ၼႂ်းပီ 2026 တေထိုင်ၼႆႉ မိူင်းမလေးသျႃး ႁၢင်ႈႁႅၼ်း တေႁၢမ်ႈ လုၵ်ႈဢွၼ်ႇဢႃယု 16 ပီ လူင်းတႂ်ႈ လဵၼ်ႈ သိုဝ်ႇတူင်ႇဝူင်းၵူၼ်း(social media) ယွၼ်ႉပိူဝ်ႈမႆႈၸႂ် လွင်ႈႁူမ်ႇလူမ်ႈလႄႈလွင်ႈ လွတ်ႈၽေးလုၵ်ႈဢွၼ်ႇ ဝႃႈၼႆ။
ယၢမ်းလဵဝ် လူင်ပွင်ၸိုင်ႈမလေးသျႃး တိုၵ်ႉလဵပ်ႈႁဵၼ်းတူၺ်းလွၵ်းလၢႆးပၼ်ႇၵၢၼ် တီႈမိူင်းဢေႃႊသတေႊလီႊယိူဝ်ႊ လႄႈ တၢင်ႇၸိုင်ႈမိူင်း ၸိူဝ်းႁႄႉႁၢမ်ႈ ဢမ်ႇပၼ်လုၵ်ႈဢွၼ်ႇၸႂ်ႉတိုဝ်း သိုဝ်ႇတူင်ႇဝူင်း ၼၼ်ႉယူႇ။
ၽွင်းလူင်ၾၢႆႇၵၢၼ်ၵပ်းသိုပ်ႇ မိူင်းမလေးသျႃး လၢတ်ႈဝႃႈ – လူဝ်ႇလႆႈႁူမ်ႈၵၼ်ၵႅတ်ႇၶႄႁႄႉၵင်ႈ ၽေးၶဵၼ် ဢၼ်မႃးတၢင်း ဢွၼ်ႊလၢႆႊ ၼင်ႇႁိုဝ်လုၵ်ႈဢွၼ်ႇတေဢမ်ႇၺႃး တဵၵ်းတဵင်ပေႉၵိၼ်တင်း သၢႆႊပိူဝ်ႊ၊ ၼင်ႇႁိုဝ် တေဢမ်ႇၺႃး လွၵ်ႇလႅၼ်ၵိၼ်ငိုၼ်းလႄႈ ပူၼ်ႉပႅၼ်လူလၢႆတၢင်းၵႃႇမ ၸဵမ်ၸိူဝ်းၼႆႉ ဝႃႈၼႆ။
ယၢမ်းလဵဝ် တူဝ်ႈလုမ်ႈၾႃႉ ဢွၼ်ၵၼ်မႆႈၸႂ်ဝႆႉ ယွၼ်ႉသိုဝ်ႇတူင်ႇဝူင်းၵူၼ်း မီးၽွၼ်းတုမ်ႉယွၼ်ႈၼိူဝ် ပၢႆးယူႇလီ လႄႈ လွင်ႈႁူမ်ႇလူမ်ႈလုၵ်ႈဢွၼ်ႇ။ လိူဝ်ၼၼ်ႉ လွင်ႈၸႂ်ႉတိုဝ်း TikTok၊ Snapchat၊ Google Facebook၊ Instagram လႄႈ WhatsApp ၸိူဝ်းၼႆႉ ႁဵတ်းႁႂ်ႈမီးၽွၼ်းတုမ်ႉယွၼ်ႈတေႃႇ ပၢႆးၸႂ်ပႃး။
တီႈမိူင်းမလေးသျႃးၼႆႉ ယွၼ်ႉၾူတ်ႊ (Post) ဢၼ်ပိုၼ်ၽၢဝ်ႇ ၵၢၼ်တေႃႇလွင်းၼိူဝ်ဢွၼ်ႊလၢႆႊ၊ ဢၼ်သေႃႇသူၼ်း ႁႂ်ႈပဵၼ်ၶေႃႈၵႂၢမ်းပႅင်းၸင်း ၼႂ်းၵႄႈၵၢင်ၶိူဝ်းၵူၼ်း၊ သႃသၼႃ ၸိူဝ်းၼၼ်ႉၼမ်ၶိုၼ်ႈမႃးလႄႈ လႆႈတိူဝ်းၶဵင်ႈၶႅင်ၵူတ်ႇထတ်း ၶွမ်ႊပၼီႊ သိုဝ်ႇၼႅင်ႈသၢၼ်တူင်ႇဝူင်းၵူၼ်းၶဝ်မႃး ဝႃႈၼႆ။
ယၢမ်းလဵဝ် မိူင်းၾရင်ႇသဵတ်ႈ၊ မိူင်းသပဵၼ်ႇ၊ မိူင်းတဵင်ႊမၢတ်ႉၶ် လႄႈ မိူင်းၵရိၶဝ်ၸိူဝ်းၼႆႉ တိုၵ်ႉႁူမ်ႈၵၼ် ၸၢမ်းႁဵတ်းတူၺ်း App ဢၼ်တေယိုၼ်ယၼ်ဢႃယုၵူၼ်း ၸိူဝ်းၸႂ်ႉတိုဝ်းသိုဝ်ႇတူင်ႇဝူင်းၵူၼ်းၼၼ်ႉလႆႈ ဝႃႈၼႆ။
တီႈမိူင်းမလေးသျႃးၼႆႉ ၸွမ်းၼင်ႇမၢႆမီႈ ပၵ်းပိူင်မႂ်ႇ ဢၼ်တႄႇၸႂ်ႉတိုဝ်းပဵၼ်တၢင်းၵၢၼ်မႃး ၼႂ်းလိူၼ် ၵျႅၼ်ႊၼိဝ်ႊရီႊၼၼ်ႉသေ သိုဝ်ႇတူင်ႇဝူင်းၵူၼ်း ၸိူဝ်းမီးၵူၼ်းၸႂ်ႉတိုဝ်းဝႆႉၼမ်လိူဝ်သေ 8 လၢၼ်ႉၼၼ်ႉ တေလႆႈတၢင်ႇမၢႆၾၢင် (လၢႆႊသျိၼ်ႊ)ၵႂႃႇ ၼႆယဝ်ႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ