တွၵ်ႊတိူဝ်ႊဢွင်ႇၸေႇယၵႅမ်ၽွင်းလူင် ႁွင်ႈၵၢၼ်ၾၢႆႇပၢႆးသၢႆႊ လႄႈ ဢၢႆႊထီႊ (IT) မိူင်းႁူမ်ႈတုမ် တႂ်ႈသိုၵ်းမၢၼ်ႈယိုတ်းမိူင်းၵုမ်း ၵႂႃႇႁူပ်ႉထူပ်းတင်း Mr. Chen Gang ၶျိူၼ်ႊၵၢင်ႊ ၽူႈၼမ်းၼႂ်း ပႃႇတီႇၶွမ်ႊမိဝ်ႊၼိတ်ႉ မိူင်းၶႄႇ Communist Party of China (CPC) တီႈဝဵင်းၼၢင်ႊၼိင်ႊ မိူင်းၶႄႇ ဢုပ်ႇဢူဝ်းၵၼ် တႃႇၸႂ်ႉတိုဝ်း AI ႁႂ်ႈၶိုတ်းၸၼ်ႉမိူၼ်ၵူႈၸိုင်ႈမိူင်း ဝႃႈၼႆ။
မိူဝ်ႈဝၼ်းတီႈ 5 လိူၼ်တီႊသႅမ်ႊပိူဝ်ႊ တူဝ်တႅၼ်း မိူင်းႁူမ်ႈတုမ် ဢၼ်ပႃး ၸွမ်ၽွင်းတၢင်သိုၵ်း တီႈလုမ်းၽွင်း တၢင်သိုၵ်း တေႃႇၶၢႆႇသူႉလိၼ်း လႄႈ တွၵ်ႊတိူဝ်ႊဢွင်ႇၸေႇယ ၼမ်း ၼႃႈသေ ၵႂႃႇႁူပ်ႉထူပ်းတင်း ၵႅမ်ႁူဝ်ပဝ်ႈပႃႇတီႇ လႄႈ ၽူႈၶဝ်ႈၸုမ်းၼႂ်းၵေႃႇမတီႇ ပႃႇတီႇၶွမ်ႊမိဝ်ႇၼိတ်ႉ – ဝႃႈၼႆ။
တီႈပၢင်ႁူပ်ႉထူပ်းၼၼ်ႉ Mr. Chen Gang လၢတ်ႈဝႃႈ ၵၢၼ်ၸႂ်ႉတိုဝ်း AI ၼႆႉ ပဵၼ်ငဝ်ႈငႃႇလူင် တႃႇၸိုင်ႈမိူင်း ASEAN ယဝ်ႉလႄႈ ၼင်ႇႁိုဝ်တေၸႂ်ႉ AI ႁဵတ်းပဵၼ်ၶိူင်ႈမိုဝ်း တႃႇၸႂ်ႉတိုဝ်းလႆႈၼႂ်းၵၢၼ်ၼၼ်ႉ တေလႆႈယုၵ်ႉ မုၼ်းၼမ်ႉၵတ်ႉၵႂႃႇထႅင်ႈတင်းၼမ်၊ မိူင်းၶႄႇ တင်း မိူင်းမၢၼ်ႈၼႆႉ ပဵၼ်မိူင်းတိတ်းၸမ်ၵၼ်လႄႈ ၼင်ႇႁိုဝ် တင်းသွင်မိူင်း တေမီးလွင်ႈၸမ် ၸႂ်ၵၼ်သေ ႁဵတ်းသၢင်ႈၵၢၼ်လွင်ႈယႂ်ႇၵႂႃႇၸွမ်းၵၼ်လႆႈ ၶိုၵ်ႉလိုၵ်ႉၼၼ်ႉၵေႃႈ လူဝ်ႇႁူမ်ႈၵၼ်ၸႂ်ႉတိုဝ်း AI ၵႂႃႇ ၼႆယဝ်ႉ။
တွၵ်ႊတိူဝ်ႊဢွင်ႇၸေႇယ ၵႅမ်ၽွင်းလူင်တူဝ်တႅၼ်းမိူင်းမၢၼ်ႈၵေႃႈဢုပ်ႇဢူဝ်းဝႃႈ – တႃႇႁူမ်ႈမိုဝ်း တင်း မိူင်းၶႄႇသေၸႂ်ႉတိုဝ်း AI ၵႂႃႇလႆႈလီၼၼ်ႉၵေႃႈ ၶတ်းၸႂ်ႁဵတ်းသၢင်ႈတမ်းဝၢင်းတိုတ်ႉၸၼ် မူႇပိူင် ၵၢၼ်ၸႂ်ႉတိုဝ်းၺၢၼ်ႇပွမ်ၸၼ်ႉၸိူဝ်ႉၸၢတ်ႈ (AI) ယဝ်ႉလီငၢမ်း။ ထႅင်ႈဢမ်ႇႁိုင်ၵေႃႈ မီးၽႅၼ်ၵၢၼ် တေမၵ်းမၼ်ႈၸႂ်ႉတိုဝ်းၵႂႃႇပဵၼ်တၢင်းၵၢၼ် ဝႃႈၼႆ။
ၼင်ႇႁိုဝ် မိူင်းမၢၼ်ႈ – မိူင်းၶႄႇ တေမီးလွင်ႈၸမ်ၸႂ်ၵၼ်သေ သိုပ်ႇႁဵတ်းသၢင်ႈၼႃႈၵၢၼ်ၵႂႃႇၸွမ်းၵၼ်လႆႈၶၢဝ်း ႁိုင်ၼၼ်ႉ တီႈၶူင်းၵၢၼ်လူင် သဵၼ်ႈတၢင်းႁွပ်ႈလူၵ်ႈ ဢၼ်ၸႂ်ႉတိုဝ်း Digital သေ ၶိုင်ပွင်ယူႇၼၼ်ႉၵေႃႈ တေဢဝ် AI သႂ်ႇပႃးႁဵတ်းသၢင်ႈၵႂႃႇၸွမ်းထႅင်ႈ ၼႆယဝ်ႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ