ဝၼ်းတီႈ 8/12/2025 မိူဝ်ႈဝႃးယၢမ်းၵၢင်ၶမ်ႈ 6 မူင်းၶိုင်ႈ ပလိၵ်ႈထႆးမိူင်းလမ်းပုၼ်း လူင်းၵူတ်ႇထတ်းပိုၼ်ႉတီႈ ထူပ်းႁၼ်ႁႅင်းၵၢၼ်ယၢၼ်မိူင်းၵူၼ်းမိူင်းမၢၼ်ႈၵေႃႉၼိုင်ႈၶၢႆၼမ်ႉထူဝ်ႇ(ၼမ်ႉတဝ်ႉႁူႉ)တီႈၶၢင်ႈတၢင်းတီႈၼိုင်ႈ-ၵူတ်ႇထတ်းႁၼ်ဝႃႈႁဵတ်းၵၢၼ်ၽိတ်းတီႈ ၼႆသေတီႉၺွပ်းဢဝ်လိူင်ႈ။
ႁၢၼ်ႉၶၢႆၼမ်ႉတဝ်ႉႁူႉလႄႈ ၶဝ်ႈတူမ်ႈ ၼၼ်ႉ မီးၶၢင်ႈတၢင်းလူင်116 မူႇ15 ဝၢၼ်ႈၼမ်ႉပေႃႇလူင် ဢိူင်ႇပႃႇသၵ်း ဝဵင်းလမ်းပုၼ်း ၸႄႈတွၼ်ႈလမ်းပုၼ်း။
ပလိၵ်ႈၶဝ်ႈဢုပ်ႇလၢတ်ႈထၢမ်ထတ်းသေလႆႈႁူႉဝႃႈ ၵူၼ်းၶၢႆၼမ်ႉထူဝ်ႇၼၼ်ႉပဵၼ်ႁႅင်းၵၢၼ်ၵူၼ်းမိူင်းမၢၼ်ႈ။ မၼ်းၼၢင်းလႆႈဢၼုယၢတ်ႈႁဵတ်းၵၢၼ်ႁပ်ႉၸၢင်ႈၵူႈလွင်ႈလွင်ႈ (ၵမ်ႊမၵွၼ်ႊ) ဝႆႉ။ ၵူၺ်းၵႃႈ ၵၢၼ်ၶၢႆၼမ်ႉထူဝ်ႇလႄႈၶဝ်ႈတူမ်ႈၼႆႉ ပဵၼ်ၵၢၼ် ဢၼ်ႁႅင်းၵၢၼ်လႆႈႁပ်ႉငိုၼ်း ထွၼ်ငိုၼ်းၵမ်းသိုဝ်ႈလႄႈ- လူင်ပွင်ႈၸိုင်ႈထႆးႁၢမ်ႈဝႆႉ။ ဢမ်ႇပၼ်ၶႂၢင်ႉႁႅင်းၵၢၼ်ႁဵတ်း ယွၼ်ႉဝႃႈ မိူၼ်ႁႅင်းၵၢၼ်မႃးႁိမ်ၵၢၼ်ၵူၼ်းမိူင်းးထႆးႁဵတ်း -ဝႃႈၼႆ။
ယၢမ်းလဵဝ် ပလိၵ်ႈလမ်းပုၼ်းတီႉၺွပ်းၼၢင်းယိင်းဢၼ်ၶၢႆၼမ်ႉထူဝ်ႇၼၼ်ႉသေၵုမ်းၶင်ဝႆႉတီႈႁူင်းပလိၵ်ႈမိူင်ၵျီႉ တီႈဝဵင်းလမ်းပုၼ်းဝႆႉ။
ၸွမ်းၼင်ႇမၢႆမီႈၾၢႆႇႁႅင်းၵၢၼ် ၼႂ်းမိူင်းထႆးမီးဝႆႉတႄႉ -ဢၼ်လူင်ပွင်ၸိုင်ႈထႆးပၼ်ၶႂၢင်ႉႁႅင်းၵၢၼ်ယၢၼ်မိူင်းႁဵတ်းဝႆႉမီး 4 ယၢင်ႇၵူၺ်း။ပဵၼ်ၵၢၼ် ၵမ်ႊမၵွၼ်ႊ (ႁပ်ႉၸၢင်ႈႁဵတ်းၵၢၼ်ၼၵ်းၼႃလႄႈၽဵဝ်ႈလၢင်ႉတီႈဝူၺ်ႇႁင်ႈ)၊ ႁပ်ႉၸႂ်ႉၼႂ်းႁိူၼ်း(မႄႈဝၢၼ်ႈ)၊ၽူႈပသၢၼ်ငၢၼ်း(လၢမ်ႈပိၼ်ႇၽႃႇသႃႇၵူၼ်းၶိူဝ်းၸဝ်ႈၵဝ်ႇ(မၢၼ်ႈ/ၵမ်ႇပေႃႊတီႊယႃႊ/လၢဝ်း)လႄႈၵၢၼ်ႁပ်ႉၸၢင်ႈမႄးၶိူင်ႈၸၢၵ်ႈႁိူဝ်း(ႁိူဝ်းႁႃပႃ ၼႂ်းၼမ်ႉပၢင်ႇလၢႆႇ) ၵူၺ်း။
ၵၢၼ်ဢၼ်ႁၢမ်ႈႁႅင်းၵၢၼ်ႁဵတ်းတႄႉ မီး 39 ယၢင်ႇ။ မိူၼ်ၼင်ႇၵၢၼ်ၶၢႆၶူဝ်းၼႃႈႁၢၼ်ႉ၊ ၵႅတ်းၶူၼ်ႁူဝ် /ႁဵတ်းႁၢင်ႈ၊ ၽူႈၼမ်းဢႅဝ်ႇယဵမ်ႈတွင်ႈတဵဝ်း၊ ဢႅဝ်ႇၶၢႆၶူဝ်းၶွင်တၢင်းၵိၼ်တၢင်းယမ်ႉ၊ ၵၢၼ်ႁဵတ်းၸလေးၽူႈမၢႆ၊ၵၢၼ်ၼႂ်းလုမ်းၼႂ်းၸႆး- ၸိူဝ်းၼႆႉ။ ၵၢၼ်ၸိူဝ်းၼႆႉ ပဵၼ်တႃႇၵူၼ်းမိူင်းထႆးႁဵတ်းၵူၺ်း။ သင်ၸိူဝ်ႉႁႅင်းၵၢၼ်ၵႂႃႇႁဵတ်းၽိတ်းမႅၼ်ႈၸိုင် တွၼ်ႈတႃႇႁႅင်းၵၢၼ် တေမီးတူတ်ႈတၢမ်ႇ ၶွၵ်ႈ 5 ပီ ငိုၼ်း 1 သႅၼ်ဝၢတ်ႇ။ တွၼ်ႈတႃႇ ပေႃႈလဵင်ႉမႄႈလဵင်ႉသမ်ႉ တေမီးတူတ်ႈတၢမ်ႇငိုၼ်း 4 သႅၼ်ထိုင်7 သႅၼ်ဝၢတ်ႇ – တႅမ်ႈဝႆႉၼင်ႇၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ