ဝၼ်းတီႈ 7/11/2025 ဝၼ်းသုၵ်းယၢမ်းၵၢင်ၶမ်ႈ 7 မူင်းပၢႆ ၽူႈတွႆႇမူၺ်းၼၢင်းယိင်း ၸၢဝ်းၵယၢၼ်း(ယၢင်းလႅင်) ပရေႃႊၼီႊၵႃႊ လႄႈ ၽူႈတွႆႇမူၺ်းၼၢင်းယိင်း ၸၢဝ်းၶႄႇ Li Min Grui တေထုပ်ႉၶႅင်ႇၵၼ် ဝႃႈၼႆ။

ၽူႈတွႆႇမူၺ်းသွင်ၵေႃႉၼႆႉ တေထုပ်ႉၶႅင်ႇၵၼ် တီႈႁူင်းလဵၼ်ႈႁႅင်း လုမ်ႊပၼီႊ (Lumpini) ဝဵင်းလူင်ၵုင်းထဵပ်ႈ မိူင်းထႆး၊ တေပဵၼ်ၼႂ်း ၶပ်ႉမၢႆပၢင် ONE Friday Fights 132 ။

တီႈပၢင်ၼၼ်ႉ ၽူႈတွႆႇမူၺ်းၵူၼ်းမိူင်းမၢၼ်ႈ ၵူၼ်းၸၢႆး တၢၼ်ႉသိၼ်ႇ၊ ၸူဝ်းၼွင်ႇဢူး ၸိူဝ်းၼႆႉၵေႃႈ တေလႆႈထုပ်ႉၶႅင်ႇၵၼ်။

ၽူႈတွႆႇမူၺ်းၼၢင်းယိင်း ၸၢဝ်းၵယၢၼ်း ပရေႃႊၼီႊၵႃႊ ၼႆႉ ဝၼ်းတီႈ 28 လိူၼ်ၵျႅၼ်ႊၼိဝ်ႊရီႊ ႁူဝ်ပီ 2025ၼႆႉ လူင်းလၢႆးမိုဝ်းၵၼ်ဝႆႉတင်းၶွမ်ႊပၼီႊ ONE ၶၢဝ်းတၢင်း 2 ပီ ။ ၼႂ်းၶၢဝ်းတၢင်း 2 ပီၼႆႉ မၼ်းၼၢင်း တေလႆႈထုပ်ႉၶႅင်ႇတွႆႇမူၺ်း 8 ပၢင်။

ပၢင်ၶႅင်ႇတွႆႇမူၺ်း ၵမ်းႁႅၵ်ႈၼၼ်ႉ မၼ်းၼၢင်း လႆႈထုပ်ႉၶႅင်ႇၵၼ်တင်း ၵူၼ်းမိူင်း ၶျီႊလီႊ မိူဝ်ႈၵၢင်လိူၼ် ၾႅပ်ႉပိဝ်ႊရီႊ (February)၊ မိူဝ်ႈၼၼ်ႉ မၼ်းၼၢင်း သုမ်းၵၢၼ်ႉၵႂႃႇ။ မိူဝ်ႈပၢင် ဢၼ်လႆႈထုပ်ႉၶႅင်ႇၵၼ်တင်း ၵူၼ်းထႆး ၼႂ်းလိူၼ်မေႊပူၼ်ႉမႃးၼႆႉတႄႉ မၼ်းၼၢင်း ဢွင်ႇပေႉဝႆႉ။

ၵဵဝ်ႇၵပ်းပၢင် ဢၼ်တေၶႅင်ႇတွႆႇမူၺ်း မိူဝ်ႈၼႆႉၵၢင်ၶမ်ႈၼႆႉသေ ပရေႃႊၼီႊၵႃႊ တႅမ်ႈတၢင်ႇဝႆႉတီႈသိုဝ်ႇတူင်ႇဝူင်းသုၼ်ႇတူဝ်မၼ်းဝႃႈ တူဝ်ႈတၼ်းယဝ်ႉ “Ready” ဝႃႈၼႆ။