ဝၼ်းတီႈ 16/11/2025 KNU ပိုၼ်ၽၢဝ်ႇဝႃႈ ႁူဝ်ပဝ်ႈၵဝ်ႇ KNU ၸေႃးမူႇတူးသေးၽူဝ်း လႄႈ ႁူဝ်ပဝ်ႈၵဝ်ႇ တပ်ႉၸုမ်း 6 ၸႄႈတွၼ်ႈၻူႊပလႃႊယႃႊ ၸေႃးသူၺ်ႇမွင်ႇ ၶဝ်သွင်ၵေႃႉၼႆႉ ဢမ်ႇၸွမ်းပၵ်းပိူင်ပေႃႇလသီႇမူႇၸုမ်း၊ ၵႂႃႇႁဵတ်းၵေႃႉၵၼ်တင်းသိုၵ်းမၢၼ်ႈယိုတ်းမိူင်းလႄႈ ပူတ်းဢွၵ်ႇသဵၼ်ႈၸိုဝ်းၼႂ်းၸုမ်း KNU ယဝ်ႉဝႃႈၼႆ။
ၽူႈၶၢၼ်ပၢၵ်ႇ KNU ပၻူဝ်ႇၸေႃးတေႃးၼီး လၢတ်ႈတီႈၸုမ်းသိုဝ်ႇၶၢဝ်ႇယၢင်းဝႃႈ- ၸတ်းပၢင်ၵုမ်ၸုမ်းပွင်ၵၢၼ်ၵမ်းထူၼ်ႈ 13 သေ ဢုပ်ႇၵုမ်တႅပ်းတတ်း ဝႃႈ- ယွၼ်ႉဝႃႈၶဝ် 2 ၸဝ်ႈၼႆႉဢမ်ႇၸွမ်းပၵ်းပိူင်ပေႃႇလသီႇမၢႆမီႈမူႇၸုမ်း KNU ၊ ၵမ်းၵမ်းပူၼ်ႉပႅၼ်မၢႆမီႈမူႇၸုမ်းသေဢမ်ႇၵႃး ၵႂႃႇႁဵတ်းၵေႃႉသိုၵ်းမၢၼ်ႈ လႄႈ ၸင်ႇလႆႈပၢၵ်ႈမွတ်ႇၸိုဝ်ႈသဵင်ၶဝ်ဢွၵ်ႇမူႇၸုမ်း။ – ဝႃႈၼႆ။
ပၻူဝ်ႇၸေႃးမူႇတူးသေးၽူဝ်းၼႆႉ လႆႈႁၢပ်ႇၵၢၼ်ၼႃႈတီႈပုၼ်ႉၽွၼ်းပဵၼ်ႁူဝ်ပဝ်ႈၼႂ်း KNU ပဵၼ် 2 သိုပ်ႇ။ ဝၢႆးလင်ဢႃယုႁူဝ်ပဝ်ႈမၼ်း မူတ်းသဵင်ႈ ယဝ်ႉၵေႃႈ ယင်းတိုၵ်ႉယူႇပဵၼ်လုၵ်ႈၸုမ်း KNU ဝႆႉယူႇတေႃႇထိုင်ယၢမ်းလဵဝ်။
ၵူၺ်းၵႃႈမိူဝ်ႈလိူၼ်ဢွၵ်ႉထူဝ်ႊပိူဝ်ႊဝၼ်းတီႈ 15 ဢၼ်သိုၵ်းမၢၼ်ႈယိုတ်းမိူင်းဢွၼ်ၼမ်းၸတ်းႁဵတ်း NCA ၶွပ်ႈတဵမ် 10 ပီၼၼ်ႉ ၸေႃးမူႇတူးသေးၽူဝ်းလႄႈ ၸေႃးသူၺ်ႇမွင်းၶဝ် ၵႂႃႇၶဝ်ႈႁူမ်ႈၸွမ်းသိုၵ်းမၢၼ်ႈတီႈၼေႇပျီႇတေႃႇ ၊ ႁဵတ်းႁႂ်ႈၸၢဝ်းယၢင်း ဢမ်ႇထုၵ်ႇၸႂ်ဢၼ်ၽူႈၼမ်းယၢင်း ၵႂႃႇႁဵတ်းၵေႃႉသိုၵ်းမၢၼ်ႈ။
ယူႇတီႈ KNU ၵေႃႈ တႅပ်းတတ်းဝႆႉဝႃႈသိုၵ်းမၢၼ်ႈယိုတ်းဢႃႇၼႃႇၸိုင်ႈမိူင်းလႄႈ NCA လူႉယဝ်ႉ ၼႆဝႆႉၸဵမ်လႂ်။ ၽွင်းၼင်ႇၼႆ ႁူဝ်ပဝ်ႈၵဝ်ႇ 2 ၵေႃႉၼၼ်ႉသမ်ႉ ႁၼ်လီၵမ်ႉထႅမ်သိုၵ်းမၢၼ်ႈသေ ဢၢၼ်းဢဝ် NCA ပဵၼ်လၵ်း သၢင်ႈလွင်ႈငမ်းယဵၼ်ယူႇမႅၵ်းမႅၵ်း- ၵွပ်ႈၼႆလႄႈ ယူႇတီႈ KNU ၸင်ႇလႆႈ ပၼ်တူတ်ႈတၢမ်ႇလူၺ်ႈ ပိုၼ်ၽၢဝ်ႇမွတ်ႇလူပ်းၸိုဝ်ႈၶဝ်ဢွၵ်ႇမူႇၸုမ်း- ၼႂ်းလိၵ်ႈပိုၼ်ၽၢဝ်ႇၼၼ်ႉပႃးဝႆႉၼင်ႇၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ