တႄႇဝၼ်းတီႈ 10/04/2025 ၼႆႉၵႂႃႇ သၢႆၵၢၼ်မိၼ် Myanmar Airways International မိူင်းမၢၼ်ႈ တႄႇလုၵ်ႉဝဵင်းတႃႈၵုင်ႈ ဢွၵ်ႇၶၢဝ်းတၢင်း မိၼ်ၵႂႃႇတီႈဝဵင်းပီႇၼၢၼ်ႇ (Penang) မိူင်းမလေးသျႃးယဝ်ႉ ဝႃႈၼႆ။

ၶၢဝ်းတၢင်းသၢႆၵၢၼ်မိၼ်ၼႆႉ ၼိုင်ႈဝူင်ႈမီး 2 ဝၼ်း ပဵၼ်ဝၼ်းၸၼ်လႄႈ ဝၼ်းဢႃးတိတ်ႉ။ ယိူင်းဢၢၼ်း တႃႇတေယုၵ်ႉမုၼ်း ၵၢၼ်ဢႅဝ်ႇလႄႇတွင်ႈတဵဝ်း ၼႂ်းၵႄႈၵၢင်သွင်ၸိုင်ႈမိူင်းၼႆ –  သိုဝ်ႇ ၶၢဝ်ႇမလေးသျႃး The Sun Daily ႁၢႆးငၢၼ်းဝႆႉၼင်ႇၼႆ။

ႁူဝ်ပဝ်ႈ ၶွမ်ႊမတီႊ ၾၢႆႇၶူင်သၢင်ႈၵၢၼ်ပၢႆးမၢၵ်ႈမီးလႄႈ ၵၢၼ်ဢႅဝ်ႇလႄႇတွင်ႈတဵဝ်း မိူင်းမလေး သျႃး လၢတ်ႈဝႃႈ – ၶၢဝ်းတၢင်းသၢႆၵၢၼ်မိၼ်ဢၼ်မႂ်ႇၼႆႉ တေႁဵတ်းႁႂ်ႈၵၢၼ်ဢႅဝ်ႇလႄႇတွင်ႈတဵဝ်း ၊ ၵၢၼ်လူင်းတိုၼ်းလၢင်း ၊ ပၢႆးပၺ်ႇၺႃႇလႄႈ ပၢႆးယူႇလီ ၼႂ်းၵႄႈၵၢင် ဝဵင်းပီႇၼၢၼ်ႇ မိူင်းမလေးသျႃးလႄႈ တင်းမိူင်းမၢၼ်ႈ ပေႃးတေမီးလွင်ႈႁုၼ်ႈမုၼ်းၶိုၼ်ႈယႂ်ႇမႃး – ဝႃႈ ၼႆ။

ယၢမ်းလဵဝ် သၢႆၵၢၼ်မိၼ် Myanmar Airways International ဢွၵ်ႇၶၢဝ်းတၢင်း မိၼ်ၸူးတီႈဝဵင်း ၵူဝ်ႊလူဝ်ႊလမ်ႊပူဝ်ႊ မိူင်းမလေးသျႃး ၵူႈဝၼ်း။

ဝဵင်းပီႇၼၢၼ်ႇ မိူင်းမလေးသျႃးၼႆႉ ၸိုဝ်ႈလိုဝ်းလင်ဝႆႉ ၵဵဝ်ႇလူၺ်ႈၾၢႆႇပၢႆးယႃႈယႃ။ ပဵၼ်တီႈႁပ်ႉ ယူတ်းယႃပၼ်  ၵူၼ်းၼွၵ်ႈမိူင်း ဢိၵ်ႇပႃး ၵူၼ်းမိူင်းမၢၼ်ႈ ၼပ်ႉႁူဝ်သႅၼ်ၵေႃႉ ၵူႈပီ။

ယၢမ်းလဵဝ် သၢႆၵၢၼ်မိၼ် ဢၼ်လုၵ်ႉတီႈဝဵင်းပီႇၼၢၼ်ႇ မိူင်းမလေးသျႃးသေ ဢွၵ်ႇၶၢဝ်းတၢင်း မိၼ်ၸူးဝဵင်းယႂ်ႇလူင် ၼႂ်းဢေးသျႃးတင်း ဝၼ်းဢွၵ်ႇၵၢင် ၵမ်ႈသိုဝ်ႈ မီးဝႆႉ 20 ဝဵင်း။ သင်ၼပ်ႉပႃး သၢႆၵၢၼ်မိၼ် ဝဵင်းတႃႈၵုင်ႈ မိူင်းမၢၼ်ႈယၢမ်းလဵဝ်ၸိုင် တင်းမူတ်းမီး 21 ဝဵင်း – သိုဝ်ႇၶၢဝ်ႇ DVB ဢွၵ်ႇဝႆႉၼင်ႇၼႆ။။