ၸိုင်ႈမိူင်းလႂ် ၸိုင်ႈမိူင်းၼၼ်ႉ ၵူၼ်းမိူင်းမုင်ႈမွင်းၶႂ်ႈမီးလူင်ပွင်ၸိုင်ႈ ဢၼ်ပၼ်လွင်ႈႁူမ်ႇလူမ်ႈလႄႈ ပၼ်လွင်ႈထၢင်ႇႁၢင်ႈလႆႈၸတ်းလႆႈပွင် ၵၢမ်ႇၵျမ်ႇမႃႇတူဝ်ၵဝ်ႇ။ ဢမ်ႇဝႃႈ ၼႂ်းၵၢၼ်ယူႇၵၢၼ်ၵိၼ် ၵၢၼ်ႁဵၼ်းၵၢၼ်သွၼ် ၵၢၼ်ၵူႈလွင်ႈလွင်ႈ ၵူၼ်းမိူင်းၵေႃႉလႂ်ၵေႃႈ ၶႂ်ႈႁႂ်ႈမၼ်းၶိုၼ်ႈယႂ်ႇမႂ်ႇသုင်လွၼ်ႉလွၼ်ႉ ။ တိူၵ်ႈတီႈဝႃႈ တူၵ်းၵမ်းၵိၼ်းမႃးၵေႃႈ ႁႂ်ႈမီးလူင်ပွင်ၸိုင်ႈ လူလွမ်တူၺ်းထိုင်ပၼ် ။

ပေႃးတူၺ်းၼႂ်းမိူင်းၸိုင်ႈထႆးၼႆ ၵၢၼ်မိူင်းယုင်ႈယူႇသေတႃႉ လူင်ပွင်ၸိုင်ႈၶဝ် ဝႆႉၵူၼ်းမိူင်းလမ်ႇလွင်ႈလႄႈဝႆႉၵႃႈၶၼ်တႄႉတႄႉ ။ တႃႇတေလူတ်းယွမ်းလႆႈ လွင်ႈတုၵ်ႉလွင်ႈယၢၵ်ႈၵူၼ်းမိူင်းၼၼ်ႉ တင်ႈၸႂ်ႁဵတ်းဢွၵ်ႇပိူင် တႃႇလူတ်းယွၼ်ႇ တၢင်းတုၵ်းၵူၼ်းမိူင်းလူးၵွၼ်ႇ ။ တႃႇႁႂ်ႈၵူၼ်းသိုဝ်ႉၵူၼ်းၶၢႆ သွင်ပႃႈၾၢႆႇတေငၢႆႈလူမ်ႈၸႂ်ၼၼ်ႉ လူင်ပွင်ၸိုင်ႈထႆး ႁဵတ်းဢွၵ်ႇၶူင်းၵၢၼ် ပိူင်ၸၢႆႇၵေႃႉၶိုင်ႈ ၊ ၵူၼ်းမိူင်းၵူႈၵေႃႉ မီးသုၼ်ႇၶဝ်ႈႁူမ်ႈ ။ ၾၢႆႇထႆးတႄႉႁွင်ႉဝႃႈ ” โครงการคนละครึ่ง ” ။

ပိူင်ၸၢႆႇငိုၼ်းၵေႃႉၶိုင်ႈ ဢၼ်ၾၢႆႇထႆးႁွင်ႉဝႃႈ ၶူင်းၵၢၼ် ၶူၼ်ႊလၶိုင်ႉ คนละครึ่ง ၼၼ်ႉ လူင်ပွင်ၸိုင်ႈထႆး ယၢမ်ႈၸႂ်ႉ မႃး မိူဝ်ႈၽွင်းတၢင်းပဵၼ် ၶူဝ်ႊဝိတ်ႉလၢမ်းၽႄႈႁၢဝ်ႈႁႅင်းၼၼ်ႉ ။ ပိူင်လူင်မၼ်း တႃႇၽိုၼ်ႉၽူးၶိုၼ်း ပၢႆးမၢၵ်ႇမီးၸိုင်ႈမိူင်း ဢၼ်တူၵ်းတႅမ်ႇၵႂႃႇၼၼ်ႉလႄႈသင် တႃႇၸွႆႈၵၢၼ်ယူႇၵၢၼ်ၵိၼ် ၵူၼ်းဝၢၼ်ႈၵူၼ်းမိူင်း ၶိုၼ်း လႄႈသင်ၸိူဝ်းၼႆႉ ။

တႃႇထႅမ်လႆႈ တၢင်းလူဝ်ႇၵူၼ်းဝၢၼ်ႈၵူၼ်းမိူင်းၼၼ်ႉ ၸိုင်ႈထႆးတႄႉ ဝႆႉၵူၼ်းမိူင်းပဵၼ်ယႂ်ႇသေ တူၺ်းထိုင်လူလွမ်ပၼ် ။ ၶူင်းၵၢၼ်ၶူၼ်ႊလၶိုင်ႉ ပိူင်ၸၢႆႇၵေႃႉၶိုင်ႈၼႆႉ တႄႇမီးမႃး မိူဝ်ႈပၢၼ်ၸွမ်ၽွင်းလူင် ပရႃႊယုတ်းၸၼ်ႊဢူဝ်ႊၶျႃႊ ၽွင်း 2020 ၊ ၸႅၵ်ႇဢွၵ်ႇပဵၼ်ၶၵ်ႉပဵၼ်တွၼ်ႈ မီးပွၵ်ႈၵမ်း 1 ထိုင် 5 (Phases 1- 2- 3 တေႃႇထိုင် 4 – 5 ၸိူဝ်းၼႆႉ) ။

ဝၢႆးသေၼၼ်ႉၵေႃႈ ၶူင်းၵၢၼ် ပိူင်ၸၢႆႇၵေႃႉၶိုင်ႈၼႆႉ သိုပ်ႇမီးမႃးၶပ်ႉၶပ်ႉတၢမ်းတၢမ်း တႄႇၼႂ်းပီ 2020 တေႃႇထိုင် 2022 ၶူင်းၵၢၼ်ၵမ်းထူၼ်ႈၼိုင်ႈၼၼ်ႉ ၸင်ႇယဝ်ႉတူဝ်ႈၵႂႃႇ ။ ၼႂ်းၶၢဝ်းတၢင်း 2 ပီ ဢၼ်ၸႂ်ႉပိူင်ၸၢႆႇၵေႃႉၶိုင်ႈၼၼ်ႉ ၵူၼ်းၸႂ်ႉ မၼ်း မီး 20 – 28 လၢၼ်ႉၵေႃႉသေ ငိုၼ်းဢၼ်မုၼ်ပၼ်ႇၵႂႃႇၼႂ်းၶူင်းၵၢၼ်ၼႆႉ 4.2 သႅၼ်လၢၼ်ႉဝၢတ်ႇ ၼႆ သိုဝ်ႇထႆး Thaipbs ႁၢႆးငၢၼ်းဝႆႉၼင်ႇၼႆ။

ၵၢၼ်ဢၼ်လႆႈၼမ်ႉတွၼ်းၽွၼ်းလီၸွမ်း ၶူင်းၵၢၼ် ၸၢႆႇၵေႃႉၶိုင်ႈ ၼႆႉ ပဵၼ်ၵၢၼ်ၶၢႆၵုၼ်ႇ ၸိူဝ်းၶၢႆလုမ်းလႄႈၶၢႆယွႆႈ ၊ ႁၢၼ်ႉတၢင်းၵိၼ်လႄႈႁူင်းႁႅမ်း ၊ ယေးငိုၼ်းလႄႈ ၵၢၼ်ၸွင်းၸေး( ဝန်ဆောင်မူ) ၊ ၵၢၼ်ၽုၵ်ႇသွမ်ႈလႄႈႁူင်းၸၢၵ်ႈဢိတ်ႇဢွၵ်ႇၵုၼ်ႇၵိၼ်ယႅမ်ႉၸိူဝ်းၼႆႉ ဝႃႈၼႆ။

တေႃႇထိုင်မႃး ပၢၼ်လူင်ပွင်ၸိုင်ႈထႆး ပီ 2025 ၼႆႉၵေႃႈ ဢိင်ၼိူဝ်ၽွၼ်းလီဢၼ်ယၢမ်ႈမီးမႃး ပွၵ်ႈဢွၼ်တၢင်းၼၼ်ႉ သေ ၸင်ႇပိုၼ်ၽၢဝ်ႇဝႃႈ တေသိုပ်ႇၸႂ်ႉၶူင်းၵၢၼ်ၶူၼ်ႊလၶိုင်ႉၵႂႃႇထႅင်ႈ ။ ထႅမ်ၸိုဝ်ႈမႂ်ႇဝႃႈ ၶူၼ်ႊလၶိုင်ႉၽလတ်ႉသ် “คนละครึ่งพลัส” ။
ဝၢႆးသေ ၶူင်းၵၢၼ် ပိူင်ၸၢႆႇငိုၼ်းၵေႃႉၶိုင်ႈၵမ်းထူၼ်ႈၼိုင်ႈ ယဝ်ႉၵႂႃႇ မွၵ်ႈ 3 ပီယဝ်ႉၼႆႉ မိူဝ်ႈလဵဝ် သမ်ႉတေၶိုၼ်းမႃး ပၼ်ႇၵၢၼ်ၶိုၼ်းလႄႈ ၼင်ႇႁိုဝ် ပေႃးတေၶဝ်ႈၵၼ်တင်းငဝ်းလၢႆးယၢမ်းလဵဝ်ၼၼ်ႉ လူင်ပွင်ၸိုင်ႈထႆး ၸင်ႇမႄး ပိူင်ယွႆႈ မၼ်းဢိတ်းဢီႈ ။ ၵွပ်ႈဝႃႈ မိူဝ်ႈၵမ်းထူၼ်ႈၼိုင်ႈၼၼ်ႉ ငဝ်းလၢႆးမၼ်းဢိင်ၼိူဝ်ၶူဝ်းဝိတ်ႉလၢမ်းၽႄႈသေ ပဵၼ်မႃး။

ပွၵ်ႈၼႆႉတႄႉ ဢိင်ၼိူဝ်ၶူင်းၵၢၼ်ၼၼ်ႉ မီးၽွၼ်းလီတႃႇၸိုင်ႈမိူင်းလႄႈ ၸင်ႇတူၵ်းလူင်းလႆႈၸႂ်ၵၼ်သေ ၸင်ႇဢဝ် ၶူင်းၵၢၼ်ၶူၼ်ႊလၶိုင်ႉ ပိူင်ၸၢႆႇၵေႃႉၶိုင်ႈၼႆႉ မႃးပၼ်ႇၵၢၼ်ထႅင်ႈၵမ်းၼိုင်ႈ။
ဢၼ်မီးၸိုဝ်ႈမႂ်ႇဝႃႈ ၶူၼ်ႊလၶိုင်ႉၽလတ်ႉသ် “คนละครึ่งพลัส” ၽလတ်သ်ႉၼႆၼၼ်ႉ ပွင်ႇဝႃႈ ထႅမ်မႃးထႅင်ႈ ပိူင်ၼႂ်းၶူင်း ၵၢၼ်မႂ်ႇမႂ်ႇ ။ ၸင်ႇၼၼ်လႄႈ ၸႅၵ်ႇၼႄဝႆႉ ပဵၼ် ၽလတ်ႉသ် 1 2 3 တႄႇၵႂႃႇ။
မိူၼ်ၼင်ႇ ၶၵ်ႉတွၼ်ႈ 1 (พลัสที่ 1 ) ၼႆႉၼႆၸိုင် မိူဝ်ႈ 2020 ၼၼ်ႉ မၵ်းမၼ်ႈဝႆႉဝႃႈ ဢႃယု 18 ပီတဵမ် ၸင်ႇၶဝ်ႈ ၸႂ်ႉပိူင် ၸၢႆႇၵေႃႉၶိုင်ႈၼႆႉလႆႈ ၊ ၼႂ်းတွၼ်ႈမႂ်ႇၼႆႉတႄႉ တႄႇ ဢႃယု 16 ပီတဵမ် ၶိုၼ်ႈၼိူဝ်။
ၼႂ်း ၶၵ်ႉတွၼ်ႈ 2 (พลัสที่ 2 ) တႄႉ မိူဝ်ႈဢွၼ်တၢင်းၼၼ်ႉ ၼိုင်ႈဝၼ်းလႂ် ၸႂ်ႉပိူင်ၸၢႆႇၵေႃႉၶိုင်ႈၼႆႉ ထိုင် 160 ဝၢတ်ႇၵူၺ်း မိူဝ်ႈလဵဝ် ပဵၼ်ၵႂႃႇ 200 ဝၢတ်ႇ ။

ၶၵ်ႉတွၼ်ႈ 3 (พลัสที่ 3 ) ၵူၼ်းမိူင်းၸိူဝ်းဢၼ်လႆႈသႂၢင်းၶွၼ်ႇတီႈလူင်ပွင်ၸိုင်ႈၼၼ်ႉ တေလႆႈၸႂ်ႉငိုၼ်းၼႂ်းပိူင်ၸၢႆႇၵေႃႉၶိုင်ႈၼႆႉ 2400 ဝၢတ်ႇ ၊ ပေႃးၸိူဝ်းဢမ်ႇၸၢႆႇတႄႉ တေလႆႈႁပ်ႉငိုၼ်းၸၢႆႇၵေႃႉၶိုင်ႈ 2000 ဝၢတ်ႇၵူၺ်း ။
တေႃႇထိုင် ၶၵ်ႉတွၼ်ႈ 4 လႄႈ 5 (พลัสที่ 4 – 5 ) ၼၼ်ႉၵေႃႈ မီးလွင်ႈလႅၵ်ႈလၢႆႈ။

ပိူင်ၸၢႆႇငိုၼ်းၵေႃႉၶိုင်ႈၼႆႉ တေၸႅၵ်ႇဢွၵ်ႇပဵၼ် 2 တွၼ်ႈ တႃႇၵူၼ်းၵေႃႉလႂ်ၵေႃႉလႂ်ၵေႃႉၼၼ်ႉ တေပဵၼ်ဝႆႉပိူင်ႁင်းၵူၺ်းမၼ်းၶေႃၶေႃသေ တႃႇလၢၼ်ႉၵူႈသႅၼ်းသမ်ႉ တေပဵၼ်ႁင်းၵူၺ်းမၼ်းၶေႃၶေႃ။
တႃႇတေတၢင်ႇယိုၼ်ႈၸႂ်ႉပိူင်ၼႆႉလႆႈၼၼ်ႉ တေလႆႈၶဝ်ႈ ၼႂ်းဝႅပ်ႉသၢႆႉ ၶူၼ်ႊလၶိုင်ႉ “คนละครึ่ง” ။ ပေႃးထႅမ်ၸိုဝ်ႈတၢင်ႇယိုၼ်ႈတဵမ်ထူၼ်ႈယဝ်ႉၸိုင် လူင်ပွင်ၸိုင်ႈထႆး တၵ်းတေၸၢႆႇပၼ်ၵႃႈၵူႈၸိူဝ်းၸိူဝ်းဢၼ်ၶဝ်ႈပႃးၼႂ်းပိူင်ၶူၼ်ႊလၶိုင်ႉၼၼ်ႉ ၶိုင်ႈၼိုင်ႈ။
တႃႇတၢင်ႇယိုၼ်ႈလႆႈ ထႅင်ႈလၢႆးၼိုင်ႈၵေႃႈ ဢွၼ်တၢင်းသုတ်း တေလႆႈလူတ်ႇဝႆႉ ဢႅပ်ႊပလီႊၶေႊသျိၼ်ႊ ပဝ်တင်း ” เป๋าตัง ” ဢၼ်ႁွင်ႉဝႃႈ G-Wallet ထႅမ်သႂ်ႇငိုၼ်းသေ ၸႂ်ႉၸၢႆႇလႆႈ။

တႃႇထႅမ်ငိုၼ်းသႂ်ႇ ၼႂ်း G-Wallet ၼၼ်ႉ ၵူၼ်းဢၼ်ၸႂ်ႉမၼ်း တေလႆႈထႅမ်ငိုၼ်းၶဝ်ႈ လူၺ်ႈၸႂ်ႉ 1. Mobile Banking 2. QR Code PromptPay 3. တူႈ ATM
သင်ဝႃႈ ပဵၼ်ႁၢၼ်ႉ ၶႂ်ႈၶဝ်ႈႁူမ်ႈၸႂ်ႉပိူင်ၸၢႆႇၵေႃႉၶိုင် ၶူၼ်ႊလၶိုင်ႉ ၼႆၸိုင် တေလႆႈပဵၼ်ႁၢၼ်ႉတၢင်းၵိၼ်တၢင်းယႅမ်ႉ ၶဝ်ႈၽၵ်း ၼမ်ႉၸဵမ်းၼမ်ႉဝၢၼ်ၵူႈၸိူဝ်းၸိူဝ်း ၵူၺ်းၵႃႈ ဢမ်ႇၼပ်ႉပႃးလၢၼ်ႉၶၢႆထီႇလူင်ပွင်ၸိုင်ႈလႄႈသင် လၢၼ်ႉတၢင်းၵိၼ်သႅၼ်းဢၼ်ၸၢင်ႈမဝ်းမိင်းၵူႈသႅၼ်းၸိူဝ်းၼၼ်ႉလႄႈသင်ၸိူဝ်းၼႆႉ ။

မိူၼ်ၼင်ႇ ႁူင်းၼူတ်ႈတႃႇပၢႆးယူႇလီ นวด แผน ไทย ၼၼ်ႉၵေႃႈ ယင်းၸႂ်ႉပိူင်ၸၢႆႇၵေႃႉၶိုင်ႈ ။
ၵူၼ်းဢၼ်တေ တၢင်ႇယိုၼ်ႈၸႂ်ႉလႆႈပိူင်ၸၢႆႇၵေႃႉၶိုင်ႈၼႆႉ 1) တေလႆႈပဵၼ်ၵူၼ်းဢၼ်မီးဝတ်းဝႂ်ၵူၼ်းထႆး လႄႈ ပဵၼ်ၸိူဝ်ႉၸၢတ်ႈထႆး ၊ 2) တေလႆႈမီးဢႃယု 16 တဵမ် လႄႈ ၶိုၼ်ႈၼိူဝ် (ဢႃယုၼၼ်ႉ ၼပ်ႉတႄႇဢဝ်ဝၼ်း ဢၼ် လူင်းၸိုဝ်ႈတၢင်ႇယိုၼ်ႈၸႂ်ႉပိူင်ဢၼ်ၼႆႉ ၊ 3) တေဢမ်ႇလႆႈပဵၼ်ၵူၼ်းဢၼ် လႆႈလွင်ႈၵမ်ႉထႅမ်တီႈၸႄႈမိူင်း ပိုၼ်ႉတီႈလႂ်တီႈၼၼ်ႉဝႆႉ ။

ၵူၼ်းၸိူဝ်းဢၼ်ယိုၼ်ႈၸႂ်ႉပိူင်ၶူၼ်ႊလၶိုင်ႉၼႆႉ သိုဝ်ႉၶူဝ်းဢၼ်လႂ်ၵေႃႈ လူင်ပွင်ၸိုင်ႈ တေၸၢႆႇပၼ် ၼိုင်ႈၶိုင်ႈ ဝႃႈၼႆသေတႃႉ ၼိုင်ႈဝၼ်းလႂ် သမ်ႉတေၸၢႆႇပၼ် ဢမ်ႇလိူဝ် 200 ဝၢတ်ႇ။
တူဝ်ယၢင်ႇမၼ်း သင်ဝႃႈ သိုဝ်ႉၶူဝ်းၶွင်တၢင်းၵိၼ်သေသႅၼ်းသႅၼ်း တႃႇၵႃႈၶၼ် 400 ဝၢတ်ႇၼႆ ႁဝ်းၸၢႆႇ 200 ဝၢတ်ႇသေ လူင်ပွင်ၸိုင်ႈ တေၸၢႆႇပၼ်ၼႂ်းဢႅပ်ႊပလီႊသျိၼ်ႊၼၼ်ႉ 200 ဝၢတ်ႇ။ ၵူၺ်းၵႃႈ သင်သမ်ႉသိုဝ်ႉ ၵႃႈမၼ်းမႅၼ်ႈၵႂႃႇ 500 ၼႆႉတႄႉ လူင်ပွင်ၸိုင်ႈၵေႃႈ ၸၢႆႇပၼ်ဝႆႉ 200 ဝၢတ်ႇသေ ၵေႃႉဢၼ်သိုဝ်ႉမၼ်းၼႆႉသမ်ႉ တေလႆႈၸၢႆႇဢဝ်ႁင်းၵူၺ်း ။ မၼ်းတေၼပ်ႉၵႂႃႇပၼ် တေႃႇၶူင်းၵၢၼ်ၸၢႆႇၵေႃႉၶိုင်ႈၼႆႉ ပေႃးယဝ်ႉတူဝ်ႈ။

ႁၢၼ်ႉဢၼ်ၶဝ်ႈႁူမ်ႈသၢင်ႈၸွမ်း ၶူင်းၵၢၼ် ပိူင်ၸၢႆႇၵေႃႉၶိုင်ႈ ၶူၼ်ႊလၶိုင်ႉၼၼ်ႉ ၶဝ်တေဢဝ်ပၢႆႉဢၼ်တႅမ်ႈမၢႆဝႆႉ လူဝ်ႇၵူဝ်ႇ ၶူၼ်ႊလၶိုင်ႉၽလတ်ႉသ် “คนละครึ่งพลัส” သေ ႁွႆႈဝႆႉ ပႃႉဝႆႉ တၢင်းၼႃႈႁၢၼ်ႉၶဝ်ၼၼ်ႉ။
ႁၢၼ်ႉၵူႈသႅၼ်းသႅၼ်း ၶဝ်ႈတၢင်ႇယိုၼ်ႈၸႂ်ႉလႆႈၶူင်းၵၢၼ်ၼႆႉ တႄႇဢဝ် ဝၼ်းတီႈ 15/10/2025 ထိုင် 19/12/2025 ။ ၵူၼ်းမိူင်းသမ်ႉ တႄႇတၢင်ႇယိုၼ်ႈယွၼ်းၸႂ်ႉၶူင်းၵၢၼ်ၼႆႉလႆႈ သမၵ်းလႆႈ ၼႂ်းဝၼ်းတီႈ 20-26/10/2025 ။ တႄႇၸႂ်ႉတိုဝ်းလႆႈ တႄႇဢဝ် ဝၼ်းတီႈ 29/10/2025 ၼၼ်ႉသေ တေႃႇထိုင် ဝၼ်းတီႈ 31/12/2025 ။

ပိူင်ၸၢႆႇငိုၼ်းၵေႃႉၶိုင်ႈ ” โครงการคนละครึ่ง ” ၼႆႉ မိူဝ်ႈတႄႇၸႂ်ႉတိုဝ်းၼၼ်ႉတႄႉ မီးလွင်ႈၶွင်ႈၶမ်တင်းၼမ်သေတႃႉ ၵမ်းလိုၼ်းၵေႃႈ မၼ်းလူတ်းယွမ်းလႆႈၵႃႈၸႂ်ႉၸၢႆႇၵူၼ်းမိူင်း ၊ ၵူၼ်းမိူင်းၵေႃႈႁၼ်လီၸွမ်းၼမ် ။ လွၵ်းလၢႆးၸႂ်ႉမၼ်းၵေႃႈ ၵူၼ်းမိူင်းမေႃဝၢင်းၽႅၼ်ၸႂ်ႉတိုဝ်းမႃးလႄႈ ၸင်ႇဝႃႈ မီးၽွၼ်းလီတႃႇၵူၼ်းမိူင်းလႄႈလူင်ပွင်ၸိုင်ႈတႄႉတႄႉ ။

ဢၢင်ႈဢိင် မႃးတီႈ – thairath လႄႈ thaipbs