ပၢင်တွႆႇမူၺ်းၸိုဝ်ႈသဵင်ယႂ်ႇ UFC 323 ဝူင်ႈၼႆႉ ၽူႈတွႆႇမူၺ်းၸိုဝ်ႈသဵင်ယႂ်ႇ ၸၢဝ်းၶိူဝ်းၶျၢင်း ၵျေႃႉသျူႊဝႃႊ ဝၼ်ႊ (Jaushua Van) လႄႈ ဢလႅတ်ႊသၼ်ႊတရီႊ ပၼ်ႊတူဝ်ႊၵျႃႊ (Alesandre Pantoja) ၵူၼ်းမိူင်းပရႃႊသီး တေထုပ်ႉၶႅင်ႇၵၼ်။
ၵျေႃႉသျူႊဝႃႊ ဝၼ်ႊ ၼႆႉ လႆႈသုၼ်ႇထုပ်ႉၶႅင်ႇၵၼ်တင်း ၽူႈတွႆႇမူၺ်း ၸၼ်ႉၾလၢႆႊဝိတ်ႉ ၵမ်းဢွၼ်တၢင်းသုတ်း။
သင်ဝႃႈ မၼ်းၸၢႆး ပေႉ ဢလႅတ်ႊသၼ်ႊတရီႊ (Alesandre) ၼႆ တေပဵၼ်မႃး ၽူႈတွႆႇမူၺ်းလႆႈၶႅပ်းသၢႆႁတ်ႉ ၶျႅၼ်ႊပီႊယႅၼ်ႊ ၵမ်းႁႅၵ်ႈ။
ဝၼ်းၽတ်းပူၼ်ႉမႃးၼႆႉ ႁဵတ်းပၢင်သပ်းၸႅင်ႈၶၢဝ်ႇသေ တွပ်ႇလၢတ်ႈတီႈၽူႈပၼ်ႁႅင်း ၽူႈသိုဝ်ႇၶၢဝ်ႇ ၵဵဝ်ႇလူၺ်ႈ လွင်ႈႁၢင်ႈႁႅၼ်း၊ လွင်ႈမုင်ႈမွင်းလႄႈ ဢိၵ်ႇထႅင်ႈလၢႆလွင်ႈ။
ၵျေႃႉသျူႊဝႃႊ ဝၼ်ႊ လၢတ်ႈဝႃႈ – ‘‘ယွၼ်ႉ တေလႆႈၶႅင်ႇတူၺ်ႇမူၺ်းၸွမ်း ၽူႈၵတ်ႉၶႅၼ်ႇ ၾၢႆႇတွႆႇမူၺ်းၵေႃႉၼိုင်ႈလႄႈ လီဢဝ်ၵုင်ႇမုၼ်လႄႈ ၼပ်ႉယမ်တေႉတေႉ။ ၵူၺ်းၵႃႈ ၼႂ်းပၢင်ၶႅင်ႇတွႆႇမူၺ်းၼႆႉ တေဢၢၼ်းထုပ်ႉႁႂ်ႈပေႉသေ ဢဝ်သၢႆႁတ်ႉ ၶျႅၼ်ႊပီႊယႅၼ်ႊမၼ်း’’ ဝႃႈၼႆ။
ပၼ်ႊတူဝ်ႊၵျႃႊၵေႃႈ လၢတ်ႈဝႃႈ – ‘‘ ဝၼ်ႊ ၼႆႉ ပဵၼ်ၼေႃႇတႅၼ်းၶိူဝ်းၾၢႆႇတွႆႇမူၺ်းၵတ်ႉၶႅၼ်ႇသုတ်းၵေႃႉၼိုင်ႈ။ တႃႇပၢင်ထုပ်ႉတွႆႇမူၺ်းၼႆႉ လႆႈႁၢင်ႈႁႅၼ်းဝႆႉ လီလီယူႇ။ လိူဝ်ၼၼ်ႉ ဝၼ်ႊ ၼႆႉ ပဵၼ်ၵူၼ်းၼုမ်ႇ လႅတ်းသႅဝ်း ႁႅင်းတဵမ်ထူၼ်ႈ။ ၵူၺ်းၵႃႈ ၼႂ်းပၢင် Octagon (ပၢင်ထုပ်ႉတွႆႇမူၺ်း) ၼႆႉ တူဝ်ၶႃႈ ယၢမ်ႈမီးတူဝ်ထူပ်းမႃး ၼမ်ယဝ်ႉၼင်ႇၵဝ်ႇ။ ဝၼ်ႊ ၼႆႉ ပဵၼ်ၽူႈၶႅင်ႇ ဢၼ်ၶႃႈဝႆႉၼၵ်း ၼပ်ႉယမ်ၵေႃႉၼိုင်ႈ’’ – ဝႃႈၼႆ။
ပၢင်ၶႅင်ႇတွႆႇမူၺ်းၼႆႉ တေၸတ်းႁဵတ်း တီႈ T.Mobile Arena ဝဵင်းလူင် Las Vegas မိူင်းဢမေႊရိၵၼ်ႊ။ ၸွမ်းၼင်ႇၶၢဝ်းယၢမ်း မိူင်းတႆး မိူင်းႁူမ်ႈတုမ်မၢၼ်ႈ မိူင်းထႆးၸိူဝ်းၼႆႉတႄႉ တေပဵၼ် ဝၼ်းတီႈ 7 လိူၼ်တီႊသႅမ်ႊပိူဝ်ႊ ဝၼ်းဢႃးတိတ်ႉ ၵၢင်ၼႂ်။
မိူဝ်ႈပူၼ်ႉမႃး ဝၼ်းတီႈ 29 လိူၼ်ၵျုၼ်ႊ တီႈပၢင်ၶႅင်ႇတွႆႇမူၺ်း UFC 317 ၼၼ်ႉ ၵျေႃႉသျူႊဝႃႊ ဝၼ်ႊ လႆႈထုပ်ႉၶႅင်ႇၵၼ်တင်း Brandon Royval ၽူႈတွႆႇမူၺ်း ၾလၢႆႊဝိတ်ႊ ၸၼ်ႉၼိုင်ႈ ၵူၼ်းမိူင်းဢမေႊရိၵၼ်ႊသေ ဢွင်ႇပေႉမႃး။ ယွၼ်ႉၼၼ် လႆႈသုၼ်ႇၶဝ်ႈ ပၢင်ၶႅင်ႇတွႆႇမူၺ်းၸွမ်း ၽူႈတွႆႇမူၺ်း ဢၼ်လႆႈဝႆႉ သၢႆႁတ်ႉ ၶျႅၼ်ႊပီႊယႅၼ်ႊ။
ၵျေႃႉသျူႊဝႃႊ ဝၼ်ႊ ၼႆႉ တိုၵ်ႉမီးဢႃယု 24 ပီ သေ ပဵၼ်ၸၢဝ်းၶိူဝ်းၶျၢင်း ၵိူတ်ႇတီႈမိူင်းၶျၢင်း။ တီႈ UFC ၼႆႉ မၼ်းၸၢႆး လႆႈၶဝ်ႈပၢင်ၶႅင်ႇတွႆႇမူၺ်း 9 ပၢင်သေ ပေႉ 8 ပၢင် သုမ်း 1 ပၢင်။
Alexandre ၼႆႉသမ်ႉ မီးဢႃယု 35 ပီ ပဵၼ်ၵူၼ်းမိူင်း ပရႃႊသီး။ တီႈ UFC ၼႆႉ မၼ်းၸၢႆး ယၢမ်ႈၶဝ်ႈပၢင်ၶႅင်ႇတွႆႇမူၺ်း 17 ပၢင်ယဝ်ႉသေ ပေႉ 14 ပၢင် သုမ်း 3 ပၢင်၊ ပဵၼ်ၽူႈတွႆႇမူၺ်း ၸိုဝ်ႈလိုဝ်းလင်ၵေႃႉၼိုင်ႈ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ