ဝၢႆးလင် တပ်ႉသိုၵ်းမၢၼ်ႈ ၶဝ်ႈၵုမ်းၶိုၼ်းဝဵင်းၵျွၵ်ႉမႄးၼႆႉ ၵူတ်ႇထတ်းတီႉၺွပ်းၵူၼ်းမိူင်းလၢႆလၢႆၵေႃႉ၊ ယိုတ်းသိမ်းဢဝ်ပႃး ၶူဝ်းၶွင်ႁိူၼ်းယေးထႅင်ႈ။
ၼႂ်းႁၢင်လိူၼ်ၼူဝ်ႊဝႅမ်ႊပိူဝ်ႊပူၼ်ႉမႃးၼႆႉ ပလိၵ်ႈသိုၵ်းမၢၼ်ႈ ၶဝ်ႈတီႉၺွပ်းၵူၼ်းမိူင်း ၸိုဝ်ႈ ၵူဝ်ႇဢေးမွင်ႇ ယူႇၼႂ်းပွၵ်ႉ 9 လႄႈ ၵူဝ်ႇလႃႉၵျေႃႇ ယူႇႁိမ်းၵျွင်း သီႇႁူဝ်ႇ ၼႂ်းဝဵင်းၵျွၵ်ႉမႄး။
သိုၵ်းမၢၼ်ႈလၢတ်ႈဝႃႈ ၵဵဝ်ႇၵွင်ႉတင်းၸုမ်းလုၵ်ႉၽိုၼ်ႉ PDF ၼႆသေ တီႉၺွပ်းၵႂႃႇ၊ ႁိူၼ်းယေးၶူဝ်းၶွင်ၵေႃႈ ယိုတ်းဢဝ်ပႃး၊ တႅမ်ႈလိၵ်ႈသႂ်ႇပၢႆႉသီလႅင် မႃးတိတ်းပႃႉဝႆႉၼႃႈၽၵ်းတူ ဢမ်ႇပၼ်ၽႂ်ၶဝ်ႈ၊ ဢမ်ႇပၼ်ၽႂ်ၵႃႉၶၢႆတေႃႇၵၼ် ဝႃႈၼႆ။
မိူဝ်ႈႁၢင်လိူၼ်ဢွၵ်ႉထူဝ်ႊပိူဝ်ႊၼႆႉ သိုၵ်းတဢၢင်း လႆႈထွႆဢွၵ်ႇဝဵင်းၵျွၵ်ႉမႄးသေ တပ်ႉသိုၵ်းမၢၼ်ႈၶဝ်ႈၵုမ်းၶိုၼ်း။ ဝၢႆးၼၼ်ႉ ပလိၵ်ႈသိုၵ်းမၢၼ်ႈ ၵႆႉၵူတ်ႇထတ်းၵူၼ်းမိူင်း ၸိူဝ်းထၢင်ႇထိူမ်ဝႃႈၵဵဝ်ႇၵွင်ႉတင်း သိုၵ်းမၢၼ်ႈ။ ၶၢဝ်းတၢင်း လိူၼ်ပၢႆမႃးၼႆႉ ၵူၼ်းမိူင်းဝဵင်းၵျွၵ်ႉမႄး ၺႃးသိုၵ်းမၢၼ်ႈတီႉၺွပ်း ဢမ်ႇယွမ်း 10 ၵေႃႉ၊ ႁိူၼ်းယေးတီႈယူႇၵေႃႈ သိုၵ်းမၢၼ်ႈယိုတ်းၵႂႃႇဢမ်ႇယွမ်း 10 လင်ယဝ်ႉဝႃႈၼႆ။
ၼွၵ်ႈလိူဝ်ဝဵင်းၵျွၵ်ႉမႄးယဝ်ႉ မိူၼ်ၼင်ႇ တီႈဝဵင်း ၼွင်ၶဵဝ်တင်း ဝဵင်းသီႇပေႃႉၵေႃႈ ပလိၵ်ႈသိုၵ်းမၢၼ်ႈ ၵႆႉၵူတ်ႇထတ်းၵူၼ်းၼုမ်ႇၵူၼ်းမိူင်း ၸိူဝ်းထၢင်ႇထိူမ်ဝႃႈ ၵဵဝ်ႇၵွင်ႉၸုမ်းလုၵ်ႉၽိုၼ်ႉ။
လိူဝ်ၼၼ်ႉ ၶူဝ်လူင်သီႇပေႃႉ တၢင်းဢွၵ်ႇၵႂႃႇဝဵင်းလႃႈသဵဝ်ႈၼၼ်ႉ သိုၵ်းမၢၼ်ႈ တင်း သိုၵ်းၵဝ်ႈၵၢင်ႉ ႁႄႉႁၢမ်ႈပိၵ်ႉဢိုတ်း ဢမ်ႇပၼ်ရူတ်ႉၵႃးၵႂႃႇမႃးလႄႈ ႁဵတ်းႁႂ်ႈၵူၼ်းမိူင်း ယၢပ်ႇၽိုတ်ႇ တႃႇႁႃၵိၼ်လဵင်ႉတွင်ႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ