၸူး လွင်ႈၽဵင်ႇပဵင်း။  ယူႇတီႈၶႃႈပဵၼ်ၵူၼ်းၼုမ်ႇၵေႃႉၼိုင်ႈၵေႃႈ မီးၶေႃႈ ထၢမ်ႇဝႃႈ  ပၢင်လိူၵ်ႈတင်ႈၼႆႉၸွင်ႇမၼ်းမီးလွင်ႈၽဵင်ႇပဵင်း တွၼ်ႈတႃႇ ၵူၼ်းမိူင်းႁဝ်းတေႉယူႇႁႃႉ ။

လွင်ႈၶဵင်ႇတႃႉ တွၼ်ႈတႃႇ ၵူၼ်းၼုမ်ႇႁဝ်းၶႃႈတႄႉ ဢွၼ်တင်းသုတ်း  ပဵၼ်လွင်ႈႁူမ်ႇလူမ်ႈ ၊ ပေႃးၵႂႃႇသႂ်ႇ ၶႅပ်းၵၢင်ၸႂ်ၼႆႉ တွၼ်ႈတႃႇ လွင်ႈႁူမ်ႇလူမ်ႈၵူၼ်းမိူင်းႁဝ်းၶႃႈၼႆႉ မီးလႆႈႁူဝ်ပၢၵ်ႇတဵမ်ယူႇၶႃႈႁႃႉ ၊ ပေႃးသႂ်ႇ ၶႅပ်းၵၢင်ၸႂ် ဢၼ်ဢမ်ႇၸႂ်ႈသိုၵ်းမၢၼ်ႈၼၼ်ႉ ဝၢႆးလင်ၼၼ်ႉၶႃႈလူး ႁဝ်းၶႃႈ ၸွင်ႇတေႁူမ်ႇလူမ်ႈၶႃႈႁႃႉ ၊ ပေႃးဢွၵ်ႇတႃႈပႆႇတၢင်းၸိူဝ်ႈၼႆႉ လႆႈမႆႈၸႂ်ပႃး  ၊ ပေႃးပၼ်ၵႂႃႇယဝ်ႉသေတႃႉ ၸွင်ႇမၼ်းတေလႆႈလွင်ႈ ၽဵင်ႇပဵင်းတေႉယူႇႁႃႉၼႆ မီးၶေႃႈထၢမ် ၸိူင်ႉၼႆဝႆႉ ။ 

ပၢင်လိူၵ်ႈတင်ႈ ဢၼ်ၵူၼ်းၼုမ်ႇႁဝ်းမုင်ႈမွင်း ၶႂ်ႈလႆႈတႄႉၼၼ်ႉၵေႃႈ ပိူင်လူင်မၼ်းၶႂ်ႈႁႂ်ႈမီးလွင်ႈၽဵင်ႇပဵင်း ၵူၼ်းၵူႈၵေႃႉတေလႆႈၶဝ်ႈႁူမ်ႈပႃး ၊ ပႃႇတီႇၵူႈဢၼ်တေလႆႈၶဝ်ႈႁူမ်ႈပႃး ၊ မၼ်းတေဢမ်ႇမီးမၵ်းၶၢၼ်း သင် ယဝ်ႉၵေႃႈ ပဵၼ်သဵင်ၵၢင်ၸႂ်ၵူၼ်းမိူင်း ဢၼ်ၵူၼ်းလိူၵ်ႈတေႉတေႉ၊ မိူၼ်ၼင် တႅၼ်းၽွင်းဢၼ်ၵူၼ်း ပိုၼ်ႉ တီႈလိူၵ်ႈ ၊ ပဵၼ်တႅၼ်းၽွင်းဢၼ်ႁဵတ်းပၼ် တွၼ်ႈတႃႇ ၵူၼ်းပိုၼ်ႉတီႈလႄႈ ၵူၼ်းပိုၼ်ႉတီႈယုမ်ႇၸႂ် လႆႈ ၸႂ် ။ ဢမ်ႇၸႂ်ႈ ပဵၼ်ၵူၼ်းသိုၵ်းမၢၼ်ႈသေ ယူႇတီႈၾၢႆႇသိုၵ်းမၢၼ်ႈသေ ၶိုၼ်းမႄးၸွႆႈသိုၵ်းမၢၼ်ႈၶိုၼ်း ၸိူင်ႉ ၼၼ် ။ ၶႂ်ႈႁႂ်ႈပဵၼ်ပၢင်လိူၵ်ႈတင်ႈ ဢၼ်မီးလွင်ႈၽဵင်ႇပဵင်းသေ ၶႂ်ႈႁႂ်ႈၵူၼ်းမိူင်းတွတ်ႈၶႅပ်းၵၢင်ၸႂ် ဢၼ် ၵူၼ်းမိူင်းၶႂ်ႈပၼ်ၼၼ်ႉတေႉတေႉ ႁႂ်ႈလၢတ်ႈလႆႈလွတ်ႈလွတ်ႈလႅဝ်းလႅဝ်း ။

သင်ၸိူဝ်ႉဝႃႈ တိုၼ်းတေလႆႈၵႂႃႇသႂ်ႇပၼ်ၶႅပ်းၵၢင်ၸႂ်ယူႇၼႆ ၶႂ်ႈၾၢၵ်ႇထိုင်ဝႃႈ လွင်ႈႁူမ်ႇလူမ်ႈ ၵူၼ်းႁဝ်းၶႃႈၼႆႉပဵၼ်ပိူင်လူင်  ပၢင်လိူၵ်ႈတင်ႈ ဢၼ်သိုၵ်းမၢၼ်ႈဢွၼ်ၼမ်းႁဵတ်းတလဵဝ်ၼႆႉတႄႉ မၼ်းတိုၼ်းဢမ်ႇမီးလွင်ႈ ၽဵင်ႇပဵင်းႁဵတ်းဝႆႉတွၼ်ႈတႃႇၶဝ်ၵူၺ်းဢေႃႈ   ။”

တွၼ်ႈတႃႇၵူၼ်းမိူင်းတႄႉ ၵႂႃႇသႂ်ႇၵေႃႈမီးၽေး ဢမ်ႇၵႂႃႇသႂ်ႇၵေႃႈမီးၽေး

ပၢင်လိူၵ်ႈတင်ႈဢၼ်သိုၵ်းမၢၼ်ႈတေဢွၼ်ၼမ်းၸတ်းႁဵတ်းၼႆႉ – တွၼ်ႈတႃႇၵူၼ်းမိူင်းတႄႉ မိူၼ်တႆႇ ၽင်ႇမေႃႈဝႆႉ။ ပေႃးတေတွတ်ႈပၼ်ၶႅပ်းၵၢင်ၸႂ်ၶဝ်ၵေႃႈ တေမိူၼ်သူၼ်းၾႆးတႃႇႁုင်တူမ်ႈ တူဝ်ၸဝ်ႈၵဝ်ႇ ၶိုၼ်း။ ပေႃးတေဢမ်ႇသႂ်ႇပၼ်ၶႅပ်းၵၢင်ၸႂ် သမ်ႉတေထုၵ်ႇတီႉၺွပ်းယဵတ်ႈၶွၵ်ႈ။ သႄႉသွမ်း ထတ်းသၢင် ပၢင်လိူၵ်ႈတင်ႈ ၵေႃႈဢမ်ႇလႆႈ ။ ၵွပ်ႈၼႆ ယွၼ်ႉပၢင်လိူၵ်ႈတင်ႈၼႆႉသေ ၵူၼ်းမိူင်းမီးၽေးလႆႈ ၵူႈၶၢဝ်းယၢမ်း ၼႆ ယိင်းယိင်း လုၵ်ႈႁဵၼ်းၸၼ်ႉၸွမ် တီႈဝဵင်းတူၼ်ႈတီးလၢတ်ႈၼင်ႇၼႆ။

“ပေႃးပဵၼ်လႆႈတႄႉ ဢမ်ႇၶႂ်ႈၵႂႃႇသႂ်ႇ တေလႆႈသႂ်ႇသင်ၵေႃႈ ဢမ်ႇႁူႉ ၊ မီးပႃႇတီႇသင်လၢႆလၢႆၵေႃႈ ဢမ်ႇႁူႉ။

ႁဝ်းၶႃႈၵူၼ်းၼုမ်ႇၸိူဝ်းယူႇၼႂ်းမိူင်းမၢၼ်ႈမိူင်းတႆးတႄႉ ဢမ်ႇၶႂ်ႈၵႂႃႇပၼ်ၶႅပ်းၵၢင်ၸႂ်ၵေႃႈဢမ်ႇၸၢင်ႈ တိုၼ်းတေလႆႈၵႂႃႇပၼ်ယဝ်ႉ။

ၵဵဝ်ႇ ၵပ်းလွင်ႈပၢင်လိူၵ်ႈတင်ႈၼႆႉ သိုၵ်းမၢၼ်ႈၶဝ် ႁၢင်ႈႁႅၼ်းတႄႉႁၢင်ႈႁႅၼ်းဝႃႈ ၊ တွၼ်ႈတႃႇႁဝ်းၵူၼ်းမိူင်းတႄႉ ထတ်းသၢင်ၵေႃႈဢမ်ႇလႆႈ သႄႉသွမ်းၵေႃႈဢမ်ႇလႆႈ ဝႃႈဢမ်ႇၵႂႃႇသႂ်ႇၶႅပ်းၵၢင်ၸႂ်ပၼ်ၼႆၵေႃႈဢမ်ႇလႆႈ။ ၺႃးတီႉၺႃးမတ်ႉတိၵ်းတိၵ်းလႄႈ ပိူၼ်ႈၵေႃႈၵူဝ် ႁဝ်းၵေႃႈၵူဝ်ဢေႃႈတလဵဝ်တႄႉ။ ၵွပ်ႈၼႆပေႃးထၢမ်ၽႂ်ၵေႃႈ ဢွၼ်ၵၼ်ဝႃႈ ၵႃႈတေလႆႈၵႂႃႇသႂ်ႇၶႅပ်းၵၢင်ၸႂ်ၼႆယူႇယဝ်ႉ။

 ပေႃးဝႃႈဢမ်ႇၵႂႃႇသႂ်ႇ ဢမ်ႇၼၼ် ပေႃးဢမ်ႇၵႂႃႇသႂ်ႇၶႅပ်းၵၢင်ၸႂ်ၼႆ ဝၢႆးလင်မႃး ၵူဝ်မီးပၼ်ႁႃ  ၊  ၵူဝ်မီးၽေး ၵူဝ်ဢမ်ႇမီးလွင်ႈႁူမ်ႇလူမ်ႈ ၊   ဢွၵ်ႇတႃႈဢွၵ်ႇတၢင်းၵေႃႈ တေယၢပ်ႇဢေႃႈ ပေႃးဢမ်ႇမီးဝႂ်ႁပ်ႉႁွင်း ဢၼ်သႂ်ႇၶႅပ်းၵၢင်ၸႂ် ။

 တလဵဝ် တေႃႈၼင်ႇလုၵ်ႈႁဵၼ်းၸၼ်ႉၸွမ်ၵူၺ်းၵေႃႈ   ပေႃးဢမ်ႇမီးဝႂ်ႁပ်ႉႁွင်းတီႈၵၢင်ႉၵႄႇၼႂ်းဝၢၼ်ႈဝႃႈသႂ်ႇၶႅပ်းၵၢင်ၸႂ်လူင်ႈၼႃႈယဝ်ႉၼႆၼႆႉ   ဢမ်ႇၸၢင်ႈၵႂႃႇႁဵၼ်းလိၵ်ႈလူင် ။ ၵွပ်ႈၼႆ ႁဝ်းၶႃႈၵူၼ်းမိူင်း ၵူၼ်းၼုမ်ႇတႄႉဢမ်ႇမီးတၢင်းလိူၵ်ႈ။ ၵႃႈတေလႆႈၵႂႃႇသႂ်ႇယဝ်ႉ။ ၸၢင်ႈၵႂႃႇႁဵတ်းႁိုဝ် ႁၼ်ဢၼ်လႂ်သႂ်ႇဢၼ်ၼၼ်ႉၵူၺ်းယဝ်ႉ။ သႂ်ႇဢမ်ႇသႂ်ႇၵေႃႈၶဝ်တိုၼ်းတေပေႉယူႇယဝ်ႉ ဢမ်ႇလၢၵ်ႇလၢႆးသင်။”