ပၢင်ၶႅင်ႇတွႆႇမူၺ်း ၸိုဝ်ႈလိုဝ်းလင် One Championship ၼႆႉ ၸတ်းႁဵတ်းၵႂႃႇ ၼႂ်းဝၼ်းတီႈ 4/10/2025 ယၢမ်းၵၢင်ၼႂ် တီႈဝဵင်းလူင်ၵုင်းထဵပ်ႈ မိူင်းထႆး၊ ၽူႈတွႆႇမူၺ်း ၸၢဝ်းၶၢင် ဢွင်ႇလႃႉ ဢႅၼ်ႊသင်ႊ Aung La Nsang လႄႈ Zebaztian Kadestam ၵူၼ်းမိူင်း သုၺ်ႊတိၼ်ႊ လႆႈၶႅင်ႇတွႆႇမူၺ်းၵၼ်။ ၽွင်းပၢင်ၶႅင်ႇတွႆႇမူၺ်းႁွပ်ႈသွင်ၼၼ်ႉ ဢွင်ႇလႃႉဢႅၼ်ႊသင်ႊ ထုပ်ႉပေႉ ၶႃႊၻႅတ်ႊသတႅမ်ႊ ဝႃႈၼႆ။

ၵွၼ်ႇပႆႇထိုင် ပၢင်ၶႅင်ႇတွႆႇမူၺ်းၼႆႉ ဢွင်ႇလႃႉ လၢတ်ႈဝႆႉဝႃႈ – ပၢင်ၶႅင်ႇတွႆႇမူၺ်းၵမ်းၼႆႉ တေပဵၼ်ပၢင်လိုၼ်းသုတ်းယဝ်ႉ၊ တေၵိုတ်းလိုဝ်ႈၵၢၼ်ၶႅင်ႇတွႆႇမူၺ်းယဝ်ႉ – ဝႃႈၼႆ။

ယွၼ်ႉၼၼ်ႉ ဝၢႆးပၢင်ၶႅင်ႇတွႆႇမူၺ်းသုတ်းယဝ်ႉ မၼ်းၸၢႆးတူင်ႉတၵ်ႉသူင်ႇသင်ႇ ၽူႈပၼ်ႁႅင်းမၼ်းၸၢႆး ၵူႈၵေႃႉ ၵူႈတီႈ ၼႂ်းမိူင်းႁူမ်ႈတုမ်မၢၼ်ႈ ဢိၵ်ႇပႃး ၼွၵ်ႈမိူင်း။ လိူဝ်ၼၼ်ႉ ၽူႈႁွင်ႉၵႂၢမ်းၸိုဝ်ႈလိုဝ်းလင် လေးၽိဝ်ႇ ၵေႃႈ ၶဝ်ႈပႃးမူၼ်ႈၸႂ်ပၼ်တင်းၽဵင်းၵႂၢမ်း- လႆႈႁူႉၼင်ႇၼႆ။

ယူႇတီႈ One Championship ၵေႃႈ ယုၵ်ႉယွင်ႈတွၼ်ႈသူးပၼ် ဢွင်ႇလႃႉ ဢႅၼ်ႊသင်ႊ – ငိုၼ်းတေႃႇလႃႇ 5 မိုၼ်ႇ။

ဢွင်ႇလႃႉ ဢႅၼ်ႊသင်ႊ ၼႆႉ မီးဢႃယု 40 ပီ ပဵၼ်ၵူၼ်းၸၢဝ်းၶၢင်၊ ယူႇတီႈၼႂ်းၸုမ်း MMA သေ မၼ်းၸၢႆးလႆႈၶႅင်ႇတွႆႇမူၺ်း 45 ပၢင်၊ ၼႂ်းၼၼ်ႉ ပေႉ 31 ပၢင်လႄႈ သုမ်း 14 ပၢင် ။