ယၢမ်းၽွင်း မိူင်းၵုတ်ႈ၊ မိူင်းမိတ်ႈ ယုင်ႈယၢင်ႈယၢပ်ႇယၢၵ်ႈၸွမ်း TNLA လႄႈ ၸုမ်းၸိူဝ်းယၢမ်ႈၸွႆႈထႅမ်မၼ်းမႃး ထဵင်ၵၼ်ထိမ်ႇၵၼ်ယူႇၼႆႉ တီႈတၢင်းမိူင်းယၢင်းၵေႃႈ ယုင်ႈယၢင်ႈဢူၼ်ဢၢၼ်ၸွမ်း ၼႂ်းၵႄႈၸုမ်းသိုၵ်းယၢင်းၼင်ႇၵၼ်လႂ် လႄႈ ပေႃႉယွၼ်ႈပႃးလၢႆလၢႆမိူင်းလႂ်ယူႇ။

 ပိူင်ပဵၼ်တင်းသွင်ယၢင်ႇၼႆႉ လႆႈယုင်ႈယွၼ်ႉလိူင်ႈၵျႃႊၽျႅၼ်ႉ (ၵျႃႇၽျႅၼ်ႉ) ၵွႆးပေႃးဝႃႈၼႆ တေမႅၼ်ႈယူႇၶိုင်ႈၼိုင်ႈ၊ ၵိုတ်းထႅင်ႈၶိုင်ႈ ႞တႄႉ ယုင်ႈၵွပ်ႈၸဝ်ႈဢႃႇၼႃႇၸုမ်းသိုၵ်းမၢၼ်ႈ တႄႇသုမ်ၾႆးႁုမ်းသႂ်ႇယဝ်ႉၼႆ ဢမ်ႇတၢပ်ႈလၢတ်ႈ ၵေႃႈ ႁူႉထိုင်ၵၼ်ၸႅင်ႈလႅင်းယူႇ။

မိူဝ်ႈလဵဝ် မုၵ်ႉၾႆးဢၼ်မၼ်းတႄႇသုမ်မႃးၼၼ်ႉ တေလၢမ်းႁုပ်ႇမႆႈၶႅမ်ႈပႃး ဢႃႇၼႃႇၸၢၵ်ႈၶဝ်ၼေႇပျီႇတေႃႇယဝ်ႉလႄႈ ၼႅတ်ႈႁႃၶႄတူဝ်ဝႄႈႁူဝ်ယူႇ ၵလီးၵထီး၊ တေဝႆႉပဵၼ်ပုၼ်ႈၽွၼ်းၸိူဝ်ႉၸၢတ်ႈသေ တိုၵ်းယႃႉၽဵဝ်ႈမူၺ်ႉၵႂႃႇ ဝႃႈၼႆဢွၵ်ႇမႃးယဝ်ႉ။

ႁဝ်းႁႃး တေၸၢင်ႈၾၢင်ႉမႅၼ်ႈၵၼ်ယူႇ၊ ၸဵမ်မိူဝ်ႈငိၼ်းဝႃႈ ၸွမ်ၸိုင်ႈထရၢမ်ႉ တေမႃးၶဝ်ႈႁူမ်ႈၸွမ်းပၢင်ၵုမ်လူင် ASEAN တီႈမိူင်းမလေးသျႃးယဝ်ႉၼႆၵေႃႈ ႁူင်းၵၢၼ်ၵျႃႇၽျႅၼ်ႉဢၼ်တင်ႈၸွမ်း လႅၼ်လိၼ်ထႆး လႄႈ ယၢင်းၸိူဝ်းၼၼ်ႉ ပေႃးတိုၼ်ႇၵၼ်သၢၼ်ႈၵၼ်ယူႇယဝ်ႉ။

 ဢွၵ်ႊထူဝ်ႊပိူဝ်ႊ 25 ဝၼ်းတႄႇပၢင်ၵုမ်ၼၼ်ႉၵမ်းလဵဝ် KNU ဢွၵ်ႇလိၵ်ႈပိုၼ်ၽၢဝ်ႇဝႃႈ ၸုမ်းၶဝ်တိုၼ်းဢမ်ႇၵဵဝ်ႇၶွင်ႈၸွမ်း ၵျႃႇၽျႅၼ်ႉ ၵၢၼ်လႅၼ်ၵိၼ်ငိုၼ်းၼိူဝ်ဢွၼ်ႊလၢႆႊၼၼ်ႉလႃးလႃးၼႆသေ ယၼ်တူဝ်ပဵင်းဝႆႉယဝ်ႉ။

ၸုမ်းပလိၵ်ႈထႆးၵေႃႈ တူင်ႉတူင်ႉသၢၼ်ႈသၢၼ်ႈသေ ပၼ်ႁႅင်းဢီးႁိပ်ႇႁွမ်ႈ၊ ၾၢႆႇသိုၵ်းမၢၼ်ႈၵေႃႈ လႅပ်ႈတေၼေသၼ်ယႃးၸီႉသင်ႇႁၢဝ်ႈႁႅင်းလႄႈ ၼႂ်းၼႃႈတီႈၵျႃႇၽျႅၼ်ႉ ၸွမ်းလႅၼ်လိၼ်ထႆး-မၢၼ်ႈၼႆႉ ဢူၼ်ဢုင်းလူင်ယူႇ မိူၼ်ၼင်ႇၽိုင်ႈသၢၼ်ႈယဝ်ႉ။

 ၼူဝ်ႊဝိမ်ႊပိူဝ်ႊ 12 ဝၼ်း –  ပေႃးဝႃႈ ဢမႄႊရိၵၼ်ႊ ပိုၼ်ၽၢဝ်ႇဝႃႈ ၶဝ်ၶွတ်ႇၽွတ်ႈၸုမ်း Scam Center Strike Force ႁႂ်ႈလႆႈတိုၵ်းယႃႉၵၢၼ်ၵျႃႇၽျႅၼ်ႉ ဢၼ်ႁဵတ်းႁႂ်ႈၵူၼ်းမိူင်းၶဝ် လႆႈလူႉသုမ်းၸွမ်းငိုၼ်းတေႃႇလႃႇ ဢၢၼ်ႁူဝ်ႁဵင်လၢၼ်ႉၼၼ်ႉၼႆၵေႃႈ လူၵ်ႈလုမ်ႈၾႃႉၵျႃႇၽျႅၼ်ႉ ဢၼ်BGF လႄႈ DKBA ၵုမ်းၵမ်ၸိူဝ်းၼၼ်ႉ ယွၼ်ႈသၼ်ႇၶွၼ်းဝႆၽူင်ႉ   ၽၢၼ်ႈမိူၼ်ၽုင်မႅင်းမူၼ်းယဝ်ႉ။

ၼႂ်းဝၼ်းၼၼ်ႉလီလီ ၶုၼ်ႁေႃၶမ်းမိူင်းထႆးၵေႃႈ ယေႃးတူဝ်ႁွတ်ႈမိူဝ်းဢႅဝ်ႇလေႇထိုင် မိူင်းၶႄႇ၊ ၼႃႈၼၼ်ႉဝၼ်းၼိုင်ႈ လူင်ပွင်ၸိုင်ႈထႆး သမ်ႉဢဝ် သိုဝ်ၸိုၼ်ႉၸၢင်း ၸဝ်ႈၶွင် KK Park မွပ်ႈပၼ် မိူင်းၶႄႇ။

ၶႅၼ်ႈႁေဝူင်ႈၼိုင်ႈၵွႆး တႄႇဝၼ်းတီႈ 18 ၸုမ်းသိုၵ်းမၢၼ်ႈ ၶဝ်ႈယႃႉႁူင်းၵေႃႇၵၢႆႇၵၢၼ်ၵျႃႇၽျႅၼ်ႉ ၼႂ်းသျူၺ်ႇၵူၵ်ႉၵူဝ်ႇ၊ တေႃႇထိုင်  ဝၼ်းတီႈ 21 ၺွပ်းလႆႈ ၵူၼ်းမိူင်းၼွၵ်ႈတီႈၼႂ်းၼၼ်ႉ 1300 ၵေႃႉလိူဝ်၊ ၾူၼ်းမိုဝ်းထိုဝ် 20,000 လုၵ်ႈလိူဝ်၊ ၶွမ်း 3,000 လုၵ်ႈလိူဝ်သေ ႁူင်းၵေႃႇၵၢႆႇ 182 လင်ၼႆႉ ၵူၼ်ႇပႅတ်ႈယဝ်ႉတူဝ်ႈလီငၢမ်း၊ တႃႇ 453 လင် ၼႆႉတိုၵ်ႉသိုပ်ႇၵူၼ်ႇယႃႉယူႇတိၵ်းတိၵ်း ဝႃႈၼႆ။

ၵူၺ်းၵႃႈ ၵွပ်ႈသင်ဢမ်ႇလၢတ်ႈပႃး၊ ၵွပ်ႈသင်ဢမ်ႇယႃႉပႃး KK Park ၼႆ ပဵၼ်ၶေႃႈထၢမ်ဝႆႉယူႇ။

ၸွမ်ႁၢၼ်ၸေႃႇမိၼ်းထုၼ်း ၵေႃႉၶၢၼ်ပၢၵ်ႇတၢင် ၸုမ်းသိုၵ်းမၢၼ်ႈ လၢတ်ႈယဝ်ႉလၢတ်ႈထႅင်ႈယူႇ ၼႂ်းသွင်သၢမ်ဝၼ်းၼႆႈ တေငိၼ်းၵၼ်ယူႇ၊ ႁူင်းၵၢၼ်ၵျႃႇၽျႅၼ်ႉၼႆႉ ပၢင်သဝ်းယႂ်ႇလူင်သုတ်း မီးယူႇသၢမ်တီႈ။

သျူၺ်ႇၵူၵ်ႉၵူဝ်ႇ ဢၼ်မီးၾၢႆႇႁွင်ႇဝဵင်းမျႃႉဝတီႇ၊ KK Park ဢၼ်မီးယူႇၽၢႆႇၸၢၼ်း ဝဵင်းမျႃႉဝတီႇ၊ သွင်ဢၼ်ၼႆႉ BGF ၵုမ်းၵမ်။

 ထႅင်ႈတီႈၼိုင်ႈသမ်ႉ ၵျွၵ်ႉၶၢတ်ႉ ဢၼ်မီးၾၢႆႇၸၢၼ်းသုတ်းသုတ်းဝဵင်းမျႃႉဝတီႇ၊ ဢၼ်ၼႆႉသမ်ႉ DKBA ၵုမ်းၵမ် ဝႃႈၼႆယဝ်ႉ။

တၢမ်ၼင်ႇမၼ်းဝႃႈတႄႉ ၼႂ်းလိူင်ႈလႅၼ်ၵိၼ်ငိုၼ်း Scam Center ၼႆႉ ၸုမ်းၸၢဝ်းၶိူဝ်းမႅၵ်ႇၵွင်ႈ ဢၼ်လူင်းလၢႆးမိုဝ်းၸွမ်း NCA ၵေႃႈ ၶဝ်ႈပႃးၽွင်ႈၼႆလႄႈ ၶႂ်ႈမၢႆထိုင်ဝႃႈ KNLA ဢၼ်ပဵၼ်တပ်ႉတႂ်ႈမိုဝ်း KNU ၵေႃႈၵဵဝ်ႇၵွင်ႉပႃးဝႆႉလူဝ်လူဝ်။

 လွင်ႈၼႆႉ သိုဝ်ႇၶၢဝ်ႇၵမ်ႈၽွင်ႈၵေႃႈ ႁၼ်ထိုင်ဝႃႈ ဢေႇသုတ်းမိူဝ်ႈလူင်းလၢႆးမိုဝ်း ယိမ်ပၼ်တီႈလိၼ် တႃႇၵေႃႇသၢင်ႈႁူင်းၵၢၼ်ၵျႃႇၽျႅၼ်ႉၼၼ်ႉ ၶဝ်ႈပႃးၵူၼ်းလူင် ၼႂ်း KNU တေႉယူႇ ဝႃႈၼႆ။

 ၵွင်ယုၵ်းယၢၵ်းလူင်လိူင်ႈၵျႃႇၽျႅၼ်ႉၼႆႉ ၽိူဝ်ႇဝႃႈ ဢမႄႊရိၵၼ်ႊ တူၵ်ႇတၵ်ႉဝႃႈတေဢဝ်လိူင်ႈၸင်ႇ မိူင်းၶႄႇၵေႃႈ ၼဵတ်းသၢၼ်ႈလူင်မႃး။ ထိုင်တီႈ ပေႃးလႆႈ မွၵ်ႇႁွင်ႉ ၶမ်ႊပူဝ်ႊတီႊယႃႊ၊ ထႆး၊ မၢၼ်ႈ ဢွၵ်ႇၶေႃႈပိုၼ်ၽၢဝ်ႇဝႃႈ တေႁူမ်ႈမိုဝ်းၽဵဝ်ႈမူၺ်ႉ ၼၼ်ႉယိုင်။

 ဢမႄႊရိၵၼ်ႊ တေလူင်းတိုၵ်းယႃႉၽဵဝ်ႈမူၺ်ႉၵမ်းလဵဝ်ႁႃႉ ၼႆတႄႉ ဢမ်ႇဝႃႈလႆႈ၊ တေလႆႈပႂ်ႉ ၶေႃႈတႅပ်းတတ်း ၼႂ်းလုမ်းတႅၼ်းၽွင်းၶဝ်ထႅင်ႈ လၢႆၶၵ်ႉယူႇသေတႃႉ ပိူဝ်ႈပဵၼ်ၸိုင်ႈမိူင်း Super Power ဢၼ်ပႂ်ႉၶႅင်ႇၵၼ်တင်း မိူင်းၶႄႇလူင်လႄႈ ဢမ်ႇဝႃႈမိူဝ်ႈလႂ် တေၸႂ်ႉလၢႆးဢွမ်ႈလၢႆးၽၢတ်ႈသေၶႃၽီၼႆ လႆႈလွမ်ယိၼ်းၵူဝ်လၢမ်းၽၢၼ်ႈယူႇ ပႃးၸဵမ်မိူင်းၶႄႇယဝ်ႉ။

မိူင်းၶႄႇၼႆႉ တိူၵ်ႈတီႈမၼ်းဢမ်ႇၸႂ်ႈၵေႃႉၵိူတ်ႇပဵၼ်လိူင်ႈၵၢၼ် ၵျႃႇၽျႅၼ်ႉၵမ်းသိုဝ်ႈၵေႃႈယႃႇ သိုဝ်ၸိုၼ်ႉၸၢင်းၼႆႉ ယၢမ်ႈပဵၼ်ၽူႈၸွပ်ႇၼႂ်းၶဝ်မႃးၼႆၵေႃႈ ၶၢဝ်ႇလိုဝ်းလူင်ဝႆႉ၊ ယဝ်ႉၵေႃႈ ဢၢင်ႈၸိုဝ်ႈဝႃႈ တႃႇၵႂၢတ်ႇလၢင်ႉလိူင်ႈၵျႃႇၽျႅၼ်ႉၼႆယဝ်ႉ မၼ်းယၢမ်ႈလပ်းတႃပၼ် ၽႅၼ်ယၼ်ႇသိုၵ်း1027 မိူင်းတႆးပွတ်းႁွင်ႇမႃးသေ ၵေႈလိတ်ႈၸွမ်းပႆႇၸၢင်ႈယဝ်ႉၸၢင်ႈတူဝ်ႈၼၼ်ႉလႂ်၊ ဢဝ်ၸဵမ်ၵၢၼ်ၵိုတ်းတိုၵ်း ၵၢၼ်ယူႇလင်ၵမ်ႉၸွႆႈပၼ် ၸုမ်းသိုၵ်းမၢၼ်ႈလႂ်ၸိူဝ်းၼႆႉ ၵူႈမိူင်းၵူႈၾၢႆႇႁူႉထိုင်ၸွမ်းယူႇသၵ်းသၵ်း။

 ၵမ်းၼႆႉ ပေႃးတူၺ်း ၸုမ်းသိုၵ်းမၢၼ်ႈၵေႃႈ ပႅၵ်ႉသမ်ႉဝႃႈ မိူဝ်ႈလဵဝ်ၸင်ႇမၼ်းဢၢင်ႈဢဝ်ယူးပၢၵ်ႈၵျႃႇၽျႅၼ်ႉလူင် ၵႂႃႇၵွင်သႂ်ႇၵွၵ်းႁူဝ် ၸုမ်းယၢင်း BGF, DKBA ၼႆသေတႃႉ ယၢင်းသွင်ၸုမ်းၼႆႉ ပဵၼ်မၼ်းၵေႃႉလဵင်ႉလူဝႆႉတွမ်းတူၺ်းဝႆႉၵွႆး၊

ၸိူင်ႉၼင်ႇ ၸၢမ်ႇမျိၼ်ႉ ႁိုဝ် ၸေႃးၶျိတ်ႉတူႇၼႆ ပၢႆပဵၼ်ၽူႈမီးၸၼ်ႉသုင် လႆႈၶႅပ်းသူးဢၼ်ၼေႇပျီႇတေႃႇ မွပ်ႈပၼ်ဝႆႉၵွၼ်ႇ၊ လွင်ႈၶဝ်ၶဝ်ႈဢွၵ်ႇယိုၼ်ႈမႅင်ႇၵၼ်ၵေႃႈ ဢမ်ႇပိုတ်ႇလၢတ်ႈပိူၼ်ႈပေႃးႁူႉၸွမ်းမူတ်း။

 ၼင်ႇႁိုဝ် တပ်ႉသိုၵ်းမၢၼ်ႈ တေဢဝ်လႆႈၶိုၼ်းမျႃႉဝတီႇ ဢၼ်တူၵ်းၶမ်ႈၼႂ်းမိုဝ်း KNU ၼႆၵေႃႈ ၸွင်ႇဢမ်ႇၸႂ်ႈ ၸေႃးၶျိတ်ႉတူႇ ၵေႃႉၵျေႃးလႅၼ်လိင်ႉလွၵ်းပၼ် ၵွႆးႁိုဝ်၊ မိူၼ်တင်း ပေႃႈလုၵ်ႈၵၼ်ၵွႆးယိုင်။

 တေဝႃႈ DKBA ၼႆၵေႃႈ ပဵၼ်ၸုမ်းၵိၼ်သုၵ်းၵိၼ်လိပ်း ၵၼ်တင်း ၼေႇပျီႇတေႃႇၵွႆးၼင်ႇၵဝ်ႇ၊ လုၵ်ႈၵဵပ်း ၶွင်တပ်ႉသိုၵ်းမၢၼ်ႈ ၸဵမ်မိူဝ်ႈပၢၼ်ၶိၼ်ႇၺုၼ်ႉ ၼၼ်ႉၼႆ ႁူႉထိုင်ၵၼ်မူတ်း။

ၸင်ႇၼၼ် လွင်ႈၵွင်ႉၵၢႆႇၵၼ် ၼႂ်းၵႄႈ ၸုမ်းယၢင်း လႄႈ ၼေႇပျီႇတေႃႇ၊ ၼေႇပျီႇတေႃႇ လႄႈ မိူင်း ၶႄႇ၊ လွင်ႈၵွင်ႉၵၢႆႇ ၼႂ်းၵႄႈ ၸေႃးၶျိတ်ႉတူႇ လႄႈ ၸဝ်ႈၼႃႈတီႈပလိၵ်ႈထႆး၊ လွင်ႈၵွင်ႉၵၢႆႇ သိုဝ်ၸိုၼ်ႉၸၢင်း ဢၼ်ပဵၼ်ၵူၼ်းမိူင်းၶမ်ႊပူဝ်ႊတီႊယႃႊ လႄႈ ၸဝ်ႈၼႃႈတီႈပလိၵ်ႈထႆး ၸဵမ်လူင်ပွင်ၸိုင်ႈ ၶမ်ႊပူဝ်ႊတီႊယႃႊၸိူဝ်းၼႆႉ မွင်းႁႂ်ႈ ဢမႄႊရိၵၼ်ႊ ယုၵ်ႉသၼ်ႇငဝ်ႈၶိူဝ်းလၢႆး႞ၵွႆး တၵ်းယွၼ်ႈထိုင် တူၼ်ႈလမ်းၵိင်ႇၶႃႈ သၼ်ႇၶွၼ်းထိုင်ပၢႆ ၽႅတ်းလႅတ်းလႅတ်းဢမ်ႇႁၢင်ႉယဝ်ႉ။

ယူးပၢၵ်ႈလူင် ဢၼ်တႄႇမႃးတီႈ မႃးၽီးယႃးမိူင်းၶႄႇၼၼ်ႉ ပေႃႉသႂ်ႇပႃး မိူင်းတႆးပွတ်းႁွင်ႇ ပွင်ႇထိုင်မိူင်းယၢင်းဢမ်ႇၵႃး ယွၼ်ႈၺႃးၸဵမ် ထႆး၊ ၶမ်ႊပူဝ်ႊတီႊယႃႊၵႂႃႇ ဢၼ်ဝႃႈၼႆႉ ဢမ်ႇၸႂ်ႈလိူင်ႈ ၵၢၼ်သလေႃႇမတေႃႇ၊ တၵ်းၸႂ်ႈၽႅၼ်လၢႆးပၢႆးၵၢၼ် လၢႆပႃႈၽၢႆႇယဝ်ႉ ဢွၼ်ဝႃႈၼႆၵၼ်ယူႇ။

ၼႂ်းၼင်ႇၼၼ် KNU ဢၼ်မီးၸိုဝ်ႈလီ ၾၢႆႇၶတ်းၶၢၼ်ႉလုၵ်ႉၽိုၼ်ႉတေႃႇ ၸဝ်ႈဢႃႇၼႃႇသိုၵ်းမၢၼ်ႈမႃး ၵိုၵ်းပိုၼ်းယိုၼ်းထိုင်တေႃႇမိူဝ်ႈလဵဝ်ၼႆၵေႃႈ ၵိူဝ်းလႆႈလွတ်ႈပူၼ်ႉ တႂ်ႈဢၢႆသႅဝ်ၵျႃႇၽျႅၼ်ႉသေ ၵၼ်ႉၵူၵ်ႉၵုၺ်ႉပၢၵ်ႈပႅတ်ႈ ႁူဝ်ပဝ်ႈၵေႃႉၵဝ်ႇၶဝ်လႂ်ၵေႃႈ ၵႃႈလႆႈႁဵတ်း၊ ၾၢႆႇၼိုင်ႈ ၼင်ႇႁိုဝ်ၵူ ၼ်း မိူင်းယၢင်းၽိူၵ်ႇတင်းလုမ်ႈ တေႁၼ်လီဝႃႈ ၶဝ်တိုၼ်းပၵ်းၸႂ်တႃႇသၢင်ႈၽွၼ်းလီ ၸိူဝ်ႉၸၢတ်ႈယၢင်းယူႇမႅၵ်းမႅၵ်းၼႆၵေႃႈ ၵၼ်ႉၵူၵ်ႉထွႆဢွၵ်ႇပႃး တီႈ NUCC ၸိူဝ်းၼႆႉ ပဵၼ်လွၵ်းလဵၼ်ႈၵၢၼ်မိူင်း ဢၼ်လႆႈၵႃႈၵျွၵ်း ယွၼ်ႉယၢမ်ႈလူမ်ႇလွၵ်း ၶွင်တပ်ႉသိုၵ်းမၢၼ်ႈ ႁၢင်ႈၶႂၢၵ်ႇထၢၵ်ႇထႅၵ်ႇ ႁႂ်ႈပေႃးယၢႆႈၵၼ်ပဵၼ်ၵႂႃႇ သၢမ်မူႇသီႇၸုမ်းၼၼ်ႉၵွႆး ၶႂ်ႈဝႃႈၼႆယူႇ။

ၶေႃႈလူပ်းလိုၼ်းၸိုင် ထိုင်ယၢမ်းၸုမ်းယၢင်း ၸိူဝ်းလႆႈၵိၼ်လႆႈငၢၼ်ႈၸွမ်းၵၢၼ်ၵျႃႇၽျႅၼ်ႉ တူၵ်းၵမ်းပဵၼ်တူဝ်ယိူဝ်ႇၶွၼ်ႈမေႃႈမႃး တၢင်ႇၸုမ်းၸိူဝ်းတေႃႉတႄႉၺႃး ဢၢႆသၢပ်ႇဢွၼ်ႇမၼ်းဢိတ်းဢီႈ ၼၼ်ႉ တေၶိုင်ႁႃတၢင်းပၢႆႈယၢႆႉဢွၵ်ႇၸိူင်ႉႁိုဝ်ၼႆ ပေႃးဢမ်ႇလၼ်းၵၼ်းတၼ်းတူဝ်ၶိုတ်းမိုဝ်ႉယၢမ်းတႄႉ ၶႄးၶႄးတေဢဝ်တူဝ်လွတ်ႈယၢပ်ႇယူဝ်ႉၼႆ ၶႂ်ႈယွၼ်းပၢႆးၼေၵၼ်ယူႇဢေႃႈ။