ဝဵင်းၵျႃႊၵႃႊတႃႊ မိူင်းဢိၼ်ႊတူဝ်ႊၼီႊသျႃႊ ဢၼ်မီးႁူဝ်ၼပ်ႉၵူၼ်းယူႇသဝ်း ႁိမ်းၸမ် 42 လၢၼ်ႉၼၼ်ႉ ပဵၼ်မႃးဝဵင်း ဢၼ်ယႂ်ႇလိူဝ်ပိူၼ်ႈသုတ်း ၼႂ်းလုမ်ႈၾႃႉ ဝႃႈၼႆ။
ၸွမ်းၼင်ႇ ၽိုၼ်လိၵ်ႈႁၢႆးငၢၼ်း World Urbanization prospects 2025 ၸၢတ်ႈၸိုင်ႈလုမ်ႈၾႃႉပိုၼ်ၽၢဝ်ႇဢွၵ်ႇဝႆႉ ၼႂ်းဝၼ်းတီႈ 18/11/2025 ၼၼ်ႉၸိုင် ႁူဝ်ၼပ်ႉၵူၼ်းၼႂ်းလုမ်ႈၾႃႉ တႃႇ 45% ၼႆႉ ပဵၼ်ၵူၼ်း ၸိူဝ်းယူႇသဝ်းဝႆႉၼႂ်းဝဵင်းယႂ်ႇဝဵင်းလူင် ၼႆယဝ်ႉ။
ၼႂ်းၽိုၼ်လိၵ်ႈႁၢႆးငၢၼ်း ဢၼ်ပိုၼ်ၽၢဝ်ႇဢွၵ်ႇဝႆႉ မိူဝ်ႈပီ 2018 ပူၼ်ႉမႃးၼၼ်ႉတႄႉ ဝဵင်း ဢၼ်မီးႁူဝ်ၼပ်ႉၵူၼ်းယူႇသဝ်း ၼမ်လိူဝ်ပိူၼ်ႈၼၼ်ႉ ပဵၼ်ဝဵင်း တူဝ်ႊၵျူဝ်ႊ (Tokyo) မိူင်းၵျပၼ်ႊ။ ၵူၺ်းၵႃႈယၢမ်းလဵဝ် ၶၢႆႉၵႂႃႇပဵၼ် မၢႆသၢမ်ဝႆႉ။ တီႈမၢႆသွင်သမ်ႉ ပဵၼ်ဝဵင်း တႃႊၵႃႊ (Dhaka) မိူင်းပင်းၵလႃးတႅတ်ႉၶျ်။
ယၢမ်းလဵဝ် ၼႂ်းလုမ်ႈၾႃႉၼႆႉ ဝဵင်းဢၼ်မီးႁူဝ်ၼပ်ႉၵူၼ်းယူႇသဝ်း ၼမ်လိူဝ် 10 လၢၼ်ႉၵေႃႉ ဢၼ်ႁွင်ႉဝႃႈ Megacity ၼႆၼၼ်ႉ မီးထိုင် 33 ဝဵင်း၊ ၼႂ်းၼၼ်ႉ တႃႇ 19 ဝဵင်းၼႆႉ မီးဝႆႉၼႂ်းၵုၼ်ၶဵဝ်ဢေႊသျႃႊ ဝႃႈၼႆ။
ၽွင်းပီ 1979 ၼၼ်ႉ Megacity မီး 8 ဝဵင်းၵူၺ်းလႄႈ ယၢမ်းလဵဝ် တေလႆႈဝႃႈပုင်ႈၶိုၼ်ႈမႃးထိုင် 4 ပုၼ်ႈ။ ၼႂ်းသဵၼ်ႈမၢႆ ဝဵင်းဢၼ်မီးႁူဝ်ၼပ်ႉၵူၼ်းယူႇသဝ်း ၼမ်လိူဝ်ပိူၼ်ႈ 10 ဝဵင်းၼၼ်ႉ လိူဝ်သေဝဵင်း ၵၢႆႊရူဝ်ႊ (Cairo)တီႈမိူင်းဢီႊၵျိပ်ႉယဝ်ႉ ဢၼ်ၵိုတ်းလိူဝ်ၼၼ်ႉ ပဵၼ်ၼႂ်းပိုၼ်ႉတီႈ ဢေႊသျႃႊတင်းသဵင်ႈ ဝႃႈၼႆ။
ၸၢတ်ႈၸိုင်ႈလုမ်ႈၾႃႉ ၶၢတ်ႈလၢမ်းဝႆႉဝႃႈ ပေႃးထိုင်ပီ 2050 မႃးၸိုင် ဝဵင်း Megacity (ဝဵင်းမီးႁူဝ်ၼပ်ႉၵူၼ်း 10 လၢၼ်ႉလိူဝ်) တေၼမ်မႃးထိုင် 37 ဝဵင်း၊ ဝဵင်းဢွၼ်ႇ ၸိူဝ်းႁူဝ်ၼပ်ႉၵူၼ်းယူႇသဝ်း မီး 2 သႅၼ်ပၢႆၸိူဝ်းၼၼ်ႉၵေႃႈ ႁူဝ်ၼပ်ႉၵူၼ်း တေၵိုင်ႉၵၢင်ႉပုၼ်ႈၶိုၼ်ႈသုင်မႃး ဝႃႈၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ