မီးၶၢဝ်ႇလိုဝ်းဢွၵ်ႇဝႆႉဝႃႈ သိုၵ်းမၢၼ်ႈယိုတ်းမိူင်း တင်း တပ်ႉပႂ်ႉလႅၼ်လိၼ် BGF တေၶဝ်ႈၵႂၢတ်ႇလၢင်ႉ ၸုမ်းၵျႃႊၽျႅၼ်ႉ တီႈဝဵင်းမႂ်ႇသူၺ်ႇၵူၵ်ႉၵူဝ်ႇ ဝဵင်းမျႃႉဝတီႇၼႆလႄႈ ၵူၼ်းၶႄႇ ၼပ်ႉႁူဝ်ႁဵင်ၵေႃႉ ပၢႆႈဢွၵ်ႇတင်းၶမ်ႈတင်းၶိုၼ်း ဝႃႈၼႆ။

ၽူႈၶၢၼ်ပၢၵ်ႇ တပ်ႉပႂ်ႉလႅၼ်လိၼ်ယၢင်းၽိူၵ်ႇ BGF/KNA ၵေႃႈ ယိုၼ်ယၼ်တွပ်ႇဝႆႉတီႈသိုဝ်ႇတၢင်ႇဢၼ်ဝႃႈ ၼႂ်းၶၢဝ်းၶိဝ်းၼႆႉ တေၵႂၢတ်ႇလၢင်ႉလႆႈ ဢွင်ႈတီႈၵျႃႊၽျႅၼ်ႉ ၼႂ်းသူၺ်ႇၵူၵ်ႉၵူဝ်ႇတင်းသဵင်ႈယဝ်ႉ ဝႃႈၼႆ။

ဢိင်ၼိူဝ်လွင်ႈၼႆႉသေ ၵူၼ်းၸမ်ၸႂ်ၵၼ်တင်းသိုၵ်းယၢင်းၽိူၵ်ႇ လၢတ်ႈဝႃႈ – တပ်ႉပႂ်ႉလႅၼ်လိၼ် တေႁွင်ႉတပ်ႉသိုၵ်းမၢၼ်ႈသေ ၵႂၢတ်ႇလၢင်ႉၵႂႃႇၸုမ်းၵျႃႊၽျႅၼ်ႉ ၼႂ်းဝဵင်းမႂ်ႇသူၺ်ႇၵူၵ်ႉၵူဝ်ႇ။ ၵွၼ်ႇသိုၵ်းမၢၼ်ႈ ပႆႇၶဝ်ႈၼၼ်ႉ ပွင်ႇၶၢဝ်ႇဝႆႉၸၢဝ်းၶႄႇၸုမ်းၵျႃးၽျႅၼ်ႉ ႁႂ်ႈလႆႈငိူင်ႉပၢႆႈ၊ ႁႂ်ႈၵႂႃႇယူႇသဝ်းဝႆႉတၢင်ႇတီႈ။ ၽွင်းမိူဝ်ႈသိုၵ်းမၢၼ်ႈၶဝ်ႈၵႂၢတ်ႇလၢင်ႉၼၼ်ႉ တေၺႃးတီႉၺွပ်းလိုပ်ႈဢွၵ်ႇပိုၼ်ႉတီႈ ဝႃႈၼႆ။

မိူဝ်ႈလိူၼ် ၾႅပ်ႉပိဝ်ႊရီႊပူၼ်ႉမႃးၼႆႉ တပ်ႉပႂ်ႉလႅၼ်လိၼ်ယၢင်းၽိူၵ်ႇ BGF ဢဵၼ်ႁႅင်းၼပ်ႉႁူဝ်ပၢၵ်ႇ ၶဝ်ႈၵႂၢတ်ႇလၢင်ႉ ၸုမ်းၵျႃးၽျႅၼ်ႉ ၼႂ်းဝဵင်းမႂ်ႇသူၺ်ႇၵူၵ်ႉၵူဝ်ႇ၊ ၽွင်းၼၼ်ႉ တီႉၺွပ်းၵူၼ်းၼွၵ်ႈမိူင်း 4000 ပၢႆသေ လိုပ်ႈဢွၵ်ႇသူင်ႇမိူဝ်းၶိုၼ်း မိူင်းၽႂ်မိူင်းမၼ်း။

ဝၢႆးလင်ၼၼ်ႉ ပိုၼ်ၽၢဝ်ႇဝႃႈ ၼႂ်းပိုၼ်ႉတီႈ ဢမ်ႇပၼ်ၸုမ်းၵျႃႊၽျႅၼ်ႉ ႁဵတ်းၵၢၼ်ယဝ်ႉ ဝႃႈၼႆသေတႃႉ ၼႂ်းႁၢင်ပီၼႆႉ မီးၶၢဝ်ႇလိုဝ်းဢွၵ်ႇမႃးဝႃႈ ၸုမ်းၵျႃႊၽျႅၼ်ႉၶဝ် တိုၵ်ႉသိုပ်ႇပၼ်ႇၵၢၼ်ဝႆႉ မိူၼ်ၵဝ်ႇယူႇ ဝႃႈၼႆ။

ယၢမ်းလဵဝ် မိူင်းၶႄႇ တင်း မိူင်းဢမေႊရိၵၼ်ႊ ပၼ်ႁႅင်းဢီးမႃးလၢႆလၢႆၾၢႆႇလႄႈ သိုၵ်းမၢၼ်ႈတင်း BGF ၶိုင်တေတီႉၺွပ်းၸုမ်းၵျႃႊၽျႅၼ်ႉထႅင်ႈ။

ဝဵင်းမႂ်ႇသူၺ်ႇၵူၵ်ႉၵူဝ်ႇၼႆႉ မီးဝႆႉတီႈၾၢႆႇႁွင်ႇဝဵင်းမျႃႉဝတီႇ မိူင်းယၢင်းၽိူၵ်ႇ လႅၼ်လိၼ် ထႆး – မၢၼ်ႈ။

ပူၼ်ႉမႃးပႆႇပေႃးႁိုင်ၼႆႉၵေႃႈ သိုၵ်းမၢၼ်ႈ တင်း BGF ပွင်ႇၶၢဝ်ႇလူင်ႈၼႃႈ ႁႂ်ႈၵူၼ်းႁဵတ်းၵၢၼ်ၵျႃႊၽျႅၼ်ႉ ပၢႆႈဢွၵ်ႇပိုၼ်ႉတီႈဝႆးဝႆးသေ ၶဝ်ႈၵႂၢတ်ႇလၢင်ႉ KK Park ဢၼ်မီးတီႈလႅၼ်လိၼ်။ မိူဝ်ႈၼၼ်ႉ ၵူၼ်းႁဵတ်းၵၢၼ်ၵျႃႊၽျႅၼ်ႉ ၼပ်ႉႁူဝ်ႁဵင်ၵေႃႉ ငိူင်ႉပၢႆႈဢွၵ်ႇတင်းၶမ်ႈတင်းၶိုၼ်း၊ ၵမ်ႈၽွင်ႈ ပၢႆႈၶဝ်ႈထိုင်ၾင်ႇထႆး၊ ၾၢႆႇၸဝ်ႈၼႃႈတီႈထႆး လႆႈၸတ်းသူင်ႇပၼ်ၶိုၼ်း မိူင်းၽႂ်မၼ်း ဝႃႈၼႆ။