ပေႃးထိုင်မႃး ဝၼ်းတီႈ 28 ႁၢင်လိူၼ်တီႊသႅမ်ႊပိူဝ်ႊၼႆႉ သိုၵ်းမၢၼ်ႈယိုတ်းမိူင်း တေၸတ်းႁဵတ်းပၢင်လိူၵ်ႈတင်ႈ တွၼ်ႈ 1 ၼႂ်းမိူင်းႁူမ်ႈတုမ်ၼႆလႄႈ ၸုမ်းၵူၼ်းၼုမ်ႇ၊ ၸုမ်းတူင်ႇဝူင်း ၵူၼ်းတႆး လၢႆလၢႆၸုမ်း ႁူမ်ႈၵၼ်ဢွၵ်ႇ လိၵ်ႈပိုၼ်ၽၢဝ်ႇ သၢၼ်ၶတ်းၼိူဝ်ပၢင်လိူၵ်ႈတင်ႈ 2025 ၼႆႉ။
မိူဝ်ႈဝၼ်းတီႈ 3 လိူၼ်တီႊသႅမ်ႊပိူဝ်ႊ ၸုမ်းၵူၼ်းၼုမ်ႇ လႄႈ ၸုမ်းတူင်ႇဝူင်းၵူၼ်း ၼႂ်းမိူင်းတႆး 5 ၸုမ်း ႁူမ်ႈၵၼ်ဢွၵ်ႇလိၵ်ႈပိုၼ်ၽၢဝ်ႇတိုၵ်းသူၼ်းယႃႇႁႂ်ႈၵူၼ်းမိူင်းတႆး ၶဝ်ႈႁူမ်ႈတူင်ႉ ၼိုင်ပႃးၸွမ်း ၼႂ်းၶၵ်ႉၵၢၼ် ပၢင်လိူၵ်ႈတင်ႈ ဢၼ်သိုၵ်းမၢၼ်ႈယိုတ်းမိူင်းတေၸတ်းႁဵတ်း ၼႆယဝ်ႉ။
ၼႂ်းလိၵ်ႈပိုၼ်ၽၢဝ်ႇၼၼ်ႉ ပိူင်းၸႅင်ႈၼႄဝႆႉဝႃႈ “သင်ၵႂႃႇတူင်ႉၼိုင် ၶဝ်ႈႁူမ်ႈႁဵတ်းသၢင်ႈၸွမ်း ၼႂ်းၶၵ်ႉၵၢၼ်ပၢင်လိူၵ်ႈတင်ႈပွမ် ဢၼ်သိုၵ်းမၢၼ်ႈယိုတ်းမိူင်းတေၸတ်းႁဵတ်းၼၼ်ႉ ၸိုင် တေၸၢင်ႈႁဵတ်းႁႂ်ႈ လၵ်းမိူင်း (ပိူင်ငဝ်ႈပိုင်ႈမိူင်း) 2008 ဢၼ်ၵူႈၵေႃႉဢမ်ႇလႆႈၸႂ် ဢမ်ႇႁၼ်လီၸွမ်းၼၼ်ႉ ပဵၼ်တူဝ်ပဵၼ်တိၼ်ႇမႃးၶိုၼ်းသေ တႃႇတေယၢင်ႈပႆၵႂႃႇၸွမ်းလႆႈသဵၼ်ႈတၢင်း ၾႅတ်ႇတရႄႇတီႇမူဝ်ႊၶရေႇၸီႇၼၼ်ႉၵေႃႈ တေယၢပ်ႇၵိၼ်း ႁၢင်ႇၵႆၵႂႃႇတိၵ်းတိၵ်း” ၼႆယဝ်ႉ။
လိူဝ်ၼၼ်ႉ ယင်းပိုၼ်ၽၢဝ်ႇၵႂႃႇထႅင်ႈဝႃႈ – ၼင်ႇႁိုဝ် ၵူၼ်းမိူင်းတႆး တေမီးသုၼ်ႇႁဵတ်းသၢင်ႈႁၢင်ႈပွင်လႆႈႁင်း ၶေႃၼၼ်ႉ ၸုမ်းၵူၼ်းၼုမ်ႇ လႄႈ တူင်ႇဝူင်းၵူၼ်းတႆး မီးယိူင်းမၢႆ ၶတ်း ၸႂ်တေၸႂ်ႉတိုဝ်းလၢႆးတၢင်းၾႅတ်ႇတ ရႄႇတီႇမူဝ်ႇၶရေႇၸီႇၵူၺ်း။ ယွၼ်ႉၼၼ် ၼင်ႇႁိုဝ် သိုၵ်းမၢၼ်ႈတေဢမ်ႇၸၢင်ႈၸတ်းႁဵတ်းပၢင်လိူၵ်ႈတင်ႈပွမ် ၼၼ်ႉၵေႃႈ တေႁႃလၢႆးတၢင်းသေယႃႉၵဝ်းႁႂ်ႈပေႃးလူႉၵွႆၵႂႃႇ ၸွမ်းၼင်ႇပွင်ပဵၼ်လႆႈ ၼႆယဝ်ႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ