ၸွမ်ၽွင်းလူင်မိူင်းထႆး သင်ႇၵိုတ်း လွင်ႈတေႃႇဢႃယု ဝႂ်ၶႂၢင်ႉယူႇသဝ်းတီႈၼႂ်းမိူင်းထႆးပၼ် ႁႅင်းၵၢၼ် မိူင်းၵမ်ႊပေႃႊတီႊယိူဝ်ႊ မွၵ်ႈ 1 သႅၼ်ၵေႃႉ ဝႃႈၼႆ။

မိူဝ်ႈပၢၼ် ၸွမ်ၽွင်းလူင်မိူင်းထႆး ၵေႃႉၵဝ်ႇၼၼ်ႉ လႆႈပိုၼ်ၽၢဝ်ႇပၼ်ၶႂၢင်ႉဝႆႉ ႁႂ်ႈႁႅင်းၵၢၼ် မိူင်း ၵမ်ႊပေႃႊတီႊယိူဝ်ႊ ၸိူဝ်းဝတ်းဝႂ်မူတ်းဢႃယု သိုပ်ႇယူႇသဝ်းၵႂႃႇလႆႈတီႈၼႂ်းမိူင်းထႆး။ ထိုင်မႃးယၢမ်းလဵဝ် ၸွမ်ၽွင်းလူင်ၵေႃႉမႂ်ႇ ပၢၵ်ႈပႅတ်ႈၶေႃႈတႅပ်းတတ်းၼၼ်ႉသေ တေၶိုၼ်းမူၼ်ႉမႄး ထတ်းသၢင်ၵႂႃႇလီလီ ထႅင်ႈၵမ်းၼိုင်ႈ ဝႃႈၼႆ။

ၼႂ်းပၢင်ၵုမ် ၸုမ်းလူင်ပွင်ၸိုင်ႈ ဢၼ်ၸတ်းႁဵတ်းၼႂ်းဝၼ်းတီႈ 19 လိူၼ်ဢေႃးၵၢတ်ႉသ်ပူၼ်ႉမႃးၼၼ်ႉ လႆႈတႅပ်းတတ်းဝႃႈ တေလူတ်းယွၼ်ႇပၼ် ႁႅင်းၵၢၼ်မိူင်းၵမ်ႊပေႃႊတီႊယိူဝ်ႊ၊ မိူင်းလၢဝ်း၊ မိူင်းႁူမ်ႈတုမ်မၢၼ်ႈ လႄႈ မိူင်းဝႅတ်ႉၼမ်း ၸိူဝ်းဝတ်းဝႂ်မူတ်းဢႃယု သိုပ်ႇယူႇသဝ်းႁဵတ်းၵၢၼ်ၵႂႃႇလႆႈ ၼႂ်းမိူင်းထႆး ထႅင်ႈ 1 ပီ ပိူဝ်ႈတႃႇလူတ်းယွမ်း ပၼ်ႁႃလွင်ႈႁႅင်းၵၢၼ်ဢမ်ႇၵုမ်ႇထူၼ်ႈ ဝႃႈၼႆဝႆႉ။

ၵူၺ်းၵႃႈ ထိုင်မႃးယၢမ်းလဵဝ် ၸွမ်ၽွင်းလူင်မိူင်းထႆး ဢၼုထိၼ်ႊ လႆႈၸီႉသင်ႇ ႁႂ်ႈၵူတ်ႇထတ်းဝတ်းဝႂ်ႁႅင်းၵၢၼ် လႄႈ ႁဵတ်းၸွမ်းပၵ်းပိူင်မၢႆမီႈ မီးဝႆႉ။ သင်လူတ်းယွၼ်ႇၵၢၼ်ၵူတ်ႇထတ်းၸိုင် ၸၢင်ႈမီးပၼ်ႁႃတေႃႇလွင်ႈႁူမ်ႇလူမ်ႈ ၼႂ်းဝၼ်းမိူဝ်းၼႃႈ ဝႃႈၼႆ။

လွင်ႈၼႆႉ ၸွင်ႇၵဵဝ်ႇၶွင်ႈၵၼ်တင်း သိုၵ်းထႆးယဵပ်ႇၺႃးမၢၵ်ႇမႅင်းၾင်လိၼ် ႁိမ်းလႅၼ်လိၼ် မိူင်းထႆး တင်း မိူင်းၵမ်ႊပေႃႊတီႊယိူဝ်ႊ ႁိုဝ်ၼႆတႄႉ ဢမ်ႇလၢတ်ႈဝႆႉတႅတ်ႈတေႃး။ ၽွင်းမိူဝ်ႈဢဝ်ႁူမ်ႇလူမ်ႈ တီႈလႅၼ်လိၼ်ၼၼ်ႉ ယဵပ်ႇၺႃးမၢၵ်ႇမႅင်းၾင်လိၼ်သေ သိုၵ်းထႆး မၢတ်ႇၸဵပ်း 4 ၵေႃႉ၊ တႃႇၵေႃႉၼိုင်ႈ လႆႈမႆႈၸႂ်ႁႅင်းဝႆႉ။

ဝၢႆးလင်ၼၼ်ႉ ၼႂ်းဝၼ်းတီႈ 10/11/2025 ၼႆႉ ၸွမ်ၽွင်းလူင်မိူင်းထႆး လႆႈပိုၼ်ၽၢဝ်ႇၵိုတ်းလိုဝ်ႈ လွင်ႈတေပွႆႇပၼ်ၶိုၼ်း ၵူၼ်းသိုၵ်း မိူင်းၵမ်ႊပေႃႊတီႊယိူဝ်ႊ ၸိူဝ်းၺႃးတီႉၺွပ်းဝႆႉ ၼႆယဝ်ႉ။