သိုၵ်းၶၢင် KIA ႁူမ်ႈတင်းသိုၵ်း PDF  တီႉၺွပ်း ၵူၼ်းၼုမ်ႇၼႂ်းပိုၼ်ႉတီႈ 40 ၵေႃႉ တီႈၼႂ်းထုင်ႉလွႆႁူဝ်သိူဝ် ၸႄႈဝဵင်းမၢၼ်ႈၸေႊ မိူင်းၶၢင် သေ ၸႂ်ႉၵူၼ်းႁိူၼ်းဢဝ်ငိုၼ်းၵႂႃႇထုတ်ႇတူဝ်ၶိုၼ်း။

ၵူၼ်းၸၢႆးဢၼ်ထုၵ်ႇတီႉၺွပ်းၵႂႃႇၼၼ်ႉ ပဵၼ်ၵူၼ်းၸၢႆးဢႃယု ၼႂ်းၵႄႈ 18- 45  ပီ။ ပဵၼ်ၵူၼ်းတၢင်းဝၢၼ်ႈသွၼ်း ၊ ၵွင်းၼွင် ၊ ဝၢၼ်ႈၸၢင်ႉ ၊ ၼွင်ၸွၼ်း ၊ ၼွင်မူၼ်း ၊ ၼမ်ႉႁီး ဢၼ်မီးၼႂ်းထုင်ႉလွႆႁူဝ်သိူဝ်   40 ၵေႃႉ ၊ တီႉၺွပ်းၵုမ်းၶင်ဝႆႉတီႈ ႁူင်းၵဵပ်းၶူဝ်းၶွင်  မၢၼ်ႈသွၼ်း ၼႂ်းၸႄႈဝဵင်းၼမ်ႉၶမ်း ၸိုင်ႈတႆးပွတ်းႁွင်ႇ ဝႃႈၼႆ ။

ၵူၼ်းၸၢႆးပိုၼ်ႉတီႈလၢတ်ႈၽူႈတွႆႇႁွၵ်ႈဝႃႈ -“ လွင်ႈဢၼ်ၶဝ်တီႉၺွပ်းၼႆႉ ဢမ်ႇၸႂ်ႈဝႃႈ ယွၼ်ႉမီးလွင်ႈ ၵဵဝ်ၶွင်ႈၵၼ် တင်း ယႃႈမဝ်းၵမ်  ၊ မၼ်းတေပဵၼ်ၶဝ်တီႉၺွပ်းၵူၼ်းတႃႇႁၢပ်ႇၵၢၼ်သိုၵ်း ၊ ၼႂ်းၵူၼ်း 40 ၵေႃႉ ဢၼ်ပႃးၵႂႃႇၼၼ်ႉ ပဵၼ်ၵူၼ်းၼုမ်ႇတႆးၵမ်ႈၼမ် ”- ဝႃႈၼႆ ။

မိူၼ်ၼင်ႇၼႆ မိူဝ်ႈဝႃး ဝၼ်းတီႈ 25/11/2025 ယၢမ်းၵၢင်ၼႂ်  10 မူင်းၵေႃႈ သိုၵ်းၶၢင် KIA ပႂ်ႉတီႉၺွပ်းၵူၼ်း ၼိူဝ်သဵၼ်ႈတၢင်းလူင် ၼႂ်းၵႄႈဝၢၼ်ႈႁၢင်ၵၢမ်းလႄႈ ဝၢၼ်ႈမႅင်ႇ ဢၼ်မီးၼႂ်းဢိူင်ႇမၢၼ်ႈသွၼ်း  ။ ၵူၺ်းၵႃႈ တီႉၺွပ်းၵႂႃႇလၢႆၵေႃႉ ဢၼ်ဝႃႈၼၼ်ႉတႄႉ ပႆႇလႆႈႁူႉၸွမ်းႁူဝ်ယွႆႈမၼ်း ။

ၵူၼ်းၸၢႆးပိုၼ်ႉတီႈလၢတ်ႈၽူႈတွႆႇႁွၵ်ႈဝႃႈ – “ ၶဝ်ႈတႄႇတီႉၺွပ်း 24 လႄႈ 25 ၼႂ်းသွင်ဝၼ်းၼႆႉ ၊ ၶဝ်ႈပႂ်ႉတီႉၺွပ်းၸွမ်းတၢင်း ၊ ထိုင်မိူဝ်ႈၼႆႉ ၶဝ်ပႆႇပွႆႇပၼ်ၶိုၼ်း ၊ ၵူၼ်းတီႈႁိူၼ်းၵေႃႈ ဢမ်ႇပၼ်ထူပ်း ၶဝ်ၵုမ်းၶင်ဝႆႉ ” – ဝႃႈၼႆ ။

လႆႈႁူႉဝႃႈ ၵူၼ်းဢၼ်ထုၵ်ႇတီႉၺွပ်းၵႂႃႇၼၼ်ႉ ၵူၼ်းႁိူၼ်းလႆႈဢဝ်ငိုၼ်းႁူဝ်သိပ်းသႅၼ်ၵႂႃႇထုတ်ႇတူဝ်ၶိုၼ်း ၊ မၢင်ၸိူဝ်းၵေႃႈထုၵ်ႇတူဝ်ဢဝ်ၶိုၼ်းလႆႈ မၢင်ၸိူဝ်းၵေႃႈဢမ်ႇပၼ်ထုတ်ႇ။   တူဝ်ၵူၼ်းလွတ်ႈဢွၵ်ႇမႃးၶိုၼ်းယူႇသေတႃႉ ရူတ်ႉၶိူင်ႈ တႄႉၶဝ်ယိုတ်းဝႆႉ- ၵူၼ်းပိုၼ်ႉတီႈလၢတ်ႈၼင်ႇၼႆ ။

ယွၼ်ႉသိုၵ်းၶၢင် ၶဝ်ႈတီႉၺွပ်း ၸွမ်းၵိဝ်ႇ ၸွမ်းတၢင်း ၼႂ်းဢိူင်ႇၼႂ်းဝၢၼ်ႈလႄႈ ႁဵတ်းႁႂ်ႈၵူၼ်းပိုၼ်ႉတီႈ တိုၼ်ႇသၢၼ်ႈ တူၵ်းၸႂ် မႆႈၸႂ်လွင်ႈႁူမ်ႇလူမ်ႈ – ဝႃႈၼႆ ။

ၵူၼ်းၸၢႆးပိုၼ်ႉတီႈလၢတ်ႈၽူႈတွႆႇႁွၵ်ႈဝႃႈ -“ တႃႇတေၵႂႃႇႁဵတ်းၵၢၼ် ၸွမ်းႁိမ်းႁွမ်းၼႆႉၵူၺ်းၵေႃႈ ၽႂ်ဢမ်ႇႁတ်းၵႂႃႇ။ ဢွၼ်ၵၼ်ၵူဝ်ဢေႃႈ။ ၵမ်ႈၽွင်ႈ ဢမ်ႇႁတ်းၼွၼ်း တီႈႁိူၼ်း ၊ ၵမ်ႈၽွင်ႈၵေႃႈ ဢၢၼ်းတေငိူင်ႉပၢႆႈဢွၵ်ႇပိုၼ်ႉတီႈ ”- ဝႃႈၼႆ ။ 

လွင်ႈၼႆႉ ၽူႈတွႆႇႁွၵ်ႈၵပ်းသိုပ်ႇတူၺ်းတီႈၸုမ်းသိုၵ်းၶၢင်ၵေႃႈ ၵပ်းသိုပ်ႇဢမ်ႇလႆႈ ။ ၵူၺ်းၵႃႈမိူဝ်ႈၵူႈပွၵ်ႈတႄႉ ၶဝ်ယၢမ်ႈတွပ်ႇတီႈၽူႈတွႆႇႁွၵ်ႈဝႃႈ – ပဵၼ်ၵၢၼ် ၽူႈမီးဢႃႇၼႃႇၼႂ်းပိုၼ်ႉတီႈ ၸတ်းၵၢၼ်လွင်ႈၽဵဝ်ႈမူၺ်ႉယႃႈမဝ်းၵမ်ၵူၺ်း – ဝႃႈၼႆ။

ဝၢႆးသိုၵ်းမၢၼ်ႈယိုတ်းဢႃႇၼႃႇၸိုင်ႈမိူင်းမႃးၼႆႉႁွင်ႈၵၢၼ်ဢၼ်မီးပုၼ်ႈၽွၼ်းတႃႇပူၵ်းပွင်ၼႂ်းဝၢၼ်ႈၼႂ်းမိူင်းၵေႃႈ ဢမ်ႇပဵၼ်ၵၢၼ်တႄႉတႄႉ  ။ ဢွင်ႈတီႈဢၼ် သိုၵ်းမၢၼ်ႈတိုၵ်ႉၵုမ်းဝႆႉသမ်ႉ ပိူင်ပေႃႊလသီႊမဵဝ်းၼိုင်ႈ ၊ ဢွင်ႈတီႈဢၼ် သိုၵ်းၸၢဝ်းၶိူဝ်း ႁိုဝ်ဢမ်ႇၼၼ် ၸုမ်းလုၵ်ႉၽိုၼ်ႉၶၢဝ်းႁွင် PDF ၵုမ်းဝႆႉသမ်ႉပဵၼ်ပိူင်ထႅင်ႈယၢင်ႇၼိုင်ႈ။ ပိူင်ဢၼ်လႂ်ဢွၵ်ႇမႃးၵေႃႈ ၵူၼ်းမိူင်းၵူၺ်းပဵၼ်ဢၼ်လႆႈထူပ်းလွင်ႈတုမ်ႉတိူဝ်ႉၵမ်းသိုဝ်ႈသေလႆႈယၢပ်ႇၸႂ်ၸွမ်း။  

ပွတ်းတၢင်း ၼမ်ႉၶမ်း ၸိုင်ႈတႆး ပွတ်းႁွင်ႇဢၼ် သိုၵ်းတဢၢင်း TNLA ၵုမ်းမႃးလႆႈ 2 ပီၼႆႉၵေႃႈ ဢၢင်ႈၸိုဝ်ႈဝႃႈ တႃႇပၼ်ႇၵၢၼ်ၽွင်းငမ်းတူဝ်ၵဝ်ႇၼႆသေ ၶိုင်ႁႃလၢႆးၵဵပ်းၶွၼ်ႇၵူၼ်းမိူင်းလၢႆးၼိုင်ႈယဝ်ႉလၢႆးၼိုင်ႈ  – ၵူၼ်းပိုၼ်ႉတီႈလၢတ်ႈ ။