ၵဵဝ်ႇလူၺ်ႈလွင်ႈထဵင်မေႃးၵၼ်ၸွမ်းလႅၼ်လိၼ်သေ တႃႇတေၶွတ်ႇၽွတ်ႈ ၸုမ်းပၵ်းတႃပႂ်ႉတူၺ်း ၸွမ်းၵၢၼ်ၵိုတ်းတိုၵ်းၵၼ်ၼၼ်ႉ ထႆးတင်း ၵမ်ႇပူးၶျႃး တႄႇႁူပ်ႉဢုပ်ႇၵၼ် တီႈမိူင်းမလေးသျႃး ၼႂ်းဝၼ်းတီႈ 05/08/2025 ၵႂႃႇ တႃႇၶၢဝ်းတၢင်း 4 ဝၼ်း။
မိူဝ်ႈဝၼ်းတီႈ 24/07/2025 ပူၼ်ႉမႃးၼၼ်ႉ သိုၵ်းထႆးတင်း ၵမ်ႇပူးၶျႃး ပဵၼ်ပၼ်ႁႃထဵင်မေႃးၵၼ် ၸွမ်းလႅၼ်လိၼ်။ မိူဝ်ႈၽွင်းပဵၼ်ပၼ်ႁႃၵၼ်မႃးၶၢဝ်းတၢင်းႁိုင် 4 ဝၼ်းယဝ်ႉ ယူႇတီႈ မိူင်းမလေးသျႃး လႆႈၶဝ်ႈယူႇၵၢင်သေ ငူပ်ႉငီႉပၼ်။ ၾၢႆႇၼိုင်ႈၵေႃႈ ၼႂ်းပီ 2025 ၼႆႉ မိူင်းမလေးသျႃး လႆႈႁပ်ႉပုၼ်ႈၽွၼ်းပဵၼ်ႁူဝ်ပဝ်ႈ ၸုမ်းဢႃႊသီႊယၼ်ႊဝႆႉ။
မိူဝ်ႈပၢင်ၵုမ်ၵမ်းႁႅၵ်ႈၼၼ်ႉ တေပဵၼ်ပၢင်ၵုမ်ၸၼ်ႉၽွင်းလူင်ၾၢႆႇၵၢၼ်ၵႅတ်ႇၶႄႇ ဢုပ်ႇဢူဝ်းၵၼ်၊ ၵူၺ်းၵႃႈ ၽူႈတၢင်တူဝ် မိူင်းဢမေႊရိၵၼ်ႊတင်း မိူင်းၶႄႇၵေႃႈ ၶဝ်ႈႁူမ်ႈၸွမ်း ဝႃႈ ၼႆ။
ၵဵဝ်ႇလူၺ်ႈ ထႆးတင်း ၵမ်ႇပူးၶျႃးၼႆႉ တိုၵ်ႉမီးလွင်ႈမၢပ်ႇၼႄးတၢင်ႇတၢင်းၽိတ်းတေႃႇၵၼ်ဝႆႉယူႇလႄႈ ပၢင်ၵုမ်ၼႆႉ ၸင်ႇတေမီးလွင်ႈၶိုပ်ႈၼႃႈႁိုဝ်ၼႆၼၼ်ႉတႄႉ ပႆႇၸၢင်ႈလၢတ်ႈလႆႈတႅတ်ႈတေႃး။
ယွၼ်ႉဝႃႈ ပိုၼ်ႉတီႈၵျွင်းၽြႃးၵဝ်ႇၵႄႇ ဢၼ်မီးတီႈလႅၼ်လိၼ်သွင်ၸိုင်ႈမိူင်းၼၼ်ႉသေ ထႆးတင်းၵမ်ႇပူးၶျႃး ယၢမ်ႈမီးပၼ်ႁႃထဵင်မေႃးၵၼ်မႃး ပီယၢဝ်းၶၢဝ်းႁိုင်ယဝ်ႉ။ မိူဝ်ႈပီ 2011 ၼၼ်ႉၵေႃႈ သွင်ၸိုင်ႈမိူင်း လႆႈပဵၼ်ပၢင်တိုၵ်းၵၼ်မႃးယဝ်ႉၵမ်းၼိုင်ႈ တႄႇဢဝ် ၼႂ်းလိူၼ်ၾႅပ်ႊပိဝ်ႊရီႊတေႃႇထိုင် လိူၼ်ဢေႊပရိူဝ်ႊ (ၶၢဝ်းတၢင်း 3 လိူၼ်) ၊ ၵူၼ်းသိုၵ်းသွင်ၾၢႆႇ လႆႈလူႉတၢႆၵႂႃႇ 20 ပၢႆ။
ထိုင်မႃး ၼႂ်းလိူၼ်မေႊ ပီ 2025 ၼႆႉသမ်ႉ ယွၼ်ႉသွင်ၸိုင်ႈမိူင်း မီးလွင်ႈၶဵင်ႈၶႅင်ၵၼ်ၸွမ်းလႅၼ်လိၼ်ထႅင်ႈလႄႈ ၵူၼ်းသိုၵ်းၵမ်ႇပူးၶျႃး လႆႈလူႉတၢႆၵႂႃႇၵေႃႉၼိုင်ႈ၊ ထိုင်မႃးၼႂ်းဝၼ်းတီႈ 23 လိူၼ်ၵျူႊလၢႆႊၼၼ်ႉသမ်ႉ ၾၢႆႇသိုၵ်းထႆး ယဵပ်ႇၺႃးမၢၵ်ႇမႅင်းၾင်လိၼ်သေ မၢတ်ႇၸဵပ်း၊ ဝၢႆးၼၼ် တႄႇပဵၼ်ပၢင်တိုၵ်းၵၼ်မႃး ၾၢႆႇမိူင်းထႆး ၸႂ်ႉတိုဝ်းႁိူဝ်းမိၼ်တိုၵ်း၊ မၢၵ်ႇ ၼူၾႆးသေ တိုၵ်းတေႃးလႄႈ ႁဵတ်းႁႂ်ႈၵၢၼ်သိုၵ်းၵႄႈၵၢင်သွင်ၸိုင်ႈမိူင်း တိူဝ်းၶဵင်ႈၶႅင်ၶိုၼ်ႈမႃး ၼႆယဝ်ႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ